Degé Kangyur volume 58, F.302.b

དེའི་ཚེ་དེའི་དུས་ན་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོས་འཛིན་ཅེས་བྱ་བ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་སྟེ། དེའི་སླས་ནི་སྟོང་ཕྲག་བཞི་བཅུ་ཡོད་དོ། །​དེའི་བུ་ནི་སྟོང་ཐམ་པ་ཡོད་དེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་ཅན་ཕ་རོལ་གྱི་སྡེ་རབ་ཏུ་འཇོམས་པ་ཤ་སྟག་གོ། །​རིགས་ཀྱི་བུ་རྒྱལ་པོས་འཛིན་དེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་དང་། བྱང་ཆུབ་སེམས་དཔའ་བྱེ་བ་ཕྲག་དྲུག་ཅུ་ལ་ལོ་བྱེ་བ་ཐམ་པར་ཡིད་དུ་འོང་བའི་ཆོས་གོས་དང་། ཞལ་ཟས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་དང་། བདེ་བར་སྦྱར་བ་བདེ་བ་ལ་རེག་པར་གནས་པར་བྱ་བ་ཐམས་ཅད་ཀྱིས་བསྙེན་བཀུར་བྱས་ནས་དེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལ་མཆོད་པ་དཔག་ཏུ་མེད་པ་བྱས་ཏེ། དགེ་བའི་རྩ་བས་ཉེ་བར་བརྟན་ནས་བུད་མེད་བཞི་སྟོང་པོ་དེ་དག་དང་། བུ་སྟོང་པོ་དེ་དག་དང་། སྲོག་ཆགས་བརྒྱད་ཁྲི་བཞི་སྟོང་དང་ལྷན་ཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །​དེས་བྱང་ཆུབ་ཏུ་སེམས་བསྐྱེད་ནས་ཀྱང་ལོ་བྱེ་བར་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལ་བསྙེན་བཀུར་བྱས་སོ། །​དེ་དུས་གཞན་ཞིག་ན་བུ་ཐུ་བོ་བརྟུལ་ཞུགས་ཡོངས་སུ་དག་པ་ཞེས་བྱ་བ་རྒྱལ་པོར་བཅུག་ནས་རྒྱལ་སྲིད་ཐམས་ཅད་བོར་ཏེ། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་བཅོམ་ལྡན་འདས་དེའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །​དེ་ན་རྒྱལ་པོའི་བུ་དེ་དག་གིས་ཀྱང་རིམ་གྱིས་བུ་ཐུ་བོ་རེ་རེ་རྒྱལ་པོར་བཅུག་ནས་ཕའི་རྗེས་སུ་རབ་ཏུ་བྱུང་བར་གྱུར་ཏོ། །​རིགས་ཀྱི་བུ་དེ་ལྟར་ན་རྣམ་གྲངས་འདིས་དེ་བཞིན་གཤེགས་པ་དེའི་ཚེའི་ཚད་རིང་བར་གྱུར་ཏོ། །​རྒྱལ་པོ་གཞོན་ནུ་དེ་དག་ཐམས་ཅད་དེ་བཞིན་གཤེགས་པ་དེ་ལས་རབ་ཏུ་བྱུང་ནས་རྒྱལ་བུ་གཞོན་ནུ་ཐ་ཆུང་ས་སྙིང་རྗེའི་བློ་ཞེས་བྱ་བ་གཅིག་པུ་མ་གཏོགས་ཏེ། དེ་ནི་ཆོས་ཀྱིས་རྒྱལ་སྲིད་བྱེད་པ་ཆད་པ་མེད་པ་དང་། མཚོན་ཆ་མེད་པར་ཆོས་དང་འཐུན་པར་དབང་བྱེད་དུ་བཅུག་གོ། །​རིགས་ཀྱི་བུ་



The English translation of this folio by 84000 Translating the words of the Buddha can be found at:
https://read.84000.co/translation/toh157.html?part=UT22084-058-006-1617#UT22084-058-006-1617