།གང་འདས་པ་དང་མ་འོངས་པ་དང་ད་ལྟར་བྱུང་བའི་དུས་ལ་འདོད་ཆགས་མེད་ཅིང་འདོད་ཆགས་དང་བྲལ་བའི་ཚུལ་གྱིས་གཟུགས་ལ་འདོད་ཆགས་དང་། ཞེ་སྡང་དང་གཏི་མུག་གིས་མི་གོས་པར་ཤེས་པ་དེ་ནི་དེའི་ཟག་པ་ཟད་པའི་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཉམས་པ་མེད་ཅིང་ཆགས་པ་མེད་དེ་སྒྲིབ་པ་མེད་པའོ། །གང་མཉམ་པ་ཉིད་དུ་ཤེས་པའི་ཚུལ་གྱིས་གཟུགས་ལ་མི་སྐྱེ་མི་འགག་མི་གནས་པར་ཤེས་པ་དེ་ནི་དེའི་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ཞེས་བྱའོ། །གང་མཉམ་པ་ཉིད་ཀྱི་ཚུལ་གྱིས་གཟུགས་ལ་མྱོང་བ་སྐྱེ་བ་མེད་པར་ཤེས་པ་དེ་ནི་དེའི་ཚོར་བ་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་ཞེས་བྱའོ། །མཉམ་པ་ཉིད་ཀྱི་ཚུལ་གྱིས་གང་གཟུགས་ལ་དམིགས་པ་དེ་དང་དེ་ལ་སེམས་མེད་ཅིང་སེམས་ཡོད་པ་མ་ཡིན་ཏེ། སེམས་དང་བྲལ་བ་དེ་ནི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ཞེས་བྱའོ། །མཉམ་པ་ཉིད་དུ་ཤེས་པའི་ཚུལ་གྱིས་གང་སྐྱེ་མཆེད་བཅུ་གཉིས་ལ་འདུ་ཤེས་ཕྱིན་ཅི་ལོག་མེད་པ་དང་། སེམས་ཕྱིན་ཅི་ལོག་མེད་པ་དང་ལྟ་བ་ཕྱིན་ཅི་ལོག་མེད་པ་དང་། གདེག་པ་མེད་པ་དང་། གཞག་པ་མེད་པ་དེ་ནི་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ཞེས་བྱའོ། །ཆོས་ཀྱི་དབྱིངས་དབྱེར་མེད་པའི་ཚུལ་གྱིས་གང་གཟུགས་ལ་མི་སྐྱེ་བ་དང་མི་འགག་པ་དང་གནས་པ་མེད་པར་ཤེས་ཤིང་། དགེ་བ་དང་མི་དགེ་བའི་འདུ་ཤེས་དང་ཡང་མི་འདུ་བ་དེ་ནི་སྡིག་པ་མི་དགེ་བའི་སེམས་དང་སེམས་ལས་བྱུང་བའི་ཆོས་སྐྱེས་པ་རྣམས་སྤང་བའི་ཡང་དག་པར་སྤོང་བ་ཞེས་བྱའོ། །ཡིད་ལ་བྱེད་པ་མེད་པའི་ཚུལ་གྱིས་གང་གཟུགས་ལ་མི་སྐྱེ་བ་དང་མི་འགག་པ་དང་གནས་པ་མེད་པར་ཤེས་ཤིང་། སྡུག་བསྔལ་ལས་ཤིན་ཏུ་མི་འདའ་བའི་ཚུལ་གྱིས་གདེག་པ་མེད་ཅིང་གཞག་པ་མེད་ལ། སྡིག་པ་ལ་གནས་པ་མེད་དེ་སྤོང་བ་དེ་ནི་སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པའི་ཡང་དག་པར་སྤོང་བ་ཞེས་བྱའོ། །ཡིད་ལ་བྱེད་པ་མེད་པའི་ཚུལ་གྱིས་གང་གཟུགས་མཐོང་ནས་ཁམས་དང་སྐྱེ་མཆེད་མི་སྐྱེ་བ་དང་མི་འགག་པ་དང་གནས་པ་མེད་པར་ཤེས་ཤིང་ཆོས་ཀྱི་དབྱིངས་མཉམ་པ་ཉིད་མི་སྐྱེ་བའི་ཚུལ་གྱིས་གདེག་པ་མེད་ཅིང་གཞག་པ་མེད་ལ། མི་དགེ་བ་མི་དམིགས་ཤིང་། དགེ་བའི་ཆོས་མ་སྐྱེས་པ་རྣམས་སྐྱེད་པ་དེ་ནི་དགེ་བའི་ཆོས་མ་སྐྱེད་པ་རྣམས་སྐྱེད་པའི་ཡང་དག་པར་སྤོང་བ་ཞེས་བྱའོ།