དགེ་བའི་ཆོས་ལ་འདུན་པ་དང་ལྷག་པའི་བསམ་པ་ལ་ནན་ཏན་བྱེད་པ་དང་མཚན་མོ་མི་ཉལ་བ་དང་། སྤོང་བ་མི་གཏོང་བ་དང་ཆོས་དཀར་པོ་རྣམས་ཀུན་དུ་སྲུང་བ་དང་། དགེ་བའི་རྩ་བ་སྔོན་དུ་འགྲོ་བ་དང་། ཐབས་ལ་མཁས་པ་ཤེས་པ་དང་མཚན་མ་སྤོང་བ་དང་འདུ་ཤེས་ལས་ལྡོག་པ་དང་། མདོ་སྡེ་མངོན་པར་སྒྲུབ་པ་དང་འདུལ་བ་ལ་མཁས་པ་དང་། བདེན་པ་ལ་རྣམ་པར་ངེས་པ་དང་རྣམ་པར་གྲོལ་བ་ལ་མངོན་སུམ་དུ་བྱ་བ་ལ་འཇུག་པ་དང་། ཚིག་གཅིག་ཏུ་ངེས་པ་དང་། གཙིགས་པར་སྨྲ་བ་དང་ཡེ་ཤེས་ཇི་ལྟ་བ་བཞིན་དུ་མཐོང་བ་དང་། ཐོས་པ་ཡོངས་སུ་ཚོལ་བ་དང་ཡེ་ཤེས་ཀྱིས་མི་ངོམས་པ་དང་། སེམས་ཡོངས་སུ་དག་པ་དང་། ལུས་ཡོངས་སུ་དག་པ་དང་། ངག་ཡོངས་སུ་དག་པ་དང་། དོགས་པ་མེད་པའི་ཚིག་དང་སྟོང་པ་ཉིད་ལ་ཀུན་ཏུ་སྟེན་པ་དང་། མཚན་མ་མེད་པ་ལ་སྟེན་པ་དང་སྨོན་པ་མེད་པའི་ངོ་བོ་ཉིད་ཀྱིས་མི་དམིགས་པར་ཤེས་པ་དང་། མི་འཇིགས་པ་ཐོབ་པ་དང་སྡུག་བསྔལ་བ་རྣམས་ལ་མི་བརྙས་པ་དང་། དེ་དག་ལ་ནོར་སྦྱིན་པ་དང་དབུལ་པོ་རྣམས་ལ་ཁྱད་དུ་མི་གསོད་པ་དང་ཚུལ་ཁྲིམས་འཆལ་པ་རྣམས་ལ་སྙིང་བརྩེ་ཞིང་སྙིང་རྗེ་བའི་བློ་དང་ལྡན་པ་དང་། ཕན་པའི་དངོས་པོ་དང་ལྡན་པ་དང་ཆོས་ཀྱིས་ཕན་འདོགས་པ་དང་། ཟང་ཟིང་ཡོངས་སུ་གཏོང་བ་དང་ཚུལ་ཁྲིམས་དང་ལྡན་པ་ལ་གཡོ་མེད་པར་སྟེན་པ་དང་། བདོག་པ་ཐམས་ཅད་ཡོངས་སུ་གཏོང་བ་དང་། ལྷག་པའི་བསམ་པས་མགྲོན་དུ་གཉེར་བ་དང་ཇི་སྐད་སྨྲས་པ་བཞིན་དུ་བྱེད་པ་དང་། ཕྱིར་ཞིང་བརྩོན་པ་དང་བསྟི་སྟང་བྱས་པས་དགའ་བ་མྱོང་བ་དང་། དཔེ་ཤེས་པ་དང་སྔོན་བྱུང་བ་ལ་མཁས་པ་དང་། མིང་དང་བརྡར་བརྟགས་པ་ལ་འཇུག་པ་ཤེས་པ་དང་བཏགས་པ་ཀུན་ཏུ་འཇོམས་པ་དང་། བཀུར་སྟི་བྱེད་པ་ལ་མངོན་པར་དགའ་བ་མེད་པ་དང་བཀུར་སྟི་མི་བྱེད་པ་ལ་བཏང་སྙོམས་སུ་བྱེད་པ་དང་། རྙེད་པ་དོན་དུ་མི་གཉེར་བ་དང་མ་རྙེད་པས་སྲོ་ཤི་བར་མི་འགྱུར་བ་དང་གྲགས་པ་ལ་མངོན་པར་འདོད་པ་མེད་པ་དང་། མ་གྲགས་པ་ལ་ཁོང་ཁྲོ་བ་མེད་པ་དང་བསྔགས་པ་ལ་རྗེས་སུ་ཆགས་པ་མེད་པ་དང་། སྨད་པ་ལ་སྤ་གོང་བར་མི་འགྱུར་བ་དང་བདེ་བ་ལ་མངོན་པར་མི་ཆགས་པ་དང་། སྡུག་བསྔལ་གྱིས་མི་སྐྱོ་བ་དང་འདུ་བྱེད་ཀུན་ཏུ་མི་འཛིན་པ་དང་། ཡང་དག་པའི་བསྔགས་པ་ལ་མི་ཆགས་པ་དང་ཡང་དག་པ་མ་ཡིན་པའི་བརྗོད་པ་དང་དུ་ལེན་པ་དང་།