གཟུགས་གང་དང་མཉམ་པ་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ཡང་དེ་དང་མཉམ་ཞིང་། ཕུང་པོ་གང་དང་མཉམ་པ་ཏིང་ངེ་འཛིན་ཀྱང་དེ་དང་མཉམ་པར་ཡང་དག་པར་རྗེས་སུ་མཐོང་ངོ་། །དེ་བཞིན་གཤེགས་པའི་རིགས་ཀྱི་ཏིང་ངེ་འཛིན་ཀྱང་དེ་དང་མཉམ་པར་ཡང་དག་པར་རྗེས་སུ་མཐོང་ངོ་། །དེ་བཞིན་གཤེགས་པའི་རིགས་ཀྱི་ཏིང་ངེ་འཛིན་གང་དང་མཉམ་པར་ཡང་དག་པར་རྗེས་སུ་མཐོང་བ་ཆོས་ཐམས་ཅད་ཀྱང་དེ་དང་མཉམ་པ་ཡང་དག་པར་རྗེས་སུ་མཐོང་ངོ་། །སངས་རྒྱས་ཀྱི་ཆོས་ཐམས་ཅད་གང་དང་མཉམ་པར་ཡང་དག་པར་རྗེས་སུ་མཐོང་བ་བྱིས་པ་སོ་སོའི་སྐྱེ་བོའི་ཆོས་ཐམས་ཅད་ཀྱང་དེ་དང་མཉམ་པར་ཡང་དག་པར་རྗེས་སུ་མཐོང་ངོ་། །བྱིས་པ་སོ་སོའི་སྐྱེ་བོའི་ཆོས་ཐམས་ཅད་གང་དང་མཉམ་པར་ཡང་དག་པར་རྗེས་སུ་མཐོང་བའི་ཏིང་ངེ་འཛིན་ཀྱང་དེ་དང་མཉམ་པར་ཡང་དག་པར་རྗེས་སུ་མཐོང་ངོ་། །ཏིང་ངེ་འཛིན་གང་དང་མཉམ་པ་འདས་པའི་ཕུང་པོ་དང་། ཁམས་དང་སྐྱེ་མཆེད་རྣམས་ཀྱང་དེ་དང་མཉམ་པར་ཡང་དག་པར་རྗེས་སུ་མཐོང་ངོ་། །མ་འོངས་པ་དང་ད་ལྟར་བྱུང་བའི་ཕུང་པོ་དང་ཁམས་དང་སྐྱེ་མཆེད་རྣམས་ཀྱང་དེ་བཞིན་དུ་ཡང་དག་པར་རྗེས་སུ་མཐོང་ངོ་། །ཕུང་པོ་དང་ཁམས་དང་སྐྱེ་མཆེད་རྣམས་ཇི་ལྟ་བ་བཞིན་དུ་ལས་དང་རྣམ་པར་སྨིན་པ་ཡང་དེ་ལྟར་ཡང་དག་པར་རྗེས་སུ་མཐོང་སྟེ། དུས་གསུམ་མཉམ་པའི་ཏིང་ངེ་འཛིན་གྱི་རིགས་ལ་ཞུགས་པ་དེ་ནི་ཡང་དག་པའི་ཏིང་ངེ་འཛིན་ཅེས་བྱའོ། །གང་གཟུགས་ལ་དེ་ཁོ་ན་ཤེས་པ་དང་དེ་བཞིན་ཉིད་ཤེས་པ་དེ་ནི་བདེན་པ་ཤེས་པ་སྟེ། ཆོས་ཉིད་ཀྱི་རང་བཞིན་གང་ཡིན་པ་དེ་ནི་ཕུང་པོ་དང་ཁམས་དང་སྐྱེ་མཆེད་རྣམས་ཀྱི་རང་བཞིན་ནོ། །ཆོས་ཉིད་ཀྱི་རང་བཞིན་མེད་པ་ནི་ཕུང་པོ་དང་ཁམས་དང་སྐྱེ་མཆེད་ཀྱི་རང་བཞིན་མེད་པར་བདེན་པ་ཉིད་དུ་མོས་སོ། །བྱིན་གྱི་རླབས་ཞེས་བྱ་བ་དེ་ནི་སླུ་བ་མེད་པའི་ཆོས་ཉིད་ཀྱི་ཚིག་བླ་དགས་སོ། །དེ་ཅིའི་ཕྱིར་ཞེ་ན། མི་སླུ་བ་གང་ཡིན་པ་དེ་ནི་བདེན་པའི་ཕྱིར་རོ། །དེ་ལ་གནས་པ་ནི་ཡང་དག་པའི་སྨོན་ལམ་བརྗོད་པ་དང་ལས་ཡང་དག་པར་སྤྱོད་པ་མངོན་སུམ་དུ་འགྱུར་ཏེ། ཕུང་པོ་དང་ཁམས་དང་སྐྱེ་མཆེད་དེ་དག་ལ་དེ་བཞིན་གཤེགས་པའི་རྣམ་པར་འཕྲུལ་པ་ཀུན་ཏུ་སྟོན་པར་བྱིན་གྱིས་རློབ་བོ། །སའི་བདེན་པ་ཉིད་གང་དང་མཉམ་པ་ཆུ་དང་མེ་དང་རླུང་གི་བདེན་པ་ཉིད་ཀྱང་དེ་དང་མཉམ་མོ།