།མགུལ་ན་འདུག་པ་གང་ཡིན་དེ་ནི་གདུ་བུར་བྱིན་ཞེས་ཟེར་བ་ཞིག་ཡི་གེར་བྲིས་ནས་བྱིན་ཏེ། དེས་ཡི་གེ་དེ་ཁྱེར་ནས་ཆས་ཏེ་སོང་བ་ལས། ནུ་བོ་རྣམས་ཀྱིས་ལམ་དུ་བཟུང་སྟེ། ཕ་ལས་ཁྱོད་ཀྱིས་ཅི་ཐོབ་ཅེས་སྨྲས་སོ། །དེས་སྨྲས་པ། ཅི་ཡང་མ་ཐོབ་སྟེ། ཡི་གེ་འདི་བྱིན་པར་ཟད་དོ་ཞེས་བྱས་སོ། །དེ་ནས་དེ་དག་ན་རེ་འདི་ནི་ཕས་བྲིད་པ་ལྟ་སྟེ་སོང་ཤིག་ཅེས་བྱས་ནས་དེ་བཏང་སྟེ། མཐར་གྱིས་རང་གི་ཁྱིམ་དུ་ཕྱིན་ནས། རེ་ཞིག་ངལ་སོ་ཤིང་། འདུག་འདུག་ནས་མས་སྨྲས་པ། ཁྱོད་ཀྱིས་ཕ་ལས་ཅི་ཐོབ། བུས་སྨྲས་པ། ཅི་ཡང་མ་ཐོབ་མོད་ཀྱི། ཡི་གེ་འདི་ལྟ་བུ་ཞིག་ཐོབ་བོ། །མས་སྨྲས་པ། བུ་ཁྱོད་ཕས་བྲིད་དེ། ལམ་གྱི་ཚེགས་བྱུང་བ་ཁོ་ནར་ཟད་དེ་ཅི་ཡང་མ་གྲུབ་བོ། །བུས་སྨྲས་པ། ཡུལ་དེ་ནི་ཆེ་བ་ཡིན་ཏེ། བདག་འདྲིད་པར་མི་བྱེད་དོ་ཞེས་བྱས་ནས། དེ་ཡི་གེ་དེ་དཔྱོད་པ་ལ་ཞུགས་ཏེ། གྲོང་ནས་ཞེས་བྱ་བ་ནི་གང་དུ་སྐྱེས་པ་དེ་ཡིན་ཏེ། དེ་ནི་འདིར་གྲོང་ཞེས་བསྟན་ཏོ། །གྲོང་དུ་ཞེས་བྱ་བ་ནི་གང་དུ་ཕྱུང་སྟེ། བསྲེག་པའི་ས་ཡིན་ནོ། །མགྱོགས་ཀྱི་རྣ་བའི་ཤིང་གི་དྲུང་ཞེས་བྱ་བ་ལ་མགྱོགས་ཞེས་བྱ་བ་ནི་རྟ་ཡིན་ཏེ། དེ་ནི་རྣ་བའི་ཤིང་ཞེས་བྱ་བ་ནི་རྟ་རྣ་ཞེས་བྱ་སྟེ། ཤིང་རྟ་རྣའི་དྲུང་ལ་བྱའོ། །གནས་ནས་ཤར་ཕྱོགས་ལོགས་སུ་ཞེས་བྱ་བ་ནི་ཤར་ཕྱོགས་ཡིན་ནོ། །དཔག་ཚད་གཅིག་ཙམ་ན་ཞེས་བྱ་བ་དེ་ནི་དཔག་ཚད་གཅིག་ཁོ་ན་ལ་བྱའོ། །དེས་ཚིགས་སུ་བཅད་པ་དེ་ལྟ་བུར་དཔྱད་ནས། མཚན་མོ་མི་མི་རྒྱུ་བའི་ཚེ་དུར་ཁྲོད་དུ་སོང་ནས། དེའི་འདབ་ན་རྟ་རྣ་ཞེས་བྱ་བའི་ཤིང་ཞིག་འདུག་སྟེ། དེས་དེའི་ཤར་ཕྱོགས་ལོགས་སུ་བཅལ་ཏེ་གཉའ་ཤིང་གང་ཙམ་ཚུན་ཅད་བརྐོས་པ་དང་། རེ་ཞིག་ན་གསེར་གྱི་བུམ་པ་མགྲིན་པ་མུ་ཏིག་གི་ཕྲེང་བས་བཅིངས་པ་ཞིག་མཐོང་ནས། དེ་དགའ་ཆེས་ཏེ་དེ་བླངས་ནས་ཁྱིམ་དུ་སོང་སྟེ། མུ་ཏིག་གི་ཕྲེང་བ་བཀྲོལ་ནས་མ་གདུ་བུ་ལ་བྱིན་ནོ། དགེ་སློང་དག་ཇི་སྙམ་དུ་སེམས། དེའི་ཚེ་ཁྱིམ་བདག་ཏུ་གྱུར་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་བུར་གྱུར་པ་གང་ཡིན་པ་དེ་ནི་འཚོ་བྱེད་འདི་ཁོ་ན་ཡིན་ཏེ། དེའི་ཚེ་ཡང་འདིས་ངའི་དགོངས་ཏེ་གསུངས་པ་རྟོགས་སོ། །ད་ལྟར་ཡང་འདིས་ངའི་དགོངས་ཏེ་གསུངས་པ་རྟོགས་སོ།