།དེ་དག་ཀྱང་ནི་ཚུལ་འདི་འཆད་པར་འགྱུར། །རྣམ་པར་འདྲེན་པ་ད་ལྟར་གང་བྱུང་བ། །རྒྱལ་བ་དེ་དག་ཀུན་ཀྱང་ཚུལ་འདི་སྟོན། །ཆོས་ཉིད་འདི་དག་རབ་ཏུ་ཤེས་པ་ཡི། །བྱང་ཆུབ་སེམས་དཔའ་འཇིགས་པ་མེད་པར་འགྱུར། །ཞི་བའི་ས་ཡང་རབ་ཏུ་ཤེས་འགྱུར་ཏེ། །མཁས་པས་ཤེས་པར་དཀའ་བ་རབ་ཏུ་བསྟན། །རྒྱལ་བའི་ཐུགས་སྲས་ཇི་ཙམ་ཤེས་པ་དག །འགྲོ་བ་གཙེས་པ་འདི་ལ་མྱ་ངན་མེད། །དེ་ལ་སྙིང་རྗེ་བླ་ན་མེད་པ་སྟེ། །འགྲོ་བ་ཀུན་ལ་བྱམས་པར་ཤིན་ཏུ་གནས། །སྟོང་པ་ཉིད་ལ་གནས་པར་གྱུར་པས་ན། །རྒྱལ་བའི་བསྟན་པ་དག་ལ་ཐེ་ཚོམ་མེད། །མཚན་མ་མེད་པར་གནས་པར་གྱུར་པས་ན། །དེ་ལ་སྨོན་ལམ་འདེབས་པའང་ཡོང་མེད་དེ། །རླུང་རྣམས་ནམ་མཁའ་དག་ལ་མི་ཐོགས་བཞིན། །དཔའ་བོ་དེ་དག་འགྲོ་བར་མི་ཆགས་སོ། །བསྐལ་པ་མང་པོར་བྱེ་བར་ཀུན་འཁོར་ཞིང་། །སེམས་ཅན་བྱེ་བ་མང་པོ་སྟོན་པར་བྱེད། །ཀུན་དུ་ཀུན་ནས་ཉོན་མོངས་མི་འགྱུར་ཏེ། །དེ་ནི་བྱང་ཆུབ་དམ་པ་འཚང་རྒྱ་ནུས། །གལ་ཏེ་བདུད་ཀྱིས་སངས་རྒྱས་བྱེ་བསྟན་ཏེ། །དེ་དག་ཉན་ཐོས་ཀྱིས་ཤེས་སྨྲ་ན་ཡང་། །ངས་ནི་ཆོས་ཉིད་ཡང་དག་རབ་རྟོགས་ཏེ། །ཁྱོད་ནི་འདྲེན་པ་མིན་ཞེས་དེ་སྨྲའོ། །དྲི་མ་མེད་པའི་ཡེ་ཤེས་མིག་སྦྱངས་ཏེ། །བདག་ནི་ཐེ་ཚོམ་མ་ལུས་རྣམ་པར་བྱང་། །སྟོང་པར་བདག་ནི་གཞན་དྲིང་གི་མི་འཇོག །ཁྱོད་ནི་གང་ཟག་མཆོག་མིན་ཕར་དེང་ཤིག །དེ་ལྟར་རྒྱལ་བས་ཆོས་ཉིད་བསྟན་པས་ན། །གང་ལ་འདྲེན་པའི་སྲས་རྣམས་གནས་པ་ལ། །བྱེ་བ་ཁྲག་ཁྲིག་བདུད་ཀྱིས་ཐུབ་དཀའ་སྟེ། །ཇི་ལྟར་རི་བོ་བསྐྱོད་པར་མི་ནུས་བཞིན། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལས་སྟོང་པ་ཉིད་དང་ལྡན་པའི་ཚིགས་སུ་བཅད་པ་དེ་དག་ཐོས་ནས་འདི་ལྟ་བུའི་དགེ་བའི་རྩ་བའི་ཤུགས་ཐོབ་སྟེ། དགེ་བའི་རྩ་བ་ཇི་ལྟ་བུའི་ཐོབ་པས་ཏ་ལ་བདུན་སྲིད་དུ་ནམ་མཁའ་ལ་འཕགས་ཏེ། དེས་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་པ་དག་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་དཔག་ཏུ་མེད་པ་རྣམས་ཐབས་མཁས་པ་རྣམ་པ་ཐ་དད་པས་བྱང་ཆུབ་སེམས་དཔའ་ཡང་དག་པར་སྒྲུབ་པ་མཐོང་།