Degé Kangyur volume 51, F.54.a

སྨན་པ་ཆེན་པོ་དེ་བཞིན་གཤེགས། །​སྙིང་རྗེ་བདག་ཉིད་འདིར་བྱུང་སྟེ། །​སྟོན་པ་ཐབས་ལ་མཁས་པས་ན། །​དེས་ནི་དམ་པའི་ཆོས་བཤད་དེ། །​བླ་མེད་ཡང་དག་རྫོགས་བྱང་ཆུབ། །​ཐེག་པ་དམ་པར་ཞུགས་ལ་བཤད། །​འདྲེན་པས་ཤེས་རབ་འབྲིང་ལ་ཡང་། །བར་མ་དག་གི་རབ་ཏུ་བཤད། །​འཁོར་བས་འཇིགས་ལ་བྱང་ཆུབ་ཀྱང་། །​གཞན་དུ་རབ་ཏུ་བཤད་པ་ཡིན། །​ཁམས་གསུམ་ལས་ནི་བྱུང་བ་ཡི། །​ཉན་ཐོས་རྣམས་ཀྱིས་འདི་ལྟར་ཤེས། །​མྱ་ངན་འདས་པའི་དྲི་མེད་ཞི། །​བདག་གིས་རབ་ཏུ་ཐོབ་སྙམ་སེམས། །​ཆོས་ཀུན་ཁོང་དུ་ཆུད་གྱུར་ན། །​མི་འཆི་མྱ་ངན་འདས་པ་ཐོབ། །​དྲང་སྲོང་ཆེ་རྣམས་དེ་ལ་ནི། །​ཤིན་ཏུ་སྙིང་རྗེ་བསྐྱེད་ནས་སུ། །​དེ་ལ་སྨྲས་པ་བླུན་པོ་ཁྱོད། །​ཡེ་ཤེས་ཅན་དུ་བདག་མ་སེམས། །​གང་ཚེ་ཁྱོད་ནི་ཁང་པ་ཡི། །​ནང་ན་འདུག་པར་གྱུར་པ་ན། །​ཕྱི་རོལ་དག་ན་གང་ཡོད་པ། །ཤེས་རབ་ཆུང་ཁྱོད་དེ་མི་ཤེས། །​གང་ཞིག་ནང་ན་འདུག་པ་དེས། །​བྱས་དང་མ་བྱས་ཕྱི་རོལ་གྱི། །​ཤེས་བྱ་ད་དུང་མི་ཤེས་ན། །​ཤེས་ཆུང་ཁྱོད་ཀྱིས་ག་ལ་ཤེས། །​དཔག་ཚད་ལྔ་ཙམ་བར་དག་གི། །​སྒྲ་གང་བྱུང་བ་དེ་རྣམས་ཀྱང་། །​དེ་ཡང་ཐོས་པར་མི་ནུས་ན། །​དེ་བས་རིང་བ་གཞན་ཅི་སྨོས། །​ཁྱོད་ལ་གང་དག་ཉེས་སེམས་དང་། །​དེ་བཞིན་གཞན་དག་བྱམས་པ་ཡང་། །​ཁྱོད་ཀྱིས་དེ་དག་ཤེས་མི་ནུས། །​ཅི་ཕྱིར་ཁྱོད་ཀྱིས་ང་རྒྱལ་བྱ། །​རྒྱང་གྲགས་ཙམ་དུ་འགྲོ་ན་ཡང་། །​གོམ་པ་མ་བོར་འགྲོ་མི་ནུས། །​མ་ཡི་མངལ་དུ་ཅི་བྱུང་བ། །དེ་དག་དེ་མ་ཐག་ཏུ་བརྗེད། །​སུ་ལ་མངོན་ཤེས་འདི་ལྔ་ཡོད། །​དེ་འདིར་ཐམས་ཅད་ཤེས་ཞེས་བྱ། །​ཁྱོད་ནི་གཏི་མུག་ཅང་མི་ཤེས། །​བདག་ནི་ཐམས་ཅད་ཤེས་ཞེས་སྨྲ། །​ཐམས་ཅད་མཁྱེན་པར་ཁྱེད་འདོད་ན། །​འདི་ལྟར་མངོན་པར་ཤེས་པ་སྒྲུབས། །​མངོན་པར་ཤེས་པ་དེ་བསྒྲུབས་ན། །​དགོན་པར་གནས་ཤིང་རྣམ་དག་ཆོས། །​བསམ་པར་བྱ་སྟེ་དེ་ཡིས་ཁྱོད། །​མངོན་པར་ཤེས་པ་ཐོབ་པར་འགྱུར། །​དོན་གཟུང་དགོན་པར་དེ་སོང་སྟེ། །​ཤིན་ཏུ་མཉམ་བཞག་རྣམ་པར་སེམས། །​མངོན་པར་ཤེས་པ་ལྔ་ཐོབ་སྟེ། །​རིང་པོར་མི་ཐོགས་ཡོན་ཏན་ལྡན།



The English translation of this folio by 84000 - Translating the words of the Buddha can be found at:
https://read.84000.co/translation/toh113.html?part=UT22084-051-001-6108#UT22084-051-001-6108