བཅོམ་ལྡན་འདས་ལ་མཆོད་པའི་ལས་བྱེད་ཅིང་གསེར་གྱི་དྲ་བས་བཅོམ་ལྡན་འདས་ལ་མངོན་པར་བཀབ་སྟེ། ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །བཅོམ་ལྡན་ཐུགས་རྗེའི་སྤྲིན་གྱིས་འཇིག་རྟེན་རྒྱས་བཀང་ནས། །འོད་ཀྱི་གློག་ཕྱུང་སྟོང་པ་བདག་མེད་སྒྲ་བསྒྲགས་ཏེ། །ཡན་ལག་བརྒྱད་པའི་ལམ་གྱི་ཆུ་ཡིས་ཞི་མཛད་ཅིང་། །དཀར་པོའི་སྟོབས་དབང་ནགས་ཚལ་གེལ་པ་འཕེལ་བར་མཛད། །བདེ་གཤེགས་ཤེས་རབ་འོད་ཀྱིས་གཏི་མུག་མུན་བསལ་ནས། །རིང་ནས་སྲིད་མཚོར་གཉིད་ལོག་སེམས་ཅན་སད་མཛད་དེ། །ལམ་ཡང་བསྟན་ཅིང་སྲེད་པ་དག་ཀྱང་སྐམས་པར་མཛད། །ཐར་པའི་གྲོང་གནས་རྣམས་ཀྱི་མིག་ཀྱང་རྣམ་པར་སྦྱོང་། དེ་ནས་བྱང་ཆུབ་སེམས་དཔའ་དེ་དག་གིས། བྱང་ཆུབ་སེམས་དཔའི་བསྟོད་པ་ཚད་མེད་པ་དག་གིས་བཅོམ་ལྡན་འདས་ལ་མངོན་པར་བསྟོད་ནས་ལྷོ་ཕྱོགས་ལོགས་སུ་གནས་ཏེ། རང་གི་རྫུ་འཕྲུལ་གྱི་སྟོབས་ཀྱིས་སྤྲུལ་པའི་རང་རང་གི་སྟན་དག་ལ་འཁོད་དོ། །དེ་ནས་ནུབ་ཕྱོགས་ན་དེ་བཞིན་གཤེགས་པ་ཀུན་ནས་སྣང་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྣང་བ་དང་ལྡན་པ་ན། བྱང་ཆུབ་སེམས་དཔའ་སྒྲ་བསྒྲགས་པའི་སྟོབས་ཀྱི་རྒྱལ་པོ་ཞེས་བྱ་བ་འོད་དེས་བསྐུལ་མ་ཐག་ཏུ་བྱང་ཆུབ་སེམས་དཔའ་གང་གཱའི་ཀླུང་བཅུའི་བྱེ་མ་སྙེད་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་སངས་རྒྱས་ཀྱི་ཞིང་དེ་ནས་མི་སྣང་བར་གྱུར་ནས་སྐད་ཅིག་ཐང་ཅིག་ཡུད་ཙམ་དེ་ལ་འཇིག་རྟེན་གྱི་ཁམས་མི་མཇེད་འདིར་ཕྱིན་ཏེ། འཁོར་གྱི་ཁྱམས་རིན་པོ་ཆེ་བཀོད་པར་བཅོམ་ལྡན་འདས་ཀྱི་སྤྱན་སྔར་འདུག་ནས་དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་ཁྲི་བསྐོར་བ་བྱས་ནས་བཅོམ་ལྡན་འདས་ལ་མཆོད་པའི་ལས་བྱེད་ཅིང་ནོར་བུ་མུ་ཏིག་གི་དོ་ཤལ་གྱི་ཕྲེང་བའི་དྲ་བས་བཅོམ་ལྡན་འདས་ལ་མངོན་པར་བཀབ་སྟེ། ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །ཁྱོད་ཀྱི་སྐུ་ཡི་འཕྲིན་ལས་ནམ་མཁའི་ཁམས་འདྲ་ཞིང་། །སྨོན་ལམ་དགེ་བས་དག་པ་བྱེ་བ་ཕྲག་མང་ལྡན། །དྲི་མེད་རྣམ་པར་དག་ཅིང་ཟག་པ་མེད་པ་དེས། །