Degé Kangyur volume 55, F.46.a

།གཟུངས་དང་མདོ་སྡེ་བཟང་པོ་དང་། །​མདོ་སྡེ་གཞན་ཡང་བྱེ་བ་དང་། །​སངས་རྒྱས་བྱང་ཆུབ་རབ་ཏུ་སྟོན། །​སེམས་ཅན་མང་པོ་བསམ་མི་ཁྱབ། །​ཕྱིར་མི་ལྡོག་ལ་འགོད་པར་བྱེད། །​སངས་རྒྱས་བྱང་ཆུབ་རབ་སྟོན་ཀྱང་། །​སྤོབས་པ་དག་ནི་ཟད་མི་འགྱུར། །​རིན་ཆེན་རྣམ་པར་བརྒྱན་པ་ཡི། །ཁང་པ་བརྩེགས་ཞུགས་དེ་འགྲོ་སྟེ། །​དྲི་དང་ལྡན་པའི་མེ་ཏོག་གིས། །​འདྲེན་པ་ལ་ཡང་མངོན་པར་འཐོར། །​དྲི་དང་ལྡན་པའི་ཕྱེ་མས་ཀྱང་། །​འདྲེན་པ་ལ་ནི་རབ་ཏུ་འཐོར། །​དེ་དག་ཐམས་ཅད་བྱང་ཆུབ་ཕྱིར། །​རྒྱ་ཆེ་བ་ཡི་མཆོད་པ་བྱེད། །​བྱང་ཆུབ་སེམས་དཔའ་སྐྱོབ་པ་ཡི། །​ཡོན་ཏན་དཔག་མེད་དེ་དག་ནི། །​ནམ་ཞིག་ཉོན་མོངས་མེད་གྱུར་པ། །​དེ་ཚེ་རྫུ་འཕྲུལ་དེ་དག་འཐོབ། །​ཉོན་མོངས་དག་ནི་མི་སྐྱེ་ཞིང་། །​དག་པ་དང་བ་འོད་གསལ་བ། །​མི་འཁྲུགས་འདུས་མ་བྱས་པ་ནི། །​བྱང་ཆུབ་སེམས་དཔའི་སྤྱོད་ཡུལ་ལོ། །​རབ་ཏུ་ཞི་ཞིང་ཉེ་བར་ཞི། །​ཉོན་མོངས་མེད་ཅིང་མྱ་ངན་བྲལ། །སྤྲོས་མེད་རྣམ་པར་མ་སྤྲོས་པ། །​སྤྲོས་པ་དག་ལས་ཤིན་ཏུ་འདས། །​ཡི་གེའི་སྤྱོད་པ་མེད་པ་ནི། །​ཆོས་རྣམས་ཀུན་གྱི་མཚན་ཉིད་དེ། །​དབྱངས་ཀྱིས་རིག་པར་དགའ་བས་ན། །​དེ་ཕྱིར་ཏིང་ངེ་འཛིན་ཅེས་བྱ། །​ཟད་མི་ཤེས་ཤིང་ཉེ་བར་ཞི། །​ལྷུན་གྱིས་འགྲུབ་ཅིང་བསྟན་མེད་པ། །​རྙོག་མེད་ཡང་དག་ཉིད་ཀྱི་མཐའ། །​སངས་རྒྱས་ཀུན་གྱི་སྤྱོད་ཡུལ་ལོ། །​འོང་དང་འགྲོ་བ་མེད་པ་དང་། །​སྤྲོས་མེད་ལྷུན་གྱིས་གྲུབ་པ་ཡི། །​ཆོས་རྣམས་ཀུན་གྱི་རང་བཞིན་ནི། །​སངས་རྒྱས་ཀུན་གྱི་བསླབ་པ་སྟེ། །​རྫོགས་པའི་སངས་རྒྱས་འདི་བསླབས་ནས། །​ཡོན་ཏན་དག་གི་ཕ་རོལ་ཕྱིན། །ཚུ་རོལ་དང་ནི་ཕ་རོལ་མེད། །​སྔོན་མཐའ་རྣམ་པར་མ་བརྟགས་ཏེ། །​དེ་ཕྱིར་སངས་རྒྱས་དེ་དག་ཀུན། །​ཡོན་ཏན་དག་གི་ཕ་རོལ་ཕྱིན། །​འོང་དང་འགྲོ་བ་མེད་པ་དང་། །​སྤྲོས་མེད་ལྷུན་གྱིས་གྲུབ་པ་ཡི། །​ཆོས་ཀྱི་རང་བཞིན་མཁྱེན་ནས་ནི། །​དེ་དག་དེ་ལས་ཕ་རོལ་ཕྱིན། །​ཏིང་ངེ་འཛིན་ངེས་པར་བསྟན་པའི་ལེའུ་སྟེ་བཅུ་གསུམ་པའོ།​། །​།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་ལྔ་པ། དེ་ནས་ཟླ་འོད་གཞོན་ནུར་གྱུར་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།



The English translation of this folio by 84000 - Translating the words of the Buddha can be found at:
https://read.84000.co/translation/toh127.html?part=UT22084-055-001-5923#UT22084-055-001-5923