Degé Kangyur volume 57, F.21.b

སམ། འོན་ཏེ་ཚོགས་མ་བསགས་པ་རྣམས་ཀྱི་ཡང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཞི་གནས་དང་ལྷག་མཐོང་གི་ལམ་ནི་བྱང་ཆུབ་སེམས་དཔའ་ཚོགས་མ་བསགས་པ་རྣམས་ཀྱི་ཡང་ཡིན་པར་ངས་བཤད་དོ། །​རིགས་ཀྱི་བུ་འདི་ལྟར་སེམས་མཉམ་པར་བཞག་པ་ནི་མངོན་པར་རྟོགས་པ་དང་འཐུན་པ་བྱང་ཆུབ་སེམས་དཔའི་སྐྱོན་མེད་པ་ལ་འཇུག་པའི་ཕྱོགས་ཀྱི་ས་ལ་འཇུག་པ་ལ་ཉེ་བར་འགྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་གནས་ལས་སྐྱེ་བ་སྟེ། གནས་ནི་ཏིང་ངེ་འཛིན་ཅེས་བྱའོ། །​བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཆོག་མི་ཤེས་པ་ལས་སྐྱེ་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཏིང་ངེ་འཛིན་ཐོབ་པའི་བྱང་ཆུབ་སེམས་དཔའ་ཞི་གནས་ཙམ་དང་། ཏིང་ངེ་འཛིན་གྱི་རོ་དེ་ཙམ་གྱིས་ཆོག་པར་མི་འཛིན་གྱི། ཏིང་ངེ་འཛིན་དེ་ཉིད་ལ་གནས་ནས་དེ་ཐེག་པ་ཆེན་པོའི་ཆོས་དེ་དག་ལ་བགྲང་ཞིང་འཇལ་ལ་དཔྱོད་ཅིང་སོ་སོར་རྟོག་སྟེ། དེ་ལ་བགྲང་ཞིང་འཇལ་ལ་དཔྱོད་ཅིང་སོ་སོར་རྟོག་པའི་རྣམ་པའི་ལྷག་མཐོང་རབ་ཏུ་སྐྱེའོ། །​དེས་ན་དེ་ལྷག་མཐོང་དང་ལྷན་ཅིག་སོང་བའི་རྒྱུན་ཆུ་བོ་ལྟར་འབབ་ཅིང་རླབས་འབྱུང་བ། མངོན་པར་རྟོགས་པ་དང་ཆེས་འཐུན་པ། བྱང་ཆུབ་སེམས་དཔའི་སྐྱོན་མེད་པ་ལ་འཇུག་པའི་ཕྱོགས་ཀྱི་མཆོག་གི་ས་ལ་འཇུག་པ། རབ་ཏུ་འདོད་དོ། །​ཤེས་རབ་ལ་ཉེ་བར་མི་གནས་ན་རིགས་ཀྱི་བུ་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཇི་ལྟར་ཡང་མི་སྐྱེའོ་ཞེས་ང་སྨྲའོ། །​རིགས་ཀྱི་བུ་བྱང་ཆུབ་སེམས་དཔའ་ཚོགས་མ་བསགས་ཀྱང་ཐེག་པ་ཆེན་པོའི་ཆོས་ཉན་ཏམ། སེམས་ཀྱང་རུང་སྟེ། ཞི་གནས་དང་ལྷག་མཐོང་ལ་གནས་ན་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེའོ། །​སེམས་རྩེ་གཅིག་ཏུ་མི་བྱེད་ཅིང་ཐེག་པ་ཆེན་པོའི་ཆོས་མི་འཛིན་ན་ཐེག་པ་ཆེན་པོ་ལ་དད་པ་མི་སྐྱེའི། རིགས་ཀྱི་བུ་



The English translation of this folio by 84000 Translating the words of the Buddha can be found at:
https://read.84000.co/translation/toh144.html?part=UT22084-057-003-370#UT22084-057-003-370