Degé Kangyur volume 69, F.299.b

པ་དང་ཇི་ལྟ་བ་བཞིན་དུ་བྲལ་བ་མཆིས་ལགས་སམ། དེ་ནས་སྟེང་ན་གནས་པའི་སོའུ་མྱོ་དེ་ལ་བཅོམ་ལྡན་འདས་གསེར་ཐུབ་ཀྱིས་ཟབ་ཅིང་རྒྱ་ཆེ་བ་དང་ལྡན་པའི་གསུང་དབྱངས་ཀྱི་ཁྱད་པར་གྱིས་འཐབ་བྲལ་གྱི་འཇིག་རྟེན་དེ་ཐམས་ཅད་ཇི་ལྟ་བར་ཡོངས་སུ་བཀང་བས་འདི་སྐད་ཅེས་བཀའ་སྩལ་ཏོ། །​སོའུ་མྱོ་ངས་ཇི་ལྟ་བ་བཞིན་དུ་ཆོས་བཤད་པར་བྱ་སྟེ། དང་པོར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་འབའ་ཞིག་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་བྱང་བ་ཚངས་པར་སྤྱོད་པ་ལེགས་པར་བཤད་པར་བྱའོ། །​དེ་ལེགས་པར་རབ་ཏུ་ཡིད་ལ་གྱིས་ལ་ཉོན་ཅིག་དང་ངས་བཤད་ཀྱིས་དེ་སྐད་ཅེས་གསུངས་པ་དང་། ལྷ་དེ་བཅོམ་ལྡན་འདས་ཀྱི་ལྟར་ཉན་ནོ། །​བཅོམ་ལྡན་འདས་ཀྱིས་སོའུ་མྱོ་ལ་སོགས་པའི་ལྷ་དེ་དག་རྣམས་ལ་འདི་སྐད་ཅེས་གསུངས་སོ། །​རྒྱུ་དགུ་དང་རྐྱེན་དགུ་དང་རྒྱུ་མཚན་དགུས་བག་མེད་པ་སྟེན་ཅིང་གོམས་པར་བྱས་ལ་ལན་མང་དུ་བྱས་པས་ནི་བྱིས་པའི་སྐྱེ་བོ་ཐམས་ཅད་འཇོམས་ཤིང་བརླག་པར་འགྱུར་ལ། ལུས་ཞིག་ནས་ཀྱང་ཐབས་མ་ཡིན་པ་ལོག་པར་ལྟུང་བ་དམྱལ་བ་དང་ཡི་དགས་དང་དུད་འགྲོར་སྐྱེ་བར་འགྱུར་བ་དང་། རྒྱུ་གང་ཡོད་པས་སྡུག་བསྔལ་ཡང་ཀུན་དུ་འཕེལ་བར་བྱེད་ཅིང་འཁོར་བའི་འཆིང་བ་ཡིན་པ་དང་མྱ་ངན་ལས་འདས་པའི་མཐར་ཐུག་པར་མི་འགྱུར་བ་དང་། འདོད་ཆགས་དང་མི་འབྲལ་བ་དང་བདེ་བ་མ་ཡིན་པ་དོན་མ་ཡིན་ནོ། །​རྒྱུ་དགུས་བག་མེད་པ་གང་ཞེ་ན། འདི་ལ་བུད་མེད་རྣམས་ལ་ལྟ་བ་ལ་བསྟེན་པར་གྱུར་པ་ཡིན་ཏེ། དང་བ་མ་ཡིན་པའི་ལུས་དང་ངག་དང་ཡིད་རྣམས་ཀྱིས་དབང་པོ་མ་བསྡམས་པ་ཉེ་བར་སྟེན་པར་བྱེད་དོ། །​ཡང་དག་པས་བསྐྱེད་པ་མ་ཡིན་པའི་ལུས་དང་ངག་དང་ཡིད་ཅན་གྱིས་སྤྱོད་ཡུལ་མ་ཡིན་པ་ལ་སྤྱོད་པ་དམ་པའི་ཆོས་རྣམས་ཉན་པའི་རང་བཞིན་ཅན་མ་ཡིན་པ་རྣམས་རྒོད་པ་རྣམས་ཀྱི་དབང་པོ་རྣམས་རྒོད་པས་མ་བསྡམས་པའི་རྒྱུ་གཅིག་ལས་བག་མེད་པའི་བག་མེད་པས་བག་མེད་པ་པོའི་སེམས་ཅན་རྣམས་ལུས་ཀྱིས་ལེགས་པར་སྤྱོད་པར་མི་བྱེད། ངག་གིས་ལེགས་པར་སྤྱོད་པ་མ་ཡིན། ཡིད་ཀྱིས་ལེགས་པར་སྤྱོད་པ་མ་ཡིན་ནོ། །​ལུས་དང་ངག་དང་ཡིད་ཀྱིས་ལེགས་པར་སྤྱོད་པ་མ་ཡིན་པས་ལུས་དང་ངག་དང་ཡིད་ཀྱིས་ཉེས་པར་སྤྱད་པ་



The English translation of this folio by 84000 Translating the words of the Buddha can be found at:
https://read.84000.co/translation/toh287.html?part=UT22084-068-021-101097#UT22084-068-021-101097