བཙུན་པ་རབ་འབྱོར་སེམས་ཅན་འཁོར་ལོས་སྒྱུར་བའི་རྒྱལ་སྲིད་ཀྱི་དགའ་བ་ལ་མོས་པ་དག་ཀྱང་མཆིས་སོ། །བློན་པོ་དང་། གྲོང་རྡལ་གྱི་མི་དང་། ཡུལ་གྱི་མི་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་གཟུགས་དང་། སྒྲ་དང་། དྲི་དང་། རོ་དང་། རེག་པའི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་མེ་ཏོག་དང་། བདུག་པ་དང་། སྤོས་དང་། མེ་ཏོག །ཕྲེང་བ་དང་། བྱུག་པ་དང་། ཕྱེ་མ་དང་། གདུགས་དང་། རྒྱལ་མཚན་དང་། བ་དན་དང་། རྔ་ཡབ་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་གསེར་དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། ཤེལ་དང་། མུ་ཏིག་དམར་པོ་དང་། བྱི་རུ་དང་། རྡོའི་སྙིང་པོ་དང་། སྤུག་དང་རིན་པོ་ཆེ་རྣམ་པ་སྣ་ཚོགས་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་རྔ་བོ་ཆེ་དང་། རྫ་རྔ་དང་། དུང་དང་། ཁར་རྔ་དང་། པི་བང་དང་། གླིང་བུ་དང་། རོལ་མོའི་སྒྲ་རྣམ་པ་སྣ་ཚོགས་ཀྱི་དགའ་བ་ལ་མོས་པ་དག་ཀྱང་མཆིས་ཏེ། བཙུན་པ་རབ་འབྱོར་སེམས་ཅན་དེ་དག་ལ་ཡང་བདག་གིས་བསམ་པ་ཐམས་ཅད་དང་། དགའ་བ་དང་། རྩེད་མོ་ཐམས་ཅད་སྟོབས་པར་བགྱིད་དེ། བསྟབས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཛུད་པར་བགྱིད་དོ། །རབ་འབྱོར་གྱིས་སྨྲས་པ། ཆེ་ཞེ་འདོད་པའི་ཡོན་ཏན་ལྔ་ནི་འཕགས་པའི་ལམ་གྱི་བར་དུ་གཅོད་པ་ཡིན་ན། ཇི་ལྟར་དེ་དག་བསྟབས་པས་འདུལ་བར་འགྱུར་ཏེ། གནས་འདི་ཕན་ཚུན་མི་འཐུན་པ་ཡིན་ནོ། །ཆེ་ཞེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཕགས་པའི་ལམ་ལ་བར་དུ་གཅོད་པར་བྱེད་པའི་ཆོས་གང་ཁོ་ན་ཡིན་པ་དེ་དག་ཉིད་ཀྱིས་སེམས་ཅན་རྣམས་འདུལ་བར་བྱེད་པ་ནི་དཀའ་བར་བྱེད་པ་སྟེ་ངོ་མཚར་ཏོ།། །།བམ་པོ་གཉིས་པ་སྟེ་ཐ་མ། དེ་ནས་བུད་མེད་དེས་དགའ་བ་བཀོད་པའི་ཐབས་ལ་མཁས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པའི་ཚོང་དཔོན་གྱི་བུ་གཉིས་ཆོས་མཉན་པའི་ཕྱིར་སྒོ་གང་དེར་འདུས་པར་གྱུར་ཏེ། དེ་གཉིས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ།