Degé Kangyur volume 79, F.127.b

སྲེག་བླུགས་བྱས་ན་ཉི་མ་གསུམ་གྱིས་འཆི་བར་འགྱུར་རོ། །​མ་ཤི་ན་མཐར་གཅིག་ཏུ་གནས་ནས་མེའི་ཐབ་ཁུང་གྲུ་གསུམ་བྱས་ཏེ། གོང་དུ་གསུངས་པའི་རྫས་དེ་ཉིད་གདོལ་པའི་མེ་ལ་སྲེག་བླུགས་བྱས་ན་དེ་ཉིད་ཀྱི་རྣལ་འབྱོར་གྱིས་མཐར་བྱེད་ཀྱི་གནས་སུ་ཁྱེར་བར་འགྱུར་ཏེ་འདི་ལ་ཐེ་ཚོམ་མི་བྱའོ། །​ཡང་ན་བསྐྲད་པར་བྱ་བར་འདོད་པས་ཡུངས་ཀར་དང་། ཁྲེ་དང་། མོན་སྲན་གྲེའུ་དང་། རྐང་རྗེས་ཀྱི་རྡུལ་བསྲེས་ནས་ཁྲག་དང་། ཡུངས་མར་གྱིས་བསྐུས་ཏེ་དེ་ཉིད་ལ་བྱའོ། །​གསེར་ཤིང་ལ་ཁྭའི་ཚང་དང་ལྷན་ཅིག་སྦྱར་བས་གང་གི་མིང་ནས་སྲེག་བླུགས་བྱས་ན་དེ་སྐད་ཅིག་ལ་སྐྲོད་པར་བྱེད་དོ། །​ཡང་ན་ཁྭའི་ཤིང་དང་། རྔ་མོའི་རྟུག་པ་དང་། ལྷན་ཅིག་ཆང་དང་ལྡན་པར་སྐྲ་གྲོལ་ཞིང་གཅེར་བུར་གྱུར་པས་གང་གི་མིང་གིས་རོ་བསྲེགས་ཀྱི་མེ་ལ་སྲེག་བླུགས་བྱས་ན་དེའི་སྐད་ཅིག་ལ་སྐྲོད་པར་བྱེད་དོ། །​ཡང་ན་རེངས་པར་འདོད་པས་ཉ་དང་ཤ་ལ་སོགས་པའི་རྫས་དང་། བག་ཕྱེ་དང་ལྷན་ཅིག་འབྲུ་དང་། ཁྲག་དང་། སྦྲང་རྩི་བསྐུས་ནས་ཁྭའི་གཤོག་པ་དང་སྦྱར་ཞིང་ཁྭའི་ཁྱིམ་གྱི་ཤིང་ལ་སོགས་པ་དང་། ལྷག་མ་དང་སོ་ཤིང་ལྷན་ཅིག་ཐབ་ཁུང་གྲུ་བཞི་པར་གང་གི་མིང་ནས་སྲེག་བླུགས་བྱས་ན་དེ་བྱ་བ་ཀུན་ལ་རེངས་པར་བྱེད་དོ། །​ཡང་ན་ཡུང་པ་དང་། ལྡོང་རོས་དང་། བ་བླ་དང་། གི་ཝང་དང་ལྷན་ཅིག་ཁ་བྱང་དུ་བལྟས་ཏེ་གནས་ནས་གང་གི་མིང་ནས་སྲེག་བླུགས་བྱས་པ་དེ་རེངས་པར་འགྱུར་རོ། །​ཁྱི་དང་ཁྱིམ་བྱའི་ཤ་དང་། །​རྔ་མོའི་རྟུག་པ་བྱི་ལའི་ཁྲག་གིས་བྱུགས་པས་པི་ཅུ་མ་རྔའི་ཤིག་གིས་མེ་སྤར་ལ་གང་གི་གྲོང་གི་མིང་ནས་སྲེག་བླུགས་བྱས་པ་དེ་གྲོང་སྟོར་པར་འགྱུར་རོ། །​དམ་ཚིག་ཆེན་པོ་ཆང་གིས་བྱུགས་པས་ཇི་སྲིད་བརྒྱ་རྩ་བརྒྱད་ཀྱི་བར་དུ་ཐུན་གསུམ་གྱི་བར་དུ་སྲེག་བླུགས་བྱས་ན་ཟླ་བ་དྲུག་གིས་ཡུལ་གྱི་བདག་པོར་འགྱུར་རོ། །​ཝའི་ཤའི་སྲེག་རྫས་ཀྱིས་སྲེག་བླུགས་བརྒྱ་བྱས་ན་ཟླ་བ་གསུམ་ལོན་ནས་དབུལ་པོ་སྐད་ཅིག་གིས་འཇིག་པར་བྱེད་དོ། །​བ་གླང་གི་ཤ་ཁྲག་གིས་བསྒོས་པས་སྲེག་བླུགས་སྟོང་བྱས་ན་དབང་དུ་བྱེད་དོ། །​ཇི་སྲིད་འཚོའི་བར་དུ་ཐེ་ཚོམ་མེད་དོ། །​དེ་ཉིད་



The English translation of this folio by 84000 Translating the words of the Buddha can be found at:
https://read.84000.co/translation/toh381.html?part=UT22084-079-008-9109#UT22084-079-008-9109