།ཇི་ལྟར་དེ་བཞིན་གཤེགས་པ་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་འཐུན་པའི་ཐབས་མཁས་པའི་ཡེ་ཤེས་ཀྱིས་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་བཤད་པ་དེ་བཞིན་དུ་ཐབས་མཁས་པའི་ཡེ་ཤེས་དེས་ཡོངས་སུ་བསྔོའོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བསྔོ་བ་ཁ་ན་མ་ཐོ་བ་མེད་པའོ། །འཇམ་དཔལ་གཞོན་ནུར་གྱུར་པས་ཕུང་པོ་གསུམ་པའི་བསྔོ་བ་འདི་བཤད་པ་ན། བྱང་ཆུབ་སེམས་དཔའ་ལྔ་བརྒྱ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཆོས་ཐམས་ཅད་ལ་དམ་འཆའ་བར་གནས་པ་ཡང་མགུའོ། །ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཡང་འཇམ་དཔལ་གཞོན་ནུར་གྱུར་པས་བཤད་པ་ལ་མངོན་པར་བསྟོད་དོ། །འཕགས་པ་ཕུང་པོ་གསུམ་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ། །༄༅། །འཕགས་པ་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཞེས་བྱ་བའི་ཡོངས་སུ་བསྔོ་བ། སངས་རྒྱས་ཐམས་ཅད་ཀྱི་ཞབས་དང་། ཆོས་དང་། དགེ་སློང་གི་དགེ་འདུན་ལ་མགོ་བོས་ཕྱག་འཚལ་ལོ། །ཕྱོགས་བཅུ་བརྗོད་ཀྱིས་མི་ལང་བའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་དང་། ས་ཆེན་པོར་ཆུད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བདག་ལ་དགོངས་སུ་གསོལ། གང་བདག་གིས་སྐྱེ་བ་འདི་དང་། སྐྱེ་བ་གཞན་དུ་ན་ཁྱིམ་པའམ། རབ་ཏུ་བྱུང་བ་ཇི་ཙམ་དུ་འཁོར་བའི་སྔོན་གྱི་མཐའ་མ་འཚལ་བ་ནས། སྡིག་པ་མི་དགེ་བའི་ལས་བགྱིས་ཤིང་བསགས་པ། ལུས་དང་། ངག་དང་། ཡིད་ཀྱིས་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་ཤེས་པའམ། མི་ཤེས་པའམ། བསམས་པའམ། མ་བསམས་པའམ། དྲན་པའམ། མི་དྲན་པའམ། འདོད་ཆགས་ཀྱི་དབང་ངམ། ཞེ་སྡང་གི་དབང་ངམ། གཏི་མུག་གི་དབང་ངམ། དགེ་བའི་བཤེས་གཉེན་མ་ལགས་པ་དང་འབྲེལ་བའི་དབང་ངམ། མི་ཤེས་པའི་དབང་ངམ། ཡུལ་གྱི་དབང་ངམ།