Degé Kangyur volume 79, F.136.a

བོ་བརྒྱར་འགས་པར་འགྱུར་རོ་ཞེས་ལན་གསུམ་དུ་བརྗོད་དོ། །​རྡོ་རྗེ་ཆེན་པོ་ལག་པར་བཟུང་ནས་རང་གི་རྡོ་རྗེ་ལས་ཁྲོ་བོའི་སྐུ་བཏོན་ཏེ། རྡོ་རྗེའི་རྐང་པས་དཀྱིལ་འཁོར་གྱིས་ཀུན་ཏུ་བསྐོར་ཞིང་ཡོངས་སུ་བཅགས་པས་གདུག་པ་ཅན་ཐམས་ཅད་བསྐྲད་པར་བྱའོ། །​དེ་ལྟར་ས་ཡོངས་སུ་གཟུང་བ་ཡིན་ནོ། །​དེ་ནས་སའི་ལྷ་མོ་དགུག་པའི་སྔགས་ཀྱིས་བྱིན་གྱིས་བརླབ་པ་ལ་སོགས་པ་བྱ་ཞིང་། བླ་མ་ལ་ཕྱག་འཚལ་ནས་སྔགས་ཀྱི་མཁན་པོ་ཕྱག་འཚལ་ཏེ། ཕྱིས་སའི་ལྷ་མོ་གསེར་གྱི་ཁ་དོག་ཅན་བུམ་པ་ལག་ན་ཐོགས་པ་བཀུག་ཅིང་བཅུག་སྟེ་བཅིངས་ནས་དྲི་ཞིམ་པོ་ལ་སོགས་པའི་མཆོད་པ་ལྔ་པོ་རྣམས་ཀྱིས་ཡང་དག་པར་མཆོད་ཅིང་། ལྷག་པར་གནས་ནས་ཉེ་བར་བྱའོ། །​དེའི་དགུག་པའི་སྔགས་བཀའ་སྩལ་པ། ཨོཾ་ཨེ་ཧྱེ་ཧི་མ་ཧཱ་དེ་བཱི་པྲྀ་ཐི་བཱི་ལོ་ཀ་མཱ་ཏ་རེ། སརྦྦ་རཏྣ་སཾ་པུརྞྞེ་དི་བྱ་ལཾ་ཀཱ་ར་བྷཱུ་ཥི་ཏེ་ཧཱ་ར་ནཱུ་པཱུ་ར་ནི་རྒྷོ་ཥེ། བཛྲ་སཏྭ་པྲ་པཱུ་ཛི་ཏེ། གྲྀ་ཧཱི་ཏྭཱ་ཨི་ད་མརྒ་ཧོ་མ་ཀརྨྨ་སུ་སཱ་དྷ་ཡེ་ཏ། ཧཱི་ཧཱི་ཧཱི་ཧཱི་ཧྃ་སྭཱ་ཧཱ། སྔགས་འདིས་སྟ་གོན་ལ་གནས་པ་ལ་སོགས་པ་བྱས་ནས་ས་བྱུག་པ་བྱ་བའི་ཕྱིར་བཤང་བ་དང་གཅི་བ་ལ་སོགས་པ་བསང་གཏོར་བྱས་ཏེ་བྱུག་པར་བྱའོ། །​དེ་ནས་ཤ་ཆེན་གྱི་བདུག་པས་བདུག་པར་བྱའོ། །​བདུགས་མ་ཐག་ཏུ་མཆོད་ནས་དེ་ལ་དབུས་སུ་ཕྱག་རྒྱ་གཞག་པ་ནི་རིག་མ་རབ་ཏུ་གཞུག་པར་བྱའོ། །​ཅི་ལགས་བཅོམ་ལྡན་འདས་ལུགས་མ་དང་། འདུས་བྱས་པ་དང་། རི་མོ་སྣ་ཚོགས་དང་། ཤིང་ལ་སོགས་པ་ལས་བྱས་པའི་རིག་མའི་ལྷ་མོ་གཞུག་པར་བགྱི་ཞེས་གསུངས་སམ། བཅོམ་ལྡན་འདས་ཀྱིས་བཀའ་སྩལ་པ། གདོལ་པ་ལ་སོགས་པའི་མིའི་བུ་མོ་གཞུག་པར་བྱའོ། །​དེའི་དངོས་པོ་མེད་ན་གཞན་ཕལ་པ་མཆོག་གི་ཡན་ལག་ལ་ཧྲཱིའི་སྔགས་དགོད་པར་བྱའོ། །​ཡན་ལག་ཐམས་ཅད་ལ་ཞེས་བྱ་བ་ནི་སྙིང་ག་དང་། སྨིན་མཚམས་དང་། ལྐོག་མ་དང་། སྤྱི་བོ་རྣམས་སུ་ཧྲཱིཿདང་། བྷ་གའི་དབུས་སུ་བྷྲུྃ་དགོད་པར་བྱའོ། །​ཅི་བཅོམ་ལྡན་འདས་གོང་དུ་དེ་རྣམས་ཀྱི་དབུས་སུ་བྷུྃ་དགོད་པ་



The English translation of this folio by 84000 Translating the words of the Buddha can be found at:
https://read.84000.co/translation/toh381.html?part=UT22084-079-008-9126#UT22084-079-008-9126