Degé Kangyur volume 69, F.147.b

མཚོ་དང་། པད་མའི་རྫིང་གིས་བརྒྱན་པར་ལྷ་གཞན་དག་ཀྱང་རྩེ་བར་བྱེད། དགའ་བར་བྱེད། དགོད་པར་བྱེད་དེ། གླང་པོ་ཆེའི་མཆོག་མེ་ཏོག་གིས་བཀྲ་བ་དེའི་མགོ་ལ་ཡང་རི་སྤྲུལ་ཏོ། །​དེ་ནས་ཡང་གླང་པོ་ཆེ་མཆོག་གི་སོའི་ཐོར་ཏོ་ཟླ་བ་ཚེས་པ་ལྟ་བུ་ལ་ཉེ་བའི་ཚལ་དག་སྤྲུལ་ཏེ། མེ་ཏོག་དང་མཚོས་ས་གཞི་རྟག་ཏུ་གང་བའི་ཐང་ལྟ་བུར་བཀྲ་བར་བྱས་ཤིང་འདབ་མས་ཀྱང་ཉེ་བར་མཛེས་པར་བྱས། བུང་བ་ལང་ལོང་འཁྲིགས་པ་དང་། ཁུ་བྱུག་གི་སྒྲ་དི་རི་རི་འབྱིན་པ་དང་། སྐམ་ལ་རྒྱུ་བ་རིན་པོ་ཆེ་སྣ་བདུན་གྱི་རྨ་བྱ་དང་ཤང་ཤང་ཏེའུ་ཤིན་ཏུ་ཡིད་དུ་འོང་བ་དུ་མ་དང་། གཞན་ཡང་ལྷའི་བྱ་རྣམས་ཀྱིས་སོ་ལ་སྤྲུལ་པ་ཉེ་བར་མཛེས་པར་བྱས་སོ། །​གླང་པོ་ཆེའི་མཆོག་ལུས་ཆེན་པོར་གྱུར་ནས་དགའ་བའི་ཚལ་ག་ལ་བ་དེར་འགྲོ་བར་བྱེད་དེ། ལྷའི་ཚོགས་ཀྱིས་ཡོངས་སུ་བསྐོར་ཅིང་ངལ་བ་མེད་ལ་སྟོབས་དང་ལྡན་པ་འགྲོས་མཛེས་པས་རབ་ཏུ་འགྲོའོ། །དེ་ནས་ཡང་གླང་པོ་ཆེའི་མཆོག་དེའི་སྣ་གཉིས་ཀྱི་ནང་ནས་སྣ་ཆུའི་རྒྱུན་འཛག་སྟེ། འདི་ལྟ་སྟེ། འཛམ་བུའི་གླིང་ན་མཚོ་གང་གཱ་དང་ཡ་མུ་ནའི་ཆུ་འབབ་པ། ཤིན་ཏུ་དང་ཞིང་རྙོག་པ་མེད་པ་བསིལ་བ་རབ་ཏུ་འབབ་པ་བཞིན་ནོ། །​དེ་བཞིན་དུ་ཅུང་ཟད་དཔེར་བྱ་ན་ཇི་ལྟར་མིའི་གནས་བཞི་དག་ན་སྨན་དང་། རྩྭ་དང་། ནགས་ཁྲོད་དང་། ནས་དང་། གྲོ་ཚ་བས་གདུངས་ཤིང་སྐམས་པ་རྣམས་དེ་ནས་ཡང་སོས་པར་བྱ་བའི་ཕྱིར། འབྲུ་དང་ལོ་མ་རྣམས་ཀྱི་སྟེང་ན་ཆུ་འབབ་པ་མངོན་པ་དེ་ལྟར་གླང་པོ་ཆེའི་རྒྱལ་པོ་དེའི་རབ་ཏུ་དབྱེ་བ་ཡང་རྟག་ཏུ་དེ་ལྟ་བུ་ཡིན་ནོ། །​གལ་ཏེ་ཆུ་འབབ་པ་དེ་རླུང་གིས་ནམ་མཁའ་ལ་འཐོར་བར་བྱེད་ཅིང་། རླུང་གིས་རྒྱང་རིང་དུ་སྐམས་པར་བྱེད་པ་དེ་ནི་ཟིལ་པ་འདི་ཡིན་ཏེ་མིའི་གནས་གསུམ་ན་སྣང་ངོ་། །​དེ་ནས་ཡང་གླང་པོ་ཆེའི་རྒྱལ་པོའི་མཆོག་དེའི་སྣ་སྒྲ་འབུད་པས་འབྱུང་བ་དེ་ནི་ནམ་མཁའི་དབུས་ན་ལྷ་རྒྱུ་བ་རྣམས་ཀྱི་ནང་དུ་འབབ་པ། འོད་དཀར་པོར་རྒྱུ་བ་མངོན་པ་འདི་ཡིན་ཏེ། གང་མུ་སྟེགས་པ་གཞན་དག་ན་རེ་འདི་ལྟར་འདི་ནི་དབང་པོའི་ལམ་མོ་ཞེས་རྗོད་དོ། །​ཡང་གཞན་དག་ན་རེ་འདི་ལྟར་འདི་ནི་གླང་པོ་ཆེ་ས་སྲུང་གི་བུའི་ལམ་ཡིན་ནོ་ཞེས་བརྗོད་ཀྱང་དེ་ལྟར་ཆུ་དཀར་པོའི་ངོ་བོ་ཉིད་དེ་མི་ཤེས་སོ།​། །​།



The English translation of this folio by 84000 Translating the words of the Buddha can be found at:
https://read.84000.co/translation/toh287.html?part=UT22084-068-021-100793#UT22084-068-021-100793