Degé Kangyur volume 58, F.282.a

ཡན་ལག་དང་ཉིང་ལག་ཐམས་ཅད་བཅད་ཀྱང་མི་འཁྲུགས་ཤིང་གནོད་སེམས་མེད་པས་བཟོད་པར་བལྟ་བ་དང་། བརླང་བ་མེད་པས་བཟོད་པར་བལྟ་བ་དང་། གཤེ་བ་ལ་སླར་མི་གཤེ་བས་བཟོད་པར་བལྟ་བ་དང་། བསམ་པ་དག་པས་བཟོད་པར་བལྟ་བ་དང་། རྙོག་པའི་སེམས་མེད་པས་བཟོད་པར་བལྟ་བ་དང་། དཀྲུགས་པའི་སེམས་མེད་པས་བཟོད་པར་བལྟ་བ་དང་། གཞན་གྱི་སེམས་བསྲུང་བས་བཟོད་པར་བལྟ་བ་དང་། སེམས་ཅན་ཐམས་ཅད་ལ་ཕན་པའི་དངོས་པོས་བཟོད་པར་བལྟ་བ་དང་། སྙིང་རྗེའི་བློ་དང་ལྡན་པས་བཟོད་པར་བལྟ་བ་དང་། ང་རྒྱལ་མེད་པས་བཟོད་པར་བལྟ་བ་དང་། སེམས་ཅན་ཐམས་ཅད་ལ་བརྙས་ཐབས་མེད་ཅིང་འདུད་པས་བཟོད་པར་བལྟ་བ་དང་། འབར་བ་མེད་པས་བཟོད་པར་བལྟ་བ་དང་། ཉེ་བར་ཞི་བས་བཟོད་པར་བལྟ་བ་དང་། ངེས་པར་སེམས་པས་བཟོད་པར་བལྟ་བ་དང་། བདག་གི་འཁྲུལ་པ་ལ་སོ་སོར་རྟོག་པས་བཟོད་པར་བལྟ་བ་དང་། གཞན་གྱི་འཁྲུལ་པའི་སྐྱོན་ལ་མི་ལྟ་བས་བཟོད་པར་བལྟ་བ་དང་། སངས་རྒྱས་རྗེས་སུ་དྲན་པ་བསྒོམས་པས་བཟོད་པར་བལྟ་བ་དང་། ཆོས་ལ་སེམས་སྦྱོར་བས་བཟོད་པར་བལྟ་བ་དང་། དང་བའི་དངོས་པོས་བཟོད་པར་བལྟ་བ་དང་། སེམས་ལ་གདུང་བ་མེད་པས་བཟོད་པར་བལྟ་བ་དང་། བཞིན་འཛུམ་ཞིང་ཁྲོ་གཉེར་མེད་པས་བཟོད་པར་བལྟ་བ་དང་། གསོང་པོ་སྨྲ་བས་བཟོད་པར་བལྟ་བ་དང་། རྣམ་པར་ཐར་པའི་སྒོ་གསུམ་ལ་དངང་བ་མེད་པས་བཟོད་པར་བལྟ་བ་དང་། མ་སྐྱེས་པ་དང་མ་བྱུང་བ་ལ་མོས་པས་བཟོད་པར་བལྟ་བ་དང་། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པས་བཟོད་པར་བལྟ་བ་སྟེ། མིའམ་ཅིའི་བདག་པོ་རྣམ་པ་སུམ་ཅུ་རྩ་གཉིས་པོ་འདི་དག་གིས། བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ་རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །​སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་སངས་རྒྱས་ཀྱི་རིགས་རྒྱུན་མི་འཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh157.html?part=UT22084-058-006-1576#UT22084-058-006-1576