སྤྲིན་ཆེན་པོའི་སྙིང་པོ་སྤྲིན་གྱི་ཤུགས་ཅན་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོ་བརྟན་པའི་བློ་གྲོས་ཅན་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོའི་ཆུའི་རྩེད་མོ་ལས་བྱུང་བ་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོའི་ཆུ་ཤེས་ཉེན་ཅན་གྱི་བློ་གྲོས་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོའི་ཆུ་སྲུང་བ་ཐམས་ཅད་དུ་མཉམ་པ་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོའི་ཀུ་ཤ་དང་ར་བ་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོ་མདངས་དཀར་བ་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོ་འགྲོ་བའི་གནས་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོ་ཆུའི་རྣམ་པའི་བློ་གྲོས་ཅན་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོ་ཆུའི་རྩ་མོ་བསྒྲེང་ཞིང་བརྩེགས་པ་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོ་ཆུ་རྒྱུ་བར་གྱུར་པའི་བློ་གྲོས་ཅན་ཞེས་བྱ་བའི་ཏིང་ངེ་འཛིན་དང་། སྤྲིན་ཆེན་པོའི་སྙིང་པོ་སྤྲིན་གྱི་བདེན་པའི་མཚོའི་ངང་པའི་རྒྱལ་པོའི་སྟབས་ལེགས་པའི་བློ་གྲོས་ཅན་ཞེས་བྱ་བའི་ཏིང་ངེ་འཛིན་དང་། ཏིང་ངེ་འཛིན་སྔ་མ་གང་ཡིན་པ་དེ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཏིང་ངེ་འཛིན་གྱི་རྒྱ་མཚོར་ཡང་འགྱུར་རོ། །ཏིང་ངེ་འཛིན་ཡང་དག་པར་སོགས་པར་ཡང་འགྱུར་རོ། །ཐོས་པའི་རྒྱ་མཚོར་ཡང་འགྱུར་རོ། །ཐོས་པ་ཡང་དག་པར་སོགས་པར་ཡང་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་སོམ་ཉི་མི་ཟ་ཞིང་། ཡིད་གཉིས་མེད་དེ། ཐེ་ཙོམ་ཟ་བར་ཡང་མི་འགྱུར་རོ། །མི་ཁོམ་པ་རྣམས་སུ་སྐྱེ་བར་ཡང་མི་འགྱུར་རོ། །ཚེ་རབས་དྲན་པར་ཡང་འགྱུར་རོ། །འཁོར་བའི་ལས་ཀྱི་ཞིང་གི་རྒྱ་མཚོ་ལ་སྲེད་པར་ཡང་འགྱུར་རོ། །ཚེ་རབས་ཐམས་ཅད་དུ་ཐ་ན་རྨི་ལམ་ན་ཡང་སངས་རྒྱས་མཐོང་བ་དང་མི་འབྲལ་བར་ཡང་འགྱུར་རོ། །དེ་དག་གི་དགེ་བའི་ཆོས་རྣམས་ལ་བར་ཆད་བྱ་བའི་ཕྱིར་བདུད་སྡིག་ཅན་གླགས་ལྟ་བ་དང་། སྐབས་ཚོལ་བས་གླགས་རྙེད་པར་ཡང་མི་འགྱུར་རོ། །ང་རྒྱལ་ཆོམས་པར་ཡང་འགྱུར་རོ། །གཟུངས་ཐོབ་པར་ཡང་འགྱུར་རོ། །དེ་བཞིན་གཤེགས་པའི་ལྡེམ་པོ་ངག་དང་དཔྱོད་པ་ལ་མཁས་པར་ཡང་འགྱུར་རོ། །ཆོས་ཐམས་ཅད་ཀྱི་གསང་བའི་སྒོར་འཇུག་པར་ཡང་འགྱུར་རོ། །དེ་བཞིན་གཤེགས་པའི་གཏེར་ཡང་དག་པར་སྟོན་པར་ཡང་འགྱུར་རོ།