Degé Kangyur volume 54, F.283.a

བྱང་ཆུབ་དེ་ནི་འཇིག་རྟེན་འདྲེན་པས་བསྔགས། །​འདྲེན་པ་ཁྱོད་ལས་སྟོང་པ་དེང་ཐོས་ཏེ། །​ཡེ་ཤེས་བླ་ན་མེད་པའང་བདག་གིས་བསྒྲུབས། །​སངས་རྒྱས་རྐང་གཉིས་གཙོ་བོར་འགྱུར་བར་བགྱི། །​མི་མཁས་འགྲོ་བ་དག་ཀྱང་རྣམ་པར་དགྲོལ། །​ཐུབ་པ་ཁྱོད་ལ་བདག་ནི་སྐྱབས་སུ་མཆི། །​གང་ལ་ལོག་པའི་བློ་གྲོས་མི་དམིགས་ཤིང་། །​ཆོས་རྣམས་ཀུན་ལ་ཁྱོད་ནི་ཐེ་ཚོམ་བྲལ། །​དེ་སླད་འཇིག་རྟེན་ཁྱོད་དང་འདྲ་མ་མཆིས། །​འདྲེན་པ་བདེ་བར་གཤེགས་ལ་གང་བསྟོད་པའི། །​བསོད་ནམས་མི་ཆུང་བདག་གིས་བསགས་པས་ན། །​བདག་ནི་དེ་ཡི་དགེ་བའི་ལས་འདི་ཡིས། །​མི་ཡི་གཙོ་བོ་འདྲེན་པར་འགྱུར་བར་ཤོག །​དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་གྱིས་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་དགེ་བའི་རྩ་བ་དེས་བསྐལ་པ་བརྗོད་དུ་མེད་པར་ནམས་ཀྱང་སྨྱོས་པ་དང་གླེན་པར་མ་གྱུར་ཏོ། །​གང་དང་གང་དུ་སྐྱེས་པ་དེ་དང་དེར་འདྲེན་པ་སྐྱེས་བུ་ཆེན་པོར་གྱུར་ཏོ། །​ནམས་ཀྱང་ལོག་པར་ལྟུང་བར་མ་གྱུར་ཏོ། །​ནམས་ཀྱང་གཞན་གྱི་དྲིང་ལ་འཇོག་པར་མ་གྱུར་ཏོ། །​ནམས་ཀྱང་གཞན་གྱི་ངོར་ལྟ་བར་མ་གྱུར་ཏོ། །​ནམས་ཀྱང་བསྐལ་པ་བརྗོད་དུ་མེད་པར་ཐ་ན་སེ་གོལ་གཏོགས་པ་ཙམ་གྱི་བར་དུ་སེམས་ཅན་རྣམས་ཡོངས་སུ་སྨིན་པར་མ་བྱས་པར་མ་གྱུར་ཏོ། །​ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རིགས་ཀྱི་བུ་གྲགས་བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཐམས་ཅད་ཟིལ་གྱིས་གནོན་པ་ཁྱོད་ཀྱིས་དེ་ལྟར་མི་བལྟའོ། །​དེ་ཅིའི་ཕྱིར་ཞེ་ན། རིགས་ཀྱི་བུ་བཟང་སྐྱོང་ཞེས་བྱ་བ་དེ་དེའི་ཚེ་དེའི་དུས་ན་རིགས་ཀྱི་བུ་གྲགས་བྱིན་ཞེས་བྱ་བར་གྱུར་ཏོ། །​ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་མཁས་པའི་སྙིང་པོར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ཁྱོད་ཀྱིས་དེ་ལྟར་མི་བལྟའོ། །​དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དཀོན་མཆོག་འབྱུང་གནས་ཞེས་བྱ་བ་དེ་དེའི་ཚེ་དེའི་དུས་ན་རིགས་ཀྱི་བུ་མཁས་པའི་སྙིང་པོ་ཞེས་བྱ་བར་གྱུར་ཏོ། །



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1174#UT22084-054-005-1174