ཇི་ལྟར་ན་ཉོན་མོངས་པ་ཡོངས་སུ་ཤེས་པ་ཡིན། འཇམ་དཔལ་གྱིས་སྨྲས་པ། དོན་དམ་པར་ན་ཆོས་ཐམས་ཅད་མ་བྱུང་མ་སྐྱེས་དངོས་པོ་མེད་པ་ཡིན་ན་ཀུན་རྫོབ་ཏུ་མེད་པ་ལ་ཕྱིན་ཅི་ལོག་ཏུ་གྱུར་ཏེ། མེད་པ་ལས་ཕྱིན་ཅི་ལོག་ཏུ་གྱུར་པ་དེ་ལས་ཀུན་ཏུ་རྟོག་པ་དང་། རྣམ་པར་རྟོག་པའོ། །ཀུན་ཏུ་རྟོག་པ་དང་། རྣམ་པར་རྟོག་པ་དེ་ལས་ཚུལ་བཞིན་མ་ཡིན་པ་ཡིད་ལ་བྱེད་པའོ། །ཚུལ་བཞིན་མ་ཡིན་པ་ཡིད་ལ་བྱེད་པ་དེ་ལས་བདག་ཏུ་སྒྲོ་འདོགས་པའོ། །བདག་ཏུ་སྒྲོ་འདོགས་པ་དེ་ལས་ལྟ་བ་ཀུན་ནས་ལྡང་བའོ། །ལྟ་བ་ཀུན་ནས་ལྡང་བ་དེ་ལས་ཉོན་མོངས་པ་རྣམས་འབྱུང་ངོ་། །གང་ཡང་ལྷའི་བུ་དོན་དམ་པར་ན་ཆོས་ཐམས་ཅད་ཤིན་ཏུ་མ་སྐྱེས་མ་བྱུང་དངོས་པོ་མེད་པར་མི་ཤེས་པའི་ཚུལ་གྱིས་རབ་ཏུ་ཤེས་པ་དེ་ནི་དོན་དམ་པར་ན་ཕྱིན་ཅི་མ་ལོག་པའོ། །གང་དོན་དམ་པར་ན་ཕྱིན་ཅི་མ་ལོག་པ་དེ་ནི་རྟོག་པ་མེད་ཅིང་རྣམ་པར་མི་རྟོག་པའོ། །གང་རྟོག་པ་མེད་ཅིང་རྣམ་པར་མི་རྟོག་པ་དེ་ནི་ཚུལ་བཞིན་རབ་ཏུ་སྦྱོར་བའོ། །གང་ཚུལ་བཞིན་རབ་ཏུ་སྦྱོར་བ་དེ་ལ་དོན་དམ་པར་ན་བདག་ཏུ་སྒྲོ་འདོགས་པ་མི་འབྱུང་ངོ་། །གང་ལ་དོན་དམ་པར་ན་བདག་ཏུ་སྒྲོ་འདོགས་པ་མི་འབྱུང་བ་དེ་ལ་ལྟ་བ་ཀུན་ནས་ལྡང་བར་མི་འགྱུར་བ་ནས་དོན་དམ་པར་ན་མྱ་ངན་ལས་འདས་པར་ལྟ་བ་ཀུན་ནས་ལྡང་བར་ཡང་མི་འགྱུར་ཏེ། དེ་ལྟར་མ་སྐྱེས་པ་ལ་སྤྱོད་པ་དེ་ནི་ཉོན་མོངས་པ་ཤིན་ཏུ་རྣམ་པར་དུལ་བར་མི་ལྟ་བའི་ཚུལ་གྱིས་བགྱི་སྟེ། ལྷའི་བུ་འདི་ནི་ཉོན་མོངས་པ་འདུལ་བ་ཞེས་བྱའོ། །ལྷའི་བུ་ནམ་ཉོན་མོངས་པ་རྣམས་ལ་སྣང་བ་མེད་པའི་ཤེས་རབ་དང་ཡེ་ཤེས་ཀྱིས་དོན་དམ་པར་ན་ཤིན་ཏུ་སྟོང་པ་དང་། ཤིན་ཏུ་མཚན་མ་མེད་པ་དང་། ཤིན་ཏུ་སྨོན་པ་མེད་དོ། །དོན་དམ་པར་ན་ཤིན་ཏུ་མ་སྐྱེས་མ་བྱུང་། དངོས་པོ་མེད་པར་མི་ཤེས་པའི་ཚུལ་གྱིས་རབ་ཏུ་ཤེས་ན། ལྷའི་བུ་དེའི་ཚེ་མི་ཤེས་པའི་ཚུལ་གྱིས་ཉོན་མོངས་པ་རྣམས་ཡོངས་སུ་ཤེས་པ་ཡིན་ནོ། །ལྷའི་བུ་འདི་ལྟ་སྟེ། དཔེར་ན་སྦྲུལ་ཁ་གདུག་པའི་རིག་སྔགས་འདོན་པ་དེས་ནི་སྦྲུལ་ཁ་གདུག་པའི་གདུག་པ་རབ་ཏུ་ཞི་བར་བྱེད་དོ། །ལྷའི་བུ་དེ་བཞིན་དུ་གང་ཉོན་མོངས་པ་རྣམས་ཀྱི་རིགས་རབ་ཏུ་ཤེས་པ་དེའི་ཉོན་མོངས་པ་རྣམས་ཤིན་ཏུ་མི་དམིགས་པའི་ཚུལ་གྱིས་རབ་ཏུ་ཞི་བར་འགྱུར་རོ།