Degé Kangyur volume 55, F.217.b

པའི་སྐུ་མངོན་པར་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་མུ་ཏིག་དཀར་པོ་དང་མུ་ཏིག་དམར་པོ་དང་མུ་ཏིག་མཐོན་ཀའི་མུ་ཏིག་གི་ཕྲེང་བ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་ལྷའི་རས་བཅོས་བུའི་རྒྱལ་མཚན་གསེར་གྱི་དྲིལ་བུ་གཡེར་ཀའི་དྲ་བས་གཡོགས་པ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་སྤོས་ཀྱི་ཕུར་མ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་གདུགས་ཁ་དོག་དུ་མ་པ་ཁ་དོག་སྣ་ཚོགས་པ། ཁ་དོག་བརྒྱ་སྟོང་དུ་མ་བཀྲ་བ། བལྟ་ན་སྡུག་པ། ལེགས་པར་ལས་སུ་བྱས་པ། དབྱིབས་ཤིན་ཏུ་ལེགས་པ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་ཤིང་ཏ་ལའི་ཕྲེང་བ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་རིན་པོ་ཆེའི་ཤིང་ལྗོན་པ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་དྲིལ་བུ་གཡེར་ཀའི་དྲ་བ་གང་དག་རླུང་གིས་བསྐྱོད་པ་ན་འདི་ལྟ་བུའི་སྒྲ་དག་འབྱུང་བ་འདི་ལྟ་སྟེ་དཔེར་ན། ལྷའི་སིལ་སྙན་ཡན་ལག་བྱེ་བ་བརྒྱ་སྟོང་དང་ལྡན་པ་མཁས་པ་དག་གིས་ལེགས་པར་བླངས་ནས་སྒྲ་འབྱུང་བ་དེ་བཞིན་དུ་དྲིལ་བུ་གཡེར་ཀའི་དྲ་བ་དེ་དག་ཀྱང་རླུང་གིས་བསྐྱོད་ན་སྒྲ་སྙན་པ་ཡིད་དུ་འོང་བ་དག་འབྱུང་བ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་རྫིང་བུ་གཞི་གསེར་གྱི་བྱེ་མ་བདལ་བ། བཻ་དཱུརྱ་དང་ཤེལ་གྱིས་སྤྲས་པ། རིན་པོ་ཆེ་སྣ་བདུན་གྱི་ཁ་ཁྱེར་གྱིས་བསྐོར་བ། མེ་ཏོག་ཨུད་པ་ལ་དང་པད་མ་དང་ཀུ་མུ་ད་དང་པད་མ་དཀར་པོས་གང་བ། ངུར་པ་སྒྲ་འབྱིན་པ། ཡན་ལག་བརྒྱད་དང་ལྡན་པའི་ཆུས་གང་བ། བྱ་རོག་གིས་བཏུང་དུ་རུང་བར་མུ་དང་ཁ་ད་ཆད་དུ་གང་བ་དག་སྤྲུལ་ཏོ། །​ཁང་པ་བརྩེགས་པ་རེ་རེར་ཡང་རིན་པོ་ཆེའི་ཤིང་ལྗོན་པའི་ཕྲེང་བ་རིམ་པ་བདུན་གྱིས་བསྐོར་ཏོ། །​རིན་པོ་ཆེའི་སྐུད་པ་བརྒྱད་ཁྲི་བཞི་སྟོང་གིས་ཀུན་ནས་དཀྲིས་སོ། །​རིན་པོ་ཆེའི་ཁང་པ་བརྩེགས་པ་རེ་རེའི་འོད་ཀྱིས་ཀྱང་དཔག་ཚད་བརྒྱད་ཁྲི་བཞི་སྟོང་དུ་སྣང་བར་གྱུར་ཏོ། །​དེ་བཞིན་དུ་ཁང་པ་བརྩེགས་པ་ཐམས་ཅད་ཀྱི་བཀོད་པ་དག་སོ་སོར་བྱས་སོ། །



The English translation of this folio by 84000 Translating the words of the Buddha can be found at:
https://read.84000.co/translation/toh130.html?part=UT22084-055-004-266#UT22084-055-004-266