།དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་དང་རྔ་སྒྲ་རྒྱལ་པོ་ལ་མཆོད་པ་བྱས་ཤིང་སྣོད་བརྒྱད་ཁྲི་བཞི་སྟོང་དེ་དག་ཕུལ་བ་དེ། གཞན་ཞིག་ཡིན་སྙམ་དུ་ཁྱོད་སོམ་ཉིའམ་ཡིད་གཉིས་སམ་ཐེ་ཚོམ་ཟ་བར་གྱུར་ན་རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ་གང་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་དང་རྔ་སྒྲ་རྒྱལ་པོ་དེ་ལ་མཆོད་པ་བྱས་པ་དང་། སྣོད་དེ་དག་ཀྱང་ཕུལ་བ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་ཉིད་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དེ་ནི་སངས་རྒྱས་མང་པོ་ལ་བསྙེན་བཀུར་བྱས་པ། སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པ། ཡོངས་སུ་སྦྱང་བ་བྱས་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདིས་སྔོན་ཡང་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་མཐོང་ངོ་། །པད་མའི་དཔལ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་མཐོང་ངམ། པད་མའི་དཔལ་གྱིས་གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། པད་མའི་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་ནི། གཟུགས་མང་པོས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏེ། འདི་ལྟ་སྟེ། ལ་ལར་ནི་ཚངས་པའི་གཟུགས་ཀྱིས། ལ་ལར་ནི་བརྒྱ་བྱིན་གྱི་གཟུགས་ཀྱིས། ལ་ལར་ནི་དབང་ཕྱུག་གི་གཟུགས་ཀྱིས། ལ་ལར་ནི་དབང་ཕྱུག་ཆེན་པོའི་གཟུགས་ཀྱིས། ལ་ལར་ནི་དམག་དཔོན་གྱི་གཟུགས་ཀྱིས། ལ་ལར་ནི་མཆོག་གི་གཟུགས་ཀྱིས། ལ་ལར་ནི་འཁོར་ལོས་སྒྱུར་བའི་གཟུགས་ཀྱིས། ལ་ལར་ནི་ཁམས་ཀྱི་རྒྱལ་པོའི་གཟུགས་ཀྱིས། ལ་ལར་ནི་ཚོང་དཔོན་གྱི་གཟུགས་ཀྱིས། ལ་ལར་ནི་ཁྱིམ་བདག་གི་གཟུགས་ཀྱིས། ལ་ལར་ནི་གྲོང་མིའི་གཟུགས་ཀྱིས། ལ་ལར་ནི་བྲམ་ཟེའི་གཟུགས་ཀྱིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏོ། །