སྲོག་ཆགས་ལྔ་སྟོང་དང་ལྷན་ཅིག་ཏུ་ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་མིག་མི་འཛུམས་པར་ལྟ་ཞིང་འདུག་གོ། །གྲོང་ཁྱེར་ཆེན་པོ་བཱ་རཱ་ཎ་སཱི་ནས་ཚོང་དཔོན་གྱི་བུ་ཡུལ་འཁོར་བཟང་པོ་ཞེས་བྱ་བ་ཡང་ཚོང་དཔོན་གྱི་བུ་ལྔ་བརྒྱས་ཡོངས་སུ་བསྐོར་ཏེ་མདུན་དུ་བདར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་མིག་མི་འཛུམས་པར་ལྟ་ཞིང་འདུག་གོ། །ལྷའི་དབང་པོ་བརྒྱ་བྱིན་དང་མི་མཇེད་ཀྱི་བདག་པོ་ཚངས་པ་དང་འཇིག་རྟེན་སྐྱོང་བ་བཞི་དང་ལྷའི་བུ་དབང་ཕྱུག་ཆེན་པོ་དང་ལྷའི་བུ་ཟླ་བ་དང་། ལྷའི་བུ་ཤིན་ཏུ་རྣམ་པར་གནོན་སེམས་དང་། ལྷའི་བུ་མཚན་བཟང་དང་། ལྷའི་བུ་གཞན་ཡང་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད་དཔག་ཏུ་མེད། ཚད་མེད་པ་དག་ལྷའི་བུ་རེ་རེ་ལ་ཡང་གཡོག་ལྷའི་བུ་བྱེ་བ་ཁྲག་ཁྲིག་ཕྲག་བརྒྱ་སྟོང་དང་བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། ལྷའི་བུ་རེ་རེས་ཀྱང་བཅོམ་ལྡན་འདས་ལ་ཚུལ་དང་འཐུན་པའི་མཆོད་པ་བསམ་གྱིས་མི་ཁྱབ་པ་བྱས་ཏེ། ཕྱོགས་གཅིག་ཏུ་འདུག་ནས་ཐམས་ཅད་ཀྱང་བཅོམ་ལྡན་འདས་ལ་མིག་མི་འཛུམས་པར་ལྟ་ཞིང་འཁོད་པར་གྱུར་ཏོ། །ཡང་དེའི་ཚེ་བཅོམ་ལྡན་འདས་སྤུའི་ཁུང་བུ་རེ་རེ་དང་དཔེ་བྱད་བཟང་པོ་དང་མཚན་རེ་རེ་ནས་ཀྱང་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འོད་ཕྱུང་སྟེ། འོད་ཟེར་དེ་རེ་རེས་ཀྱང་ཕྱོག་བཅུའི་ཕྱོགས་རེ་རེར་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་སྣང་བ་ཆེན་པོས་ཁྱབ་པར་བྱས་སོ། །འཇིག་རྟེན་གྱི་ཁམས་རེ་རེ་ནས་ཀྱང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་འོངས་ཏེ། བྱང་ཆུབ་སེམས་དཔའ་རེ་རེ་ཡང་རིན་པོ་ཆེའི་ཁང་པ་བརྩེགས་པ་ཆེན་པོ་ནང་རྒྱར་དཔག་ཚད་བྱེ་བ་བརྒྱ་སྟོང་ཡོད་པ། རིན་པོ་ཆེའི་ཁ་ཁྱེར་གྱིས་བསྐོར་བའི་ནོར་བུ་དང་མུ་ཏིག་དང་རིན་པོ་ཆེའི་ལྡ་ལྡིས་མཛེས་པར་བྱས་པ། རྒྱལ་མཚན་དང་བ་དན་བསྒྲེང་བའི་ནང་ན་གནས་ཤིང་ལྷའི་བུ་མོ་བྱེ་བ་ཕྲག་ཁྲག་ཁྲིག་བརྒྱ་སྟོང་གྲངས་མེད་བསམ་གྱིས་མི་ཁྱབ་པས་ཡོངས་སུ་བསྐོར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། ལྷའི་མེ་ཏོག་གི་སྤྲིན་དང་རིན་པོ་ཆེའི་སྤྲིན་དང་ན་བཟའི་སྤྲིན་དང་།