Degé Kangyur volume 60, F.245.a

།བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ད་ལྟར་གང་ན་མཆིས་བཅོམ་ལྡན་འདས་བདག་དང་འཁོར་མང་པོ་འདི་རྣམས་ཀྱང་སྐྱེས་བུ་དམ་པ་དེས་ཆོས་བསྟན་པར་རབ་ཏུ་འཚལ་ལོ། །​བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་སུ་སངས་རྒྱས་ཀྱི་ཞིང་སྟོང་ཕྲག་བཅོ་བརྒྱད་འདས་པ་ན། འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་ཅེས་བྱ་བ་ད་ལྟར་བཞུགས་པ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །འཇམ་དཔལ་གཞོན་ནུར་གྱུར་པའང་ད་ལྟར་དེ་ན་འདུག་གོ། །​དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་གིས་འདི་སྐད་ཅེས་གསོལ་ཏོ། །​བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཅི་ནས་དེ་མཚན་མ་རིག་པས་འདིར་མཆི་བར་སེམས་པ་དེ་ལྟ་བུའི་མཚན་མ་ཞིག་མཛད་ན་ལེགས་སོ། །​དེ་ཅིའི་སླད་དུ་ཞེ་ན། བཅོམ་ལྡན་འདས་ཇི་ལྟར་འཇམ་དཔལ་གཞོན་ནུར་གྱུར་པ་ལས་ཐོས་པ་ལྟ་བུར་ཉན་ཐོས་དང་རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་དམིགས་པ་ཅན་རྣམས་ལས། དེ་ལྟ་བུའི་ཆོས་བསྟན་པ་མི་ཐོས་ཏེ། དེ་བཞིན་གཤེགས་པ་མ་གཏོགས་པར་གཞན་སུ་ཡང་དེ་ལྟ་བུར་ཆོས་སྟོན་མི་ནུས་སོ། །​བཅོམ་ལྡན་འདས་ནམ་འཇམ་དཔལ་ཆོས་སྟོན་པ་དེ་ན་བདུད་ཀྱི་ཁང་པ་ཐམས་ཅད་མོག་མོག་པོར་འགྱུར་རོ། །​བདུད་ཐམས་ཅད་ཀྱིས་ཀྱང་གླགས་མི་རྙེད་དོ། །ཕ་རོལ་རྒོལ་བ་ཐམས་ཅད་ཀྱང་ཤིན་ཏུ་ཚར་ཆོད་པར་འགྱུར་རོ། །​དམིགས་པ་ཅན་རྣམས་ཀྱང་དམིགས་པ་མ་མཆིས་པར་འགྱུར་རོ། །​དམ་པའི་ཆོས་ཀྱང་ཡུན་རིང་དུ་གནས་པར་འགྱུར་རོ། །​དེ་བཞིན་གཤེགས་པ་ཡང་དེ་ལ་རྗེས་སུ་ཡི་རང་ཞིང་རབ་ཏུ་གཟུང་བ་མཛད་དོ། །​དེ་ནས་བཅོམ་ལྡན་འདས་ཀྱིས་ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་གསོལ་བ་འདེབས་པར་མཁྱེན་ནས། ཞལ་གྱི་མཛོད་སྤུ་ནས་འོད་ཟེར་གཅིག་བཏང་སྟེ། དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་སྣང་བར་བྱས་ནས། སངས་རྒྱས་ཀྱི་ཞིང་སྟོང་ཕྲག་བཅོ་བརྒྱད་པོ་དེ་དག་ལས་ཐལ་ཏེ།



The English translation of this folio by 84000 - Translating the words of the Buddha can be found at:
https://read.84000.co/translation/toh179.html?part=UT22084-060-008-244#UT22084-060-008-244