།དགེ་སློང་དག་ང་བྱང་ཆུབ་སེམས་དཔར་གྱུར་པས། བཅོམ་ལྡན་འདས་དེའི་བསྟན་པ་ལ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་དཔག་ཏུ་མེད་བགྲང་དུ་མེད་པ་གང་གཱའི་ཀླུང་གི་བྱེ་མ་སྙེད་གང་དག་ཐམས་ཅད་མཁྱེན་པའི་ཆོས་ཐོས་པར་བྱ་བའི་སེམས་ཅན་དེ་དག་གང་ཞེ་ན་དགེ་སློང་དག་དེ་དག་ནི་ཁྱེད་ཡིན་ཏེ་དེའི་ཚེ་དེའི་དུས་ན་སེམས་ཅན་དག་ཏུ་གྱུར་ཏོ། །དགེ་སློང་དག་ང་མྱ་ངན་ལས་འདས་ནས་མ་འོངས་པའི་དུས་ན་ཉན་ཐོས་གང་དག་འབྱུང་བ་དེ་དག །བྱང་ཆུབ་སེམས་དཔའི་སྤྱོད་པ་ཉན་ཀྱང་བདག་ཅག་བྱང་ཆུབ་སེམས་དཔའ་ཡིན་པར་མི་ཤེས་པས། དེ་དག་ཐམས་ཅད་ཀྱང་ཡོངས་སུ་མྱ་ངན་ལས་འདའ་བར་འདུ་ཤེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །དགེ་སློང་དག་འོན་ཀྱང་འཇིག་རྟེན་གྱི་ཁམས་གཞན་དག་ན། ང་མིང་གཞན་དང་གཞན་དག་གིས་གནས་པ་དེར་དེ་དག་དེ་བཞིན་གཤེགས་པའི་ཡེ་ཤེས་ཚོལ་ཞིང་སྐྱེ་བར་འགྱུར་རོ། །དེ་ན་ཡང་དེ་བཞིན་གཤེགས་པ་རྣམས་ཀྱི་ཡོངས་སུ་མྱ་ངན་ལས་འདས་པ་གཅིག་པུ་སྟེ། འདི་ལས་གུད་ན་མྱ་ངན་ལས་འདའ་བ་གཉིས་སུ་གཞན་དག་མེད་དོ། །ཞེས་དེ་ལྟ་བུའི་བྱ་བ་འདི་ཉན་པར་འགྱུར་རོ། །དགེ་སློང་དག་ཆོས་བསྟན་པ་མངོན་པར་བསྒྲུབ་པ་དེ་ནི། དེ་བཞིན་གཤེགས་པ་རྣམས་ཀྱི་ཐབས་མཁས་པར་རིག་པར་བྱ་སྟེ། དགེ་སློང་དག་གང་གི་ཚེ་ན་དེ་བཞིན་གཤེགས་པ་བདག་ཉིད་ཡོངས་སུ་མྱ་ངན་ལས་འདའ་བའི་དུས་ཀྱང་གཟིགས་ལ་འཁོར་ཡོངས་སུ་དག་ཅིང་མོས་པ་སྙིང་པོར་བྱེད་པ། སྟོང་པའི་ཆོས་རྟོགས་པར་བྱེད་པ། སྟོང་པའི་ཆོས་རྟོགས་པར་ཁོང་དུ་ཆུད་པ། བསམ་གཏན་དང་ལྡན་པ་བསམ་གཏན་ཆེན་པོ་དང་ལྡན་པ་ཡང་གཟིགས་ན། དགེ་སློང་དག་དེ་བཞིན་གཤེགས་པ་དུས་ལ་བབ་པར་མཁྱེན་ནས། བྱང་ཆུབ་སེམས་དཔའ་ཐམས་ཅད་དང་ཉན་ཐོས་ཐམས་ཅད་བསགས་ཏེ་ཕྱིས་དོན་འདི་ཡང་དག་པར་སྒྲོགས་སོ། །དགེ་སློང་དག་འཇིག་རྟེན་ན་ཐེག་པའམ་ཡོངས་སུ་མྱ་ངན་ལས་འདས་པ་གཉིས་སུ་གང་ཡང་མེད་ན་གསུམ་དུ་ལྟ་ཅི་སྨོས། དགེ་སློང་དག་འདི་ནི་དེ་བཞིན་གཤེགས་པ་རྣམས་ཀྱི་ཐབས་མཁས་པ་སྟེ། སེམས་ཅན་ཡུན་རིང་དུ་མ་རུང་ཞིང་དམན་པ་ལ་དགའ་བ་འདོད་པ་ལ་ཆགས་པར་མཁྱེན་ནས། དགེ་སློང་དག་དེ་དག་གང་ལ་མོས་པ་བཞིན་དུ་དེ་དག་ལ་དེ་བཞིན་གཤེགས་པ་མྱ་ངན་ལས་འདས་པ་དེ་འཆད་དོ།