Degé Kangyur volume 55, F.108.b

འཇིག་རྟེན་སངས་རྒྱས་བདག་འགྱུར་སྙམ། །​དེ་ལྟར་གང་གི་བློ་འགྱུར་བ། །​སྲིད་པའི་སྲེད་པས་ཡོང་མི་གཟིར། །​མཁས་པ་བྱང་ཆུབ་རྟོགས་པར་འགྱུར། །​བྱང་ཆུབ་སེམས་དཔའ་མཉམ་བཞག་པ། །​ཆོས་ནི་གང་ལའང་སྨོན་མི་བྱེད། །​ཅི་ཡང་མེད་ཅིང་དམིགས་པ་མེད། །​དེ་ནི་བྱང་ཆུབ་བརྗོད་པ་ཡིན། །​བྱང་ཆུབ་ཏུ་ནི་ངེས་ཞུགས་ཤེས། །​མང་དུ་དེ་སྐད་སྨྲ་མོད་ཀྱི། །​འཇུག་པ་འདི་ནི་མི་ཤེས་པས། །​དེ་དག་སངས་རྒྱས་བྱང་ཆུབ་རིང་། །​འདུ་བྱེད་ཐམས་ཅད་སྟོང་པར་ནི། །​སྒྲ་ཡིས་ཆོས་རྣམས་རབ་ཏུ་བཤད། །​སྒྲ་ཡི་རང་བཞིན་གང་ཡིན་པ། །​ཟབ་ཅིང་ཕྲ་སྟེ་མཐོང་བར་དཀའ། །​མངོན་ཤེས་ཆེ་ལ་མདོ་སྡེ་འདི། །​ངེས་པར་བསྟན་ཞེས་བྱ་བ་ཡིན། །​བྱང་ཆུབ་སེམས་དཔའི་དོན་ཕྱིར་ནི། །​སངས་རྒྱས་རྣམས་ཀྱིས་བསྟན་མཛད་དོ། །​ཀུན་ནས་ཉོན་མོངས་ཇི་སྙེད་པ། །​གཉེན་པོ་ཐམས་ཅད་དེ་ཡིས་བཅོམ། །​མངོན་པར་ཤེས་ལ་རབ་གནས་ཤིང་། །དེ་དག་རྫུ་འཕྲུལ་ཤིན་ཏུ་བསྒོམས། །​བསམས་ནས་ཤེས་ལ་དེ་གནས་ཏེ། །​ཤེས་པ་དེ་ཡང་རྣམ་པར་བཤིག །​བསམ་གྱིས་མི་ཁྱབ་དཔག་མེད་ཀྱི། །​ཡེ་ཤེས་ཐོབ་པས་ངོམས་པ་མེད། །​ཏིང་ངེ་འཛིན་དང་རྫུ་འཕྲུལ་ཕྱིར། །​དེ་དག་མངོན་པར་འདུ་བྱེད་མེད། །​དཔའ་བོའི་རྣམ་སྨིན་དེ་ཡིན་ཏེ། །​དུས་ཀུན་དུ་ཡང་མཉམ་པར་བཞག །​རྣམ་སྨིན་སྐྱེས་པའི་རྫུ་འཕྲུལ་གྱིས། །​ཞིང་ནི་བྱེ་བར་དེ་འགྲོ་སྟེ། །​འཇིག་རྟེན་སྒྲོན་མ་མཐོང་བ་ནི། །​གང་གཱ་དག་གི་བྱེ་མ་སྙེད། །​དེ་དག་འཆི་འཕོ་སྐྱེ་བ་ཡང་། །​སེམས་གཞན་དུ་ནི་སྒྱུར་བར་བྱེད། །​སེམས་ལ་དབང་ཡང་ཐོབ་པས་ན། །​དེ་དག་ལུས་ནི་འོད་གསལ་ལོ། །​སངས་རྒྱས་དག་གི་ཉན་ཐོས་གང་། །​བསྒོམས་པའི་རྫུ་འཕྲུལ་གནས་པ་ནི། །​འདུ་བྱེད་མེད་པའི་རྫུ་འཕྲུལ་ལ། །​དེ་དག་བཅུ་དྲུག་ཆར་མི་ཕོད། །​ལྷ་རྣམས་ཀྱིས་ཀྱང་དེ་དག་གི། །​བསམ་པ་ཤེས་པར་མི་ནུས་ཏེ། །​འཇིག་རྟེན་གྱི་ནི་མགོན་པོ་དང་། །​དེ་དག་མཚུངས་གནས་མ་གཏོགས་སོ། །​དེ་དག་སྤྱི་ཅེར་མི་འགྱུར་ཏེ། །​མགོ་ལ་སྐྲ་དཀར་མི་འབྱུང་ཞིང་། །​རགས་པའི་རྒ་བ་མི་འབྱུང་སྟེ། །​དེ་བཞིན་སྡུག་བསྔལ་འཆི་བ་མེད། །​ཐེ་ཚོམ་ཡིད་གཉིས་མི་འབྱུང་སྟེ། །​དེ་དག་ལ་ནི་ནེམ་ནུར་མེད། །



The English translation of this folio by 84000 Translating the words of the Buddha can be found at:
https://read.84000.co/translation/toh127.html?part=UT22084-055-001-6048#UT22084-055-001-6048