Degé Kangyur volume 51, F.53.a

དེ་ལྟ་དེ་ལྟ་བུར་ནད་རབ་ཏུ་ཞི་བ་དེ་བཞིན་དུ་རྣམ་པར་ཐར་པའི་སྒོ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་བསྒོམས་པས་མ་རིག་པ་འགག་པར་བྱེད་ཅིང་། མ་རིག་པ་འགགས་པས་འདུ་བྱེད་འགག་པ་ནས། དེ་བཞིན་དུ་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་དེའི་བར་དུ་འགག་པར་གྱུར་ཏེ། དེ་བཞིན་དུ་དེའི་སེམས་དགེ་བ་ལ་ཡང་མི་གནས་སྡིག་པ་ལ་ཡང་མི་གནས་ཏེ། ཇི་ལྟར་དམུས་ལོང་གིས་མིག་མཐོང་བ་དེ་བཞིན་དུ་ཉན་ཐོས་དང་རང་སངས་རྒྱས་ཀྱི་ཐེག་པ་ཅན་དུ་བལྟའོ། །​འཁོར་བའི་ཉོན་མོངས་པས་བཅིངས་པ་གཅོད་ཅིང་ཉོན་མོངས་པའི་བཅིང་བ་ལས་རྣམ་པར་གྲོལ་ཏེ་ཁམས་གསུམ་གྱི་འགྲོ་བ་དྲུག་ལས་རབ་ཏུ་ཐར་བས་ན། དེའི་ཕྱིར་ཉན་ཐོས་ཀྱི་ཐེག་པ་ཅན་གྱི་འདི་ལྟར་ཤེས་ནས། འདི་སྐད་ཅེས་མངོན་པར་རྫོགས་པར་འཚང་རྒྱ་བར་བྱ་བའི་ཆོས་གཞན་མེད་དེ་བདག་ནི་མྱ་ངན་ལས་འདས་པ་ཐོབ་པོ་ཞེས་ཟེར་རོ། །​དེ་ནས་དེ་བཞིན་གཤེགས་པ་དེ་ལ་ཆོས་སྟོན་ཏེ། གང་གིས་ཆོས་ཐམས་ཅད་མ་ཐོབ་པ་དེ་ལ་མྱ་ངན་ལས་འདས་པ་ག་ལ་ཡོད་ཅེས་དེ་བཞིན་གཤེགས་པས་དེ་དག་བྱང་ཆུབ་ཏུ་བཙུད་དེ། དེ་བྱང་ཆུབ་ཀྱི་སེམས་བསྐྱེད་ནས་འཁོར་བ་ལ་ཡང་མི་གནས་མྱ་ངན་ལས་འདའ་བ་ཐོབ་པར་ཡང་མི་འགྱུར་རོ། །​དེས་ཁམས་གསུམ་རབ་ཏུ་རྟོགས་ནས་ཕྱོགས་བཅུའི་འཇིག་རྟེན་སྟོང་པ་དང་། སྤྲུལ་པ་ལྟ་བུ་དང་། སྒྱུ་མ་ལྟ་བུ་དང་། རྨི་ལམ་དང་། སྨིག་རྒྱུ་དང་། བྲག་ཅ་ལྟ་བུ་དང་། ཆོས་ཐམས་ཅད་མ་སྐྱེས་པ་དང་། མ་འགགས་པ་དང་། མ་བཅིངས་པ་དང་། མ་གྲོལ་བ་དང་། མུན་པ་ཡང་མ་ཡིན། སྣང་བ་ཡང་མ་ཡིན་པར་མཐོང་ངོ་། །​གང་གིས་དེ་ལྟར་ཆོས་ཟབ་མོ་མཐོང་བ་དང་ཐོས་པ་དེས་ཁམས་གསུམ་ཐམས་ཅད་གང་བའི་སེམས་ཅན་གྱི་བསམ་པ་དང་མོས་པ་ཐ་དད་པ་མི་མཐོང་བའི་ཚུལ་གྱིས་མཐོང་ངོ་། །​དེ་ནས་བཅོམ་ལྡན་འདས་ཀྱིས་དེའི་དོན་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །​ཇི་ལྟར་ཉི་མ་ཟླ་བའི་འོད། །​ཡོན་ཏན་ལྡན་དང་སྡིག་ཅན་གྱི། །​མི་ལ་མཉམ་པར་རབ་འཆར་ཏེ། །​དེ་ལ་སྐྱེ་ཞིང་འབྲི་བ་མེད། །​དེ་བཞིན་གཤེགས་ཀྱི་ཤེས་རབ་འོད། །​སྙོམས་པ་ཉི་མ་ཟླ་བ་བཞིན། །​ལྷག་ཅིང་ཆད་པ་མེད་པར་ནི། །



The English translation of this folio by 84000 - Translating the words of the Buddha can be found at:
https://read.84000.co/translation/toh113.html?part=UT22084-051-001-6106#UT22084-051-001-6106