Degé Kangyur volume 79, F.105.b

རྣམ་པར་བརྟགས། །​ལྷ་ཡི་ལོངས་སྤྱོད་འདོད་པ་ཡང་། །​བཞི་པར་ཡང་ནི་བསྟན་པའོ། །​ལྷ་ཡི་གཟུགས་ནི་ཐམས་ཅད་ཀྱང་། །​ལྔ་པར་སེམས་ཀྱིས་བརྟག་པར་བྱ། །​དྲུག་པ་གཟུགས་ནི་མེད་པའི་ཆ། །​བདུན་པ་ཆོས་ཀྱི་དབྱིངས་ཉིད་དེ། །​བརྒྱད་པར་རང་འདོད་རྣལ་འབྱོར་པའི། །​སངས་རྒྱས་རྣམས་ཀྱི་འབྲས་བུའི་དོན། །​རྡོ་རྗེ་སེམས་དཔའ་སྙིང་རྗེ་ཆེ། །​ཡིད་ནི་གཅིག་ཏུ་གྱུར་པས་ཉོན། །​ངེས་པར་དངོས་པོ་ཐམས་ཅད་ཀྱི། །​དག་པ་དེ་བཞིན་ཉིད་དུ་བརྗོད། །​ཕྱིས་ནི་རེ་རེར་དབྱེ་བ་ཡིས། །​ལྷ་རྣམས་ཀྱི་ནི་བརྗོད་པར་བྱ། །​ལུས་ཅན་རྣམས་ཀྱི་ཕུང་པོ་དང་། །​ཁམས་རྣམས་དང་ནི་སྐྱེ་མཆེད་རྣམས། །​རང་བཞིན་གྱིས་ནི་རྣམ་པར་དག །​ཉོན་མོངས་མི་ཤེས་སྒྲིབ་སྦྱང་བྱ། །​རང་རིག་བདག་ཉིད་དག་པ་ཉིད། །​དག་པ་གཞན་གྱིས་རྣམ་གྲོལ་མིན། །​ཡུལ་གྱི་དངོས་པོ་དག་པའི་ཕྱིར། །​རང་གིས་རིག་པའི་བདེ་བ་མཆོག །​གཟུགས་ལ་སོགས་པའི་ཡུལ་གང་དང་། །​གཞན་ཡང་རྣལ་འབྱོར་པ་སྣང་བ། །​དེ་ཀུན་རང་བཞིན་དག་པ་སྟེ། །​དེ་ཕྱིར་སངས་རྒྱས་སྣ་ཚོགས་དངོས། །​ཀྱེ་བཅོམ་ལྡན་འདས་རྣམ་པར་མ་དག་པ་གང་ལགས། །​བཅོམ་ལྡན་འདས་ཀྱིས་བཀའ་སྩལ་པ། གཟུགས་ལ་སོགས་པའོ། །​དེ་ཅིའི་སླད་དུ་ཞེ་ན། གཟུང་བ་དང་འཛིན་པའི་ཕྱིར་རོ། །​གསོལ་པ། གཟུང་བ་དང་འཛིན་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། མིག་གིས་གཟུགས་ནི་གཟུང་བར་བྱ། །​སྒྲ་ནི་རྣ་བས་མཉན་པར་བྱ། །​དྲི་ནི་སྣ་ཡིས་ཚོར་བར་བྱ། །​ལྕེ་ཡིས་རོ་ནི་རིག་པར་བྱ། །​ལུས་ཀྱིས་དངོས་པོ་རིག་པར་བྱ། །​ཡིད་ཀྱིས་བདེ་སོགས་ཐོབ་པ་ནི། །​དག་པས་དུག་མེད་བྱས་ནས་ནི། །​བསྟེན་བྱ་འདི་དག་བསྟེན་པར་བྱ། །གཟུགས་ནི་སངས་རྒྱས་རྣམ་སྣང་མཛད། །​ཚོར་བ་རྡོ་རྗེ་ཉི་མ་སྟེ། །​འདུ་ཤེས་པདྨ་གར་དབང་ཕྱུག །​དེ་བཞིན་འདུ་བྱེད་རྡོ་རྗེ་རྒྱལ། །​རྣམ་ཤེས་རྡོ་རྗེ་སེམས་དཔའ་ཉིད། །​ཀུན་གྱི་ངོ་བོ་ཧེ་རུ་ཀ། །​མིག་ལ་གཏི་མུག་རྡོ་རྗེ་བཤད། །​ཞེ་སྡང་རྡོ་རྗེ་མངོན་ཐོས་



The English translation of this folio by 84000 Translating the words of the Buddha can be found at:
https://read.84000.co/translation/toh381.html?part=UT22084-079-008-9065#UT22084-079-008-9065