Degé Kangyur volume 69, F.15.a

པ་དེ་དག་མཚོ་ཀུན་མཐོང་དེ་ཡོངས་སུ་བསྐོར་ནས་འཁོད་དོ། །​དེ་ནས་ཡང་མཚོ་ཡོངས་སུ་བསྐོར་བ་དེ་དག་ཉིད་ཀྱིས་མཚོ་དེའི་ནང་དུ་འཛམ་བུའི་གླིང་གི་མི་མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། ལྷ་དང་འཐུན་པར་སྒྲུབ་པ་དེ་དག་ཤི་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་བ་མཐོང་ངོ་། །​དེ་ནས་མཚོ་དེའི་ནང་དུ་ལྷའི་ཕྱོགས་ནི་རྒྱལ་བར་འགྱུར། ལྷ་མ་ཡིན་གྱི་ཕྱོགས་ནི་ཕམ་པར་འགྱུར་བ་མཐོང་བ་དང་། ལྷ་མ་ཡིན་མགུལ་ཕྲེང་ཞེས་བྱ་བ་དང་། ལྷ་མ་ཡིན་གྱི་དབང་པོ་བརྟན་པ་ཞེས་བྱ་བ་དེ་དག་འདི་སྙམ་སེམས་ཏེ། ཀྱེ་མ་ལྷ་རྣམས་ནི་མི་ལ་རག་ལས། མིའི་ཁ་ན་ལས། མི་ལ་རྟེན་པ་ཡིན་ཏེ། བདག་ཅག་གིས་གང་མི་རྣམས་ལ་མི་ཕན་པ་དང་། མི་བདེ་བར་བྱ་བའི་ཕྱིར་འབད་པ་དང་། དེ་དག་ཉམས་པས་ལྷ་རྣམས་ཀྱང་ཐུབ་པར་འགྱུར་རོ་སྙམ་དུ་དེ་ལྟར་བསམས་ནས། ལྷ་མ་ཡིན་མགུལ་ཕྲེང་དང་། ལྷ་མ་ཡིན་གྱི་དབང་པོ་བརྟན་པ་དག་སེམས་པར་བྱེད་དེ། འདི་ལྟར་མི་རྣམས་ནི་ཁ་ཟས་ལ་རག་ལས་ཤིང་རྟེན་པ་ཡིན་ཏེ། མི་དེ་རྣམས་ཀྱི་ཁ་ཟས་ཆུད་གསན་པ་ལ་འབད་པར་བྱའོ་སྙམ་ནས། དེ་དག་གིས་དེ་ལྟར་ཤེས་ནས་རྒྱ་མཚོའི་ནང་ན་ཀླུ་ཆོས་དང་མི་ལྡན་པ་ཁྲོ་བའི་ཤས་ཆེ་བ། རྟག་ཏུ་གནོད་པའི་བསམ་པ་ཅན་འཁོད་པ་གང་ཡིན་པ་དེ་དག་ལ་སྨྲ་བར་བྱེད་དེ། འདི་ལྟ་སྟེ། ཀླུའི་རྒྱལ་པོ་རབ་འཇོམས་དང་། ཀླུའི་རྒྱལ་པོ་ནག་པོ་དང་། ཀླུའི་རྒྱལ་པོ་བསྒྱིངས་པ་དང་། ཀླུའི་རྒྱལ་པོ་ཧུ་ལུ་ཧུ་ལུ་སྟེ། དེ་དག་ལ་སོགས་པ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་རྣམས་ལ། ལྷ་མ་ཡིན་མགུལ་ཕྲེང་དག་ན་རེ། འདི་ལྟར་ཁྱེད་ཅག་ལ་རག་ལས་པའི་མི་དེ་དག་ནི་ལྷའི་ཕྱོགས་ཡིན་ལ། དེ་དག་གི་སྲོག་ཀྱང་ཁ་ཟས་ཀྱིས་འཚོའོ། །​ཁྱེད་ཅག་ལ་རག་ལས་པ་ཁ་ཟས་ཀྱིས་འཚོ་བའི་མི་དེ་དག་ཇི་ལྟར་མེད་པར་འགྱུར་བ་དེ་ལྟར་གྱིས་ཤིག །​གང་གི་ཕྱིར་འདི་ལྟར་ཁྱེད་ཅག་དང་། ཀླུའི་རྒྱལ་པོ་ནོར་རྒྱས་དང་། འཇོག་པོ་ལ་སོགས་པ་ཤིན་ཏུ་དགྲར་གྱུར་པ་ལྟར་བདག་ཅག་དང་ལྷ་རྣམས་ཀྱང་དེ་ལྟ་བུ་ཡིན་ཏེ། ཁྱེད་ཅག་གིས་བདག་ཅག་གི་གྲོགས་བྱ་བ་དེ་ནི་



The English translation of this folio by 84000 Translating the words of the Buddha can be found at:
https://read.84000.co/translation/toh287.html?part=UT22084-068-021-100528#UT22084-068-021-100528