དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་འོད་དེ་དག་ཕྱིར་བརྟུལ་ཏོ། །འོད་དེའི་ཕྱིར་བརྟུལ་མ་ཐག་ཏུ་འཁོར་དེ་ཐམས་ཅད་སྤྱོད་ལམ་སྔ་མ་ཇི་ལྟ་བ་བཞིན་དུ་སྣང་ངོ་། །བཅོམ་ལྡན་འདས་ཀྱང་སྔ་མ་ཁོ་ན་བཞིན་དུ་སེང་གེའི་ཁྲི་པད་མོ་ཅན་ལ་བཞུགས་པར་སྣང་ངོ་། །དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་འདི་བཞི་གང་ནས་མཆིས། བྱང་ཆུབ་སེམས་དཔའ་དེ་བཞིས་སྨྲས་པ། ཁོ་བོ་ཅག་འོག་གི་འཇིག་རྟེན་གྱི་ཁམས་ནས་འོངས་སོ། །སྨྲས་པ་འཇིག་རྟེན་གྱི་ཁམས་དེ་ནི་རིན་པོ་ཆེ་ཐམས་ཅད་སྟོན་པ་ཞེས་བྱའོ། །སྨྲས་པ་དེ་ན་དེ་བཞིན་གཤེགས་པའི་མཚན་ཅི་ཞེས་བྱ་བ་ཞིག་ཆོས་འཆད། སྨྲས་པ། དེ་བཞིན་གཤེགས་པ་དེའི་མཚན་རིན་པོ་ཆེ་གདུགས་གཅིག་པ་ཞེས་བྱའོ། །སྨྲས་པ། འཇིག་རྟེན་གྱི་ཁམས་དེ་འདི་ནས་ཇི་སྲིད་ཅིག་ཡོད། སྨྲས་པ། བཅོམ་ལྡན་འདས་མཁྱེན་པས་མཁྱེན་ཏོ། །སྨྲས་པ། ཁྱེད་རྣམས་འདིར་ཅི་ལ་འོངས། སྨྲས་པ། བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འོད་བཏང་ནས་འོད་དེས་ཁོ་བོ་ཅག་ལ་རེག་སྟེ། རེག་མ་ཐག་ཏུ་བཅོམ་ལྡན་འདས་ཤཱཀྱ་ཐུབ་པའི་མཚན་དང་། བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱི་མིང་ཐོས་ནས། བཅོམ་ལྡན་འདས་དང་སྐྱེས་བུ་དམ་པ་འདི་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་བདག་ཅག་འདིར་འོངས་སོ། །དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་རིན་པོ་ཆེ་ཐམས་ཅད་སྟོན་པ་ཞེས་བགྱི་བ་བཅོམ་ལྡན་འདས་རིན་པོ་ཆེ་གདུགས་གཅིག་པ་དེ་བཞིན་གཤེགས་པའི་སངས་རྒྱས་ཀྱི་ཞིང་དེ་ཇི་སྲིད་ཅིག་ན་མཆིས། བཅོམ་ལྡན་འདས་ཀྱིས་བཀའ་སྩལ་པ། འཇིག་རྟེན་གྱི་ཁམས་འདི་ནས་འོག་ཏུ་སངས་རྒྱས་ཀྱི་ཞིང་གང་གཱའི་ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་འདས་པ་ན་བྱང་ཆུབ་སེམས་དཔའ་འདི་བཞི་གང་ནས་འདིར་འོངས་པའི་འཇིག་རྟེན་གྱི་ཁམས་རིན་པོ་ཆེ་ཐམས་ཅད་སྟོན་པ་བཅོམ་ལྡན་འདས་རིན་པོ་ཆེ་གདུགས་གཅིག་པ་དེ་བཞིན་གཤེགས་པའི་སངས་རྒྱས་ཀྱི་ཞིང་ཡོད་དོ།