།གང་དག་དགེ་བསགས་བསོད་ནམས་བྱས་གྱུར་པ། །དེ་དག་རྒྱུ་ཡི་སྟོབས་ཀྱིས་འདི་ལ་དད། །གང་དག་ཉན་ཐོས་ཐེག་པའང་ཡིད་ཆེས་པའི། །མི་དག་མི་ཡི་འཇིག་རྟེན་རྣམས་ན་ཉུང་། །དེ་བས་རྐྱེན་གྱི་ཐེག་པར་རབ་ཏུ་ཉུང་། །ཐེག་པ་ཆེན་པོར་དེ་དག་དེ་བས་ཉུང་། །ཐེག་པ་ཆེ་ལ་ཞུགས་པ་དེ་དཀོན་ཏེ། །གང་དག་ཆོས་འདིར་དད་པའང་རབ་དཀོན་ན། །འཇུག་ཅིང་འཛིན་པ་སྨོས་ཀྱང་ཅི་དགོས་ཏེ། །གང་དག་དེ་བཞིན་སྒྲུབ་པ་སྨོས་ཅི་དགོས། །གང་དག་སྟོང་གསུམ་རི་དང་རྒྱ་མཚོར་བཅས། །ཕྱི་མའི་བསྐལ་པར་མགོ་བོས་འདེག་བྱེད་ཀྱང་། །ཆོས་འདིར་དད་པའི་བྱ་དཀའ་ཅི་འདྲ་བ། །དེ་འདྲ་དེ་ནི་དེ་ལ་ཡོད་མ་ཡིན། །ལ་ལས་སྟོང་གསུམ་རྡུལ་སྙེད་སེམས་ཅན་ལ། །བདེ་བ་ཀུན་གྱིས་བསྐལ་པར་བསྙེན་བཀུར་ཀྱང་། །ཆོས་འདིར་དད་པའི་བསོད་ནམས་ཅི་འདྲ་བ། །བསོད་ནམས་ཁྱད་པར་དེ་འདྲ་དེ་ལ་མེད། །ལ་ལས་ཞིང་བཅུ་རི་དང་རྒྱ་མཚོར་བཅས། །ལག་པའི་མཐིལ་དུ་བསྐལ་པར་མཁར་འཛིན་ཀྱང་། །ཆོས་འདིར་དད་པའི་བྱ་དཀའ་ཅི་འདྲ་བ། །དེ་འདྲ་དེ་ནི་དེ་ལ་ཡོད་མ་ཡིན། །ལ་ལས་ཞིང་བཅུའི་རྡུལ་སྙེད་སེམས་ཅན་ལ། །དགེ་བ་ཀུན་གྱིས་བསྐལ་པར་བསྙེན་བཀུར་ཀྱང་། །ཆོས་འདིར་དད་པའི་བསོད་ནམས་ཅི་འདྲ་བ། །བསོད་ནམས་ཁྱད་པར་དེ་འདྲ་དེ་ལ་མེད། །ལ་ལས་ཞིང་བཅུའི་རྡུལ་སྙེད་སངས་རྒྱས་རྣམས། །བདེ་བ་ཀུན་གྱིས་བསྐལ་པར་བསྙེན་བཀུར་བས། །གང་གིས་ཆོས་ཀྱི་ལེའུ་འདི་གཟུང་བྱས་པ། །བསོད་ནམས་དེ་ནི་དེ་བས་ཁྱད་པར་འཕགས། །རྣམ་ཐར་དེ་དག་རབ་ཏུ་བསྟན་པའི་ཚེ། །ཕྱོགས་བཅུའི་ཞིང་རྣམས་ཐམས་ཅད་གཡོས་པར་གྱུར། །བདུད་ཀྱི་གནས་རྣམས་མོག་མོག་བྱས་གྱུར་ཅིང་། །སྒྲ་རབ་ཕྱུང་བས་ངན་སོང་རབ་ཏུ་ཞི། །ཕྱོགས་བཅུ་ཀུན་གྱི་མི་ཡི་སེང་གེ་རྣམས། །དེ་དག་ཀུན་གྱིས་མངོན་པར་ཞལ་བསྟན་ཏེ། །ཕྱག་བརྐྱང་མཛད་ནས་ཡོན་ཏན་མཐའ་ཡས་པ། །བཟང་པོ་དཔལ་གྱི་མགོ་ལ་བཞག་པར་གྱུར། །ཕྱག་གི་མཐིལ་གྱིས་མགོ་ལ་བྱུག་མཛད་དེ། །རྣམ་ཐར་འདི་དག་ལེགས་པར་བཤད་པ་ལེགས། །ཁྱོད་ཀྱིས་ལེགས་བསྟན་རྗེས་སུ་ངེད་དགྱེས་ཞེས། །སངས་རྒྱས་དེ་དག་ཀུན་གྱིས་གསུང་བརྗོད་དོ།