།འཇམ་དཔལ་དེ་བཞིན་ཏེ། དེ་བཞིན་གཤེགས་པས་མི་མཉམ་པ་མེད་པར་ཆོས་བསྟན་ཏོ། །འཇམ་དཔལ་གང་མི་མཉམ་པ་མེད་ན་མི་གཞོམ་པའོ། །གང་གཞོམ་པ་མ་ཡིན་ཞིང་མཉམ་པ་དེ་ནི་མི་མཉམ་པ་མེད་པའོ། །ལྟོས་པ་མེད་པའོ། །འཇུག་པ་མེད་པའོ། །འགྲོ་བ་མེད་པའོ། །འགྲོ་བ་ཡང་དག་པར་ཆད་པའོ། །ཤེས་པར་བྱ་བ་མ་ཡིན་པའོ། །གང་དག་གིས་ཤེས་པར་བྱ་བ་མ་ཡིན་ཞེ་ན། མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་རྣམས་ཀྱིས་ཤེས་པར་བྱ་བ་མ་ཡིན་ནོ། །འདུ་བྱེད་དུ་གྱུར་པ་ཐམས་ཅད་ཀྱིས་ཤེས་པར་བྱ་བ་མ་ཡིན་ནོ། །དེ་ནི་ལུས་ཀྱི་འདུ་བྱེད་དང་ངག་གི་འདུ་བྱེད་དང་། ཡིད་ཀྱི་འདུ་བྱེད་འགགས་པའོ། །ཅིའི་རྒྱུས་འགག །ཅི་སྔོན་བྱུང་བ་ལ་དེ་དག་ཕྱིས་འགགས་པ་ཞིག་གམ། འོན་ཏེ་འདས་པ་ན་ཞིག་པས་འགགས་སམ། གང་ཞིག་པས་འགགས། དེ་སྔོན་མི་ཤེས་པ་ལ་རབ་ཏུ་གནས་པས་མི་དགེ་བའི་ལས་མངོན་པར་འདུ་བྱེད་དོ། །དེ་ཤེས་ནས་མངོན་པར་འདུ་མི་བྱེད་དོ། །གང་སྔོན་འཕགས་པའི་ཆོས་ལ་མ་བརྟེན་ཏེ། མི་ཤེས་པ་ལ་རབ་ཏུ་གནས་པས་མི་དགེ་བའི་ལས་བྱེད་པ་དེ་འཕགས་པའི་ལམ་ལ་བརྟེན་ཏེ། ཡེ་ཤེས་ཀྱིས་རྟོགས་ནས་མངོན་པར་འདུ་བྱེད་དོ། །གང་ཡེ་ཤེས་ཀྱིས་སྟོང་པ་དེ་སྟོང་པ་ཉིད་དེ། མིག་ནི་ཡེ་ཤེས་ཀྱིས་སྟོང་ངོ་། །རྣ་བ་དང་སྣ་དང་ལྕེ་དང་ལུས་དང་ཡིད་ཀྱང་དེ་བཞིན་ནོ། །དེ་ཅིའི་ཕྱིར་ཞེ་ན། ཡེ་ཤེས་ནི་ཡེ་ཤེས་ཀྱིས་སྟོང་སྟེ། སྟོང་པ་ཉིད་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་དོ། །ཡིད་མི་དམིགས་པས་མིག་མིག་ལ་མི་གནས་སོ། །དེ་ཅིའི་ཕྱིར་ཞེ་ན། ཤིན་ཏུ་མ་སྐྱེས་པའི་ཕྱིར་མིག་མི་གནས་ཏེ། རྣ་བ་དང་སྣ་དང་ལྕེ་དང་ལུས་དང་ཡིད་ཀྱང་དེ་བཞིན་ནོ། །ཡིད་མི་དམིགས་པས་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ཀྱང་ཡིད་ལ་མི་གནས་སོ། །དེ་ཅིའི་ཕྱིར་ཞེ་ན། མིག་ཤིན་ཏུ་མ་སྐྱེས་པའི་ཕྱིར་ཏེ། མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ཀྱང་མི་གནས་སོ། །དེ་མི་གནས་པས་བསིལ་བར་གྱུར་པ། དབེན་པའི་སེམས་ཀྱིས་གནས་སོ། །དབེན་པ་ཅི་ཞེ་ན། འཇམ་དཔལ་གང་ཆོས་ཐམས་ཅད་མཉམ་པ་ཉིད་ཀྱི་མཐའ་དང་། གཉིས་སུ་མེད་པའི་མཐའ་དང་། ཡང་དག་པའི་མཐའ་དང་། ཤིན་ཏུ་འབྱུང་བ་མེད་པའི་མཐའ་དེ་ནི་དབེན་པ་ཞེས་བྱའོ།