Degé Kangyur volume 55, F.22.a

འདའ། །​དེ་འདྲའི་བཟོད་སྟོབས་བླ་ན་མེད་པ་ལ། །​བདག་མེད་བཟོད་པ་མཉམ་ཉིད་གནས་པ་ཡི། །​བྱང་ཆུབ་སེམས་དཔའ་གྲགས་པ་ཆེན་པོ་ཡིས། །​བསྐལ་པ་བྱེ་བར་རྟག་ཏུ་ཤིན་ཏུ་བསྒོམས། །​དེ་ལས་ལྷག་པར་གང་གཱའི་བྱེ་སྙེད་དུ། །​ཇི་ཙམ་སངས་རྒྱས་མཁྱེན་པས་དོན་མི་བྱེད། །​དེ་སྲིད་བྱང་ཆུབ་རེག་པ་མ་ཡིན་ན། །​དེ་བཞིན་གཤེགས་པའི་ཡེ་ཤེས་ཅི་ཞིག་སྨོས། །​གྲགས་པ་ཆེན་པོ་བརྗོད་པ་མཐའ་ཡས་པ། །​བདག་མེད་བཟོད་ལ་རབ་ཏུ་གནས་པ་ཡི། །​བསྐལ་པ་བསམ་གྱིས་མི་ཁྱབ་བརྒྱར་བརྗོད་ཀྱང་། །​དེ་ཡི་བསྔགས་པ་ཟད་པར་སླ་བ་མིན། །​དེ་ཕྱིར་བྱང་ཆུབ་མཆོག་རབ་བླ་ན་མེད། །​ཡེ་ཤེས་ཕུང་པོ་འཚང་རྒྱར་སུ་འདོད་པ། །​དེ་ནི་རྒྱལ་བས་བསྔགས་པའི་བཟོད་པ་སྒོམས། །​བྱང་ཆུབ་དམ་པ་རྙེད་པར་དཀའ་མི་འགྱུར། །​བཟོད་པ་ལ་འཇུག་པའི་ལེའུ་སྟེ་བདུན་པའོ།​། །​།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་ཅིང་། །​མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཆོས་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་ཀྱི་ཡེ་ཤེས་ལ་མཁས་པར་བྱའོ། །​གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་ཀྱི་ཡེ་ཤེས་ལ་མཁས་པ་ཡིན་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་དངོས་པོ་མེད་པ། ངོ་བོ་ཉིད་མེད་པ། མཚན་མ་མེད་པ། མཚན་ཉིད་མེད་པ། མ་སྐྱེས་པ། མ་འགགས་པ། ཡི་གེ་མེད་པ། སྟོང་པ། གཟོད་མ་ནས་ཞི་བ། རང་བཞིན་གྱིས་རྣམ་པར་དག་པ་ཡིན་པར་རབ་ཏུ་ཤེས་པར་བྱའོ། །​གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོས་ནམ་ཆོས་ཐམས་ཅད་དངོས་པོ་མེད་པ། ངོ་བོ་ཉིད་མེད་པ། མཚན་མ་མེད་པ། མཚན་ཉིད་མེད་པ། མ་སྐྱེས་པ། མ་འགགས་པ། ཡི་གེ་མེད་པ། སྟོང་པ། གཟོད་མ་ནས་ཞི་བ། རང་བཞིན་གྱིས་རྣམ་པར་དག་པ་ཡིན་པར་རབ་ཏུ་ཤེས་པར་གྱུར་པ་དེའི་ཚེ་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་



The English translation of this folio by 84000 Translating the words of the Buddha can be found at:
https://read.84000.co/translation/toh127.html?part=UT22084-055-001-5875#UT22084-055-001-5875