Degé Kangyur volume 69, F.132.b

འབྲིང་དང་། ཆེན་པོ་བྱས་པ་བཞིན་ལས་བདེ་བ་རྣམས་ཀྱི་རྗེས་སུ་འཇུག་པ་ན་འདོང་བར་བྱེད་དེ། ལྷ་དེ་རྣམས་སོ་སོ་ལ་ལྷ་མོའི་ཚོགས་བརྒྱའམ། སྟོང་ངམ། འབུམ་རྣམས་གར་བྱེད། གླུ་ལེན། རབ་ཏུ་དགོད་ཅིང་ཡན་ལག་ལྔ་དང་ལྡན་པའི་རོལ་མོ་སྙན་པ་དང་བཅས་པ་རྡོབ་པ་ཞེས་བྱ་བ་ཀུན་དུ་གང་ཞིང་བྱེད་ལ་ཚལ་ཆེན་པོ་ཞེས་བྱ་བ་ག་ལ་བ་དེར་འདོང་བར་བྱེད་དོ། །​ལྷའི་འདོད་པའི་ཡོན་ཏན་ལྔ་རྣམས་འབྱོར་ཅིང་ལྡན་པར་གྱུར་པའི་ལྷ་མོ་དེ་དག་ཐམས་ཅད་ལྷ་དེ་རྣམས་དང་སོ་སོར་ཕྲད་ནས་དེ་ལྟར་བྲོ་གར་བྱེད། དགོད་པར་བྱེད། རྩེད་མོ་བྱེད་དོ། །​འདི་ལྟར་ལྷ་དེ་རྣམས་འདོད་པ་ལ་རྣམ་པར་ཞེན་པ་ཞེས་བྱ་བས་དགའ་བར་བྱེད་དེ། ལྷའི་སྒྲ་སྙན་པ་ཚང་ཚིང་གི་ནང་ན་ལྷའི་སྒྲ་སྙན་པ་དེ་དང་། གར་དགའ་དགུར་འགྲོ་བའི་ལྷ་དེ་རྣམས་ལྷའི་འདོད་པའི་རྣམ་པ་གང་ཡིན་པ་དེ་ཉིད་ཀྱིས་དེར་སྐྱེད་མོས་ཚལ་དུ་འགྲོ་བར་བྱེད་དེ། ལ་ལ་ནམ་མཁའ་ལ་སྤྲིན་ནག་པོ་འགྲོ་བ་ལྟ་བུ་བཻ་ཌཱུརྱའི་མདོག་ཅན་དེ་རྣམས་འགྲོ་བར་བྱེད། ལྷའི་མཆོག་དེ་དག་ཁ་ཅིག་ནི་འདི་ལྟར་རྒྱན་སྣ་ཚོགས་དང་། གོས་སྣ་ཚོགས་དང་། ཆ་བྱད་སྣ་ཚོགས་དང་། དགའ་བའི་གཏམ་སྣ་ཚོགས་ཀྱིས་དགའ་གཏམ་སྨྲ་ཞིང་ནམ་མཁའ་ཁྱབ་པར་བྱས་ནས་ཚལ་ཆེན་པོ་ག་ལ་བ་དེར་འདོང་བར་བྱེད་དོ། །​ལྷའི་མཆོག་གཞན་ཁ་ཅིག་ནི་གསེར་གྱི་ས་གཞིའི་ལམ་ནས་རབ་ཏུ་འགྲོ་ལ། འགྲོ་བ་དེ་རྣམས་ཀྱི་ཤིང་རྟ་འབུམ་ཕྲག་དུ་མའི་མུ་ཁྱུད་ཀྱིས་གསེར་གྱི་རྡུལ་བསླང་སྟེ་ནམ་མཁའ་ཁྱབ་པར་བྱས་ནས་འདུག་གོ། །​གང་གིས་ནམ་མཁའ་དེ་སྐྱ་བོར་བྱེད་ཀྱང་། ལྷ་རྣམས་ལ་འགོ་བར་མི་བྱེད་ལ། ལྷ་གང་འཆི་བ་དང་ཉེ་བར་འགྱུར་བ་དེ་རྣམས་ཀྱི་གདོང་ངམ། གོས་དེ་ལ་ནི་འགོ་བར་བྱེད་དོ། །​ལྷ་གང་གཞན་དག་གིས་རྡུལ་དེ་མཐོང་ཞིང་འཆི་བའི་ལྟས་མཐོང་ལ། དེ་འཆི་བའི་སྡུག་བསྔལ་མཐའ་མེད་པར་འགྱུར་བ་མངོན་པར་མཐོང་ནས། དེ་སྙིང་རྗེ་རྗེ་ལྟ་བུར་གྱུར་པའི་སེམས་ཀྱིས་འདི་ལྟར་ཚིགས་སུ་བཅད་དེ་སྨྲས་པ། བུད་ཤིང་ལྟ་བུའི་ཡུལ་འབྱུང་དང་། །​མེས་བསྲེགས་ལྟ་བུའི་འཆི་འགྱུར་བ། །​ལམ་འདི་ནས་ནི་ལྷ་རྣམས་དག །​བརྒྱའམ་ཡང་ན་སྟོང་དུ་འདིར། །​འཆི་བ་གཞན་གྱིས་མཐོང་འགྱུར་ལ། །​བདག་ཉིད་ཀྱིས་ནི་མི་མཐོང་སྟེ། །​ཕྱི་



The English translation of this folio by 84000 Translating the words of the Buddha can be found at:
https://read.84000.co/translation/toh287.html?part=UT22084-068-021-100763#UT22084-068-021-100763