Degé Kangyur volume 57, F.149.a

དཔའ་དེ་དག་གིས་བྱང་ཆུབ་སེམས་དཔའི་བསྟོད་པ་ཚད་མེད་པ་དག་གིས་བཅོམ་ལྡན་འདས་ལ་མངོན་པར་བསྟོད་ནས་བྱང་ཕྱོགས་ལོགས་སུ་གནས་ཏེ། རང་གི་རྫུ་འཕྲུལ་གྱི་སྟོབས་ཀྱིས་སྤྲུལ་པའི་རང་རང་གི་སྟན་དག་ལ་འཁོད་དོ། །​དེ་ནས་ཤར་དང་ལྷོའི་མཚམས་ཕྱོགས་ན་དེ་བཞིན་གཤེགས་པ་མྱ་ངན་ཐམས་ཅད་བཅོམ་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མྱ་ངན་མེད་པ་ན། བྱང་ཆུབ་སེམས་དཔའ་ཀུན་ནས་སྣང་བ་ཞེས་བྱ་བ་འོད་དེས་བསྐུལ་མ་ཐག་ཏུ། བྱང་ཆུབ་སེམས་དཔའ་གང་གཱའི་ཀླུང་བཅུའི་བྱེ་མ་སྙེད་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་སངས་རྒྱས་ཀྱི་ཞིང་དེ་ནས་མི་སྣང་བར་གྱུར་ནས་སྐད་ཅིག་ཐང་ཅིག་ཡུད་ཙམ་དེ་ལ་འཇིག་རྟེན་གྱི་ཁམས་མི་མཇེད་འདིར་ཕྱིན་ཏེ། འཁོར་གྱི་ཁྱམས་རིན་པོ་ཆེ་བཀོད་པར་བཅོམ་ལྡན་འདས་ཀྱི་སྤྱན་སྔར་འདུག་ནས། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་ཁྲི་བསྐོར་བ་བྱས་ནས་བཅོམ་ལྡན་འདས་ལ་མཆོད་པའི་ལས་བྱེད་ཅིང་རིན་པོ་ཆེའི་དྲ་བས་བཅོམ་ལྡན་འདས་ལ་མངོན་པར་བཀབ་སྟེ། ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །སྤུ་ཡིས་མཐའ་དབུང་མ་མཆིས་པ་ཡི་ཞིང་འཛིན་ཀྱང་། །​སེམས་ཅན་རྣམས་ལ་མི་གནོད་ཞིང་ལ་མི་གནོད་པས། །​མིག་མེད་རྣམས་ཀྱིས་རྒྱལ་བའི་སྤྱོད་ཡུལ་འཚལ་བར་དཀའ། །​སངས་རྒྱས་སྲས་ནི་རྒྱལ་བའི་བྱིན་གྱིས་ཡང་དག་འཚལ། །​ཞིང་གཅིག་ཕྱོགས་ལ་ཞིང་མང་རབ་འབྱམ་སྟོན་མཛད་དེ། །​ཀུན་ཏུ་བསྟན་ཀྱང་རྣམ་པར་འཕེལ་དང་འགྲིབ་མ་མཆིས། །​བསམ་པ་ཆེན་པོ་དག་ལྡན་ཅི་འདྲར་གྱུར་དེ་ལ། །​དཔག་མེད་རྫུ་འཕྲུལ་རྣམ་པར་སྤྲུལ་པས་དེ་སྟོན་ཏོ། །​དེ་ནས་བྱང་ཆུབ་སེམས་དཔའ་དེ་དག་གིས་བྱང་ཆུབ་སེམས་དཔའི་བསྟོད་པ་ཚད་མེད་པ་དག་གིས་བཅོམ་ལྡན་འདས་ལ་མངོན་པར་བསྟོད་ནས་ཤར་དང་ལྷོའི་ཕྱོགས་མཚམས་ལོགས་སུ་གནས་ཏེ། རང་གི་རྫུ་འཕྲུལ་གྱི་སྟོབས་ཀྱིས་སྤྲུལ་པའི་རང་རང་གི་སྟན་དག་ལ་འཁོད་དོ། །​དེ་ནས་ལྷོ་དང་ནུབ་ཀྱི་མཚམས་ཕྱོགས་ན་དེ་བཞིན་གཤེགས་པ་ཐུགས་རྗེ་ཆེན་པོས་སེམས་



The English translation of this folio by 84000 Translating the words of the Buddha can be found at:
https://read.84000.co/translation/toh147.html?part=UT22084-057-006-1379#UT22084-057-006-1379