Degé Kangyur volume 51, F.60.b

།དེ་ལྟར་མེ་ཏོག་གི་ཆར་དེ་རབ་ཏུ་ཕབ་པ་དེ་བཅོམ་ལྡན་འདས་བྱང་ཆུབ་ཀྱི་སྙིང་པོ་ལ་འདུག་པ་དེ་ལ། རྒྱུན་མི་འཆད་པར་རབ་ཏུ་ཕབ་སྟེ། བཅོམ་ལྡན་འདས་དེ་ལ་བར་གྱི་བསྐལ་པ་བཅུ་ཚང་བར་མངོན་པར་ཕབ་བོ། །​དེ་ལྟར་མེ་ཏོག་གི་ཆར་དེ་རབ་ཏུ་ཕབ་སྟེ་བཅོམ་ལྡན་འདས་དེ་དེ་ཡོངས་སུ་མྱ་ངན་ལས་འདའ་བའི་དུས་ཀྱི་བར་དུ་རབ་ཏུ་ཕབ་ཅིང་། བཅོམ་ལྡན་འདས་དེ་ལ་མངོན་པར་འཐོར་རོ། །​རྒྱལ་ཆེན་བཞིའི་རིས་ཀྱི་ལྷའི་བུ་དག་ཀྱང་། བཅོམ་ལྡན་འདས་བྱང་ཆུབ་ཀྱི་སྙིང་པོ་མཆོག་དམ་པ་ན་འདུག་པ་དེ་ལ་བཀུར་སྟི་བྱ་བའི་ཕྱིར། ལྷ་ཡུལ་པའི་ལྷའི་རྔ་རབ་ཏུ་བརྡུངས་ཏེ་བར་གྱི་བསྐལ་པ་བཅུ་ཚང་བར་རབ་ཏུ་བརྡུངས་ནས། དེ་ནས་བཅོམ་ལྡན་འདས་དེ་ནམ་ཡོངས་སུ་མྱ་ངན་ལས་འདའ་བ་ཆེན་པོའི་དུས་ཀྱི་བར་དུ། ལྷའི་སིལ་སྙན་དག་རྒྱུན་མི་འཆད་པར་རབ་ཏུ་བསིལ་ཏོ། །​དགེ་སློང་དག་དེ་ནས་བར་གྱི་བསྐལ་པ་བཅུ་འདས་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །​མངོན་པར་རྫོགས་པར་སངས་རྒྱས་མ་ཐག་ཏུ། བཅོམ་ལྡན་འདས་དེ་གཞོན་ནུར་གྱུར་པའི་ཚེ། དེ་ལ་སྙིང་གི་བུ་ཤ་སྟག་བཅུ་དྲུག་ཡོད་དེ། དེ་དག་གི་བུ་ཐུ་བོ་ནི་ཡེ་ཤེས་འབྱུང་གནས་ཞེས་བྱ་བར་འགྱུར་ཏེ། དགེ་སློང་དག་འདི་ལྟར་རྒྱལ་བུ་གཞོན་ནུ་བཅུ་དྲུག་པོ་དེ་དག་རེ་རེ་ལ་ཡང་རྩེད་མོར་བྱ་བ། སྣ་ཚོགས་བཀྲ་བ་དགའ་བར་འགྱུར་བ་བལྟ་ན་སྡུག་པ་རྣམ་པ་དུ་མ་ཡོད་ལ། དགེ་སློང་དག་དེ་ནས་རྒྱལ་བུ་གཞོན་ནུར་གྱུར་པ་བཅུ་དྲུག་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་རིག་ནས། རྩེད་མོར་བྱ་བ་དགའ་བར་འགྱུར་བ་རྣམ་པ་མང་པོ་དེ་དག་སྤངས་ཏེ། མ་དང་མ་མ་དག་བཞིན་དུ་ཡོངས་སུ་བསྐོར་ཅིང་མདུན་དུ་བདར་ནས། འཁོར་ལོས་སྒྱུར་བའི་རྒྱལ་པོ་འཕགས་པའི་མཛོད་མང་པོ་དང་རྒྱལ་པོའི་བློན་པོ་དང་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ།



The English translation of this folio by 84000 - Translating the words of the Buddha can be found at:
https://read.84000.co/translation/toh113.html?part=UT22084-051-001-6121#UT22084-051-001-6121