Degé Kangyur volume 51, F.195.a

བདག་གི་ལུས་ནི་བདེ་སྟེ། སྡུག་བསྔལ་བ་མེད་དོ་སྙམ་མོ། །​གང་གི་ཚེ་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དེ་དག་ནས་ཐར་ཏེ། བརྒྱ་ལ་བརྒྱ་ལམ་ན་མིའི་ལུས་ཐོབ་པར་གྱུར་པ་དེའི་ཚེ་མངལ་ན་གནས་པས་ལུས་ཡོངས་སུ་གཟིར་ཅིང་མུན་ནག་གིས་སྐྱོ་བར་གྱུར་པའི་ལུས་ལ་བད་ཀན་དང་། མཁྲིས་པ་དང་། ལྗན་ལྗིན་དང་། ཁྲག་དང་། ཕྱི་སས་བདས་པས་སྐྱོ་བར་གྱུར་ནས། འདི་སྙམ་དུ་སེམས་ཏེ། བདག་ཅག་ལོ་བརྒྱའམ། བསྐལ་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་འབུམ་གྱི་བར་དུ་འཁོར་བ་ན་འཁོར་ཞིང་སྡུག་བསྔལ་གྱི་ཚོར་བ་མི་བཟད་ཅིང་། ཡིད་དུ་མི་འོང་བ་མྱོང་ལ། གང་དུ་ཡང་བདག་ཅག་གིས་སྐྱབས་མེད་པ་འདི་ལས་གང་དག་གི་འབྲས་བུ་རྣམ་པར་སྨིན་པ་ཡིན་ཞིག་གུ། བདག་ཅག་གིས་ཀྱང་སྔོན་སྡིག་པ་མང་དུ་བྱས་སོ་སྙམ་སྟེ། དེ་ལྟར་མངལ་ན་གནས་ནས་སེམས་ཅན་དམྱལ་བ་དང་འདྲ་བར་འགྱོད་པ་སྐྱེད་པར་བྱེད་དེ། གང་གི་ཚེ་བདག་ཅག་མངལ་ན་གནས་པའི་སེམས་ཅན་དམྱལ་བ་འདི་ལས་ཐར་བར་གྱུར་པ་དེའི་ཚེ་སངས་རྒྱས་དང་། ཆོས་དང་། དགེ་འདུན་ལ་མི་ཕྱེད་པའི་དད་པས་བསྒྲུབ་པ་དང་བཙལ་བར་བྱ་སྟེ། ཅི་ནས་ཀྱང་བདག་ཅག་ཕྱིན་ཆད་མངལ་གྱི་སེམས་ཅན་དམྱལ་བར་གནས་པར་མི་འགྱུར་བར་བྱའོ་སྙམ་མོ། །​དེ་དག་ཕྱིས་མངལ་གྱི་གནས་རྣམས་ལས་ཐར་ནས་བག་མེད་པར་བྱེད་དེ། དེ་དག་ཡང་སེམས་ཅན་དམྱལ་བ་རྣམས་སུ་སྡུག་བསྔལ་མྱོང་བར་འགྱུར་རོ། །​དེ་ལྟ་བས་ན་ནམས་ཀྱང་བག་མེད་པར་མི་བྱའོ། །​དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །​བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་སེམས་ཅན་ཐམས་ཅད་ཀྱི་སྐྱབས་བྱེད་པ་ཞེས་བྱ་བར་ཟུང་ཤིག །​བྱང་ཆུབ་སེམས་དཔས་ཞུས་པ་ཞེས་བྱ་བར་ཡང་ཟུང་ཤིག །​བཀོད་པའི་རྒྱལ་པོའི་རྣམ་པར་འཕྲུལ་པའི་རྒྱལ་པོ་ཞེས་བྱ་བར་ཡང་ཟུང་ཤིག



The English translation of this folio by 84000 - Translating the words of the Buddha can be found at:
https://read.84000.co/translation/toh114.html?part=UT22084-051-002-287#UT22084-051-002-287