Degé Kangyur volume 55, F.210.b

༄༅༅། །​རྒྱ་གར་སྐད་དུ། ཨཱརྱ་མཱ་ཡོ་པ་མ་ས་མཱ་དྷི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྒྱུ་མ་ལྟ་བུའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །​འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་བཱ་རཱ་ཎ་སཱི་ན་དྲང་སྲོང་ལྷུང་བ་རི་དགས་ཀྱི་ནགས་ན། དགྲ་བཅོམ་པ་ཉི་ཁྲིའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་ཁྲི་ཉིས་སྟོང་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་སེང་གེ་དང་། སེང་གེའི་བློ་གྲོས་དང་། ལེགས་པར་གནས་པའི་བློ་གྲོས་དང་། དཔེ་མེད་བློ་གྲོས་དང་། ས་འཛིན་དང་། མེས་བྱིན་དང་། ཆུ་ལྷ་དང་། དཀོན་མཆོག་འབྱུང་གནས་དང་། ཕུག་སྦས་དང་བཟང་སྐྱོང་དང་གློག་ལྷ་དང་། རྣམ་པར་སྣང་བྱེད་དང་། འཇམ་དཔལ་གཞོན་ནུར་གྱུར་པ་དང་། ཡེ་ཤེས་འབྱུང་གནས་དང་། བརྩོན་པ་མི་གཏོང་དང་། མཐོང་བ་དོན་ཡོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་ཁྲི་ཉིས་སྟོང་དང་ཐབས་ཅིག་ཏུ་བཞུགས་སོ། །​ལྷའི་བུ་མཚམས་བཟང་དང་ལེགས་པར་གནས་པའི་བློ་གྲོས་ལ་སོགས་པ་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ་ཉི་ཁྲི་དང་ཡང་ཐབས་ཅིག་གོ། །​དེ་ནས་བཅོམ་



The English translation of this folio by 84000 Translating the words of the Buddha can be found at:
https://read.84000.co/translation/toh130.html?part=UT22084-055-004-252#UT22084-055-004-252