སེམས་ཅན་སྐྱེ་བ་མེད་པའི་ཕྱིར་དང་། སེམས་ཅན་འགག་པ་མེད་པའི་ཕྱིར་དང་། སེམས་ཅན་སྟོང་པ་ཉིད་ཀྱི་ཕྱིར་རོ། །དེ་བཞིན་དུ་སྲོག་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་པ་དང་། ཤེད་བུ་དང་། བྱེད་པ་པོ་དང་། བྱེད་པ་པོ་ཉིད་དང་། སློང་བ་པོ་དང་། ཀུན་ནས་སློང་བ་པོ་དང་། ཚོར་བ་པོ་དང་། ཚོར་བར་བྱེད་པ་པོ་དང་། ཤེས་པ་པོ་དང་། མཐོང་བ་པོ་མེད་པའི་ཕྱིར་དང་། མི་དམིགས་པའི་ཕྱིར་དང་། སྐྱེ་བ་མེད་པའི་ཕྱིར་དང་། འགག་པ་མེད་པའི་ཕྱིར་དང་། སྟོང་པ་ཉིད་ཀྱི་ཕྱིར་རོ། །ཆོས་རྣམས་ཀྱང་སྐྱེ་བ་མེད་པ་དང་། འགག་པ་མེད་པ་དང་། སྟོང་པ་དང་། གཡོ་བ་མེད་པ་དང་། གསོ་བ་དང་། ཡ་མ་བརླ་དང་། བདག་པོ་མེད་པ་དང་། བྱུང་བ་མེད་པ་དང་། མ་བྱས་པ་དང་། མངོན་པར་འདུས་མ་བྱས་པ་དང་། བྱེད་པ་པོ་དང་བྲལ་བའོ། །དེ་ཅིའི་ཕྱིར་ཞེ་ན། འདི་ལྟར་གཟུགས་དེ་ནི་འདི་ལྟ་སྟེ། མིང་ཙམ་མོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་དེ་བཞིན་ནོ། །རྒ་བ་དང་། འཆི་བའི་བར་དུ་ཡང་དེ་བཞིན་དུ་སྦྱར་རོ། །དྲན་པ་ཉེ་བར་གཞག་པ་བཞི་ཞེས་བྱ་བ་འདི་དག་ནི་འདི་ལྟ་སྟེ། མིང་ཙམ་མོ། །འཕགས་པའི་ལམ་ཡན་ལག་བརྒྱད་པའི་བར་དུ་ཡང་དེ་བཞིན་དུ་སྦྱར་རོ། །རྣམ་པར་ཐར་པའི་སྒོ་གསུམ་པོ་འདི་དག་ནི་འདི་ལྟ་སྟེ་མིང་ཙམ་མོ། །དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་དུ་ཡང་དེ་བཞིན་དུ་སྦྱར་རོ། །དེ་བཞིན་གཤེགས་པའི་སྟོབས་བཅུ་པོ་འདི་དག་ནི་འདི་ལྟ་སྟེ། མིང་ཙམ་མོ། །རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་ཡང་དེ་བཞིན་དུ་སྦྱར་རོ། །ཕ་རོལ་ཏུ་ཕྱིན་པ་དྲུག་པོ་འདི་དག་ནི་འདི་ལྟ་སྟེ། མིང་ཙམ་མོ། །དཔེ་བྱད་བཟང་པོ་བརྒྱད་ཅུའི་བར་དུ་ཡང་དེ་བཞིན་དུ་སྦྱར་རོ། །ཤ་ར་དྭ་ཏིའི་བུ་མིང་ཙམ་པོ་གང་དག་ཡིན་པ་དེ་དེ་ལ་ཡང་དག་པར་ཡོངས་སུ་གྲུབ་པ་འགའ་ཞིག་ཡོད་དམ། གསོལ་པ་བཙུན་པ་བཅོམ་ལྡན་འདས་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་འདི་ཇི་སྙམ་དུ་སེམས། གལ་ཏེ་ཡོངས་སུ་གྲུབ་པར་ལྟ་ཞིང་དམིགས་ལ་འཛིན་ཅིང་མཚན་མར་བྱེད། རྟོག་པ་དང་དཔྱོད་པར་བྱེད་ན། དེ་ལྟ་བ་ཡོངས་སུ་འཛིན་པ་དང་། སེམས་རྣམ་པར་རྨོངས་པ་ཡིན་ནམ་གསོལ་པ། བཅོམ་ལྡན་འདས་དེ་ལྟ་ལགས་སོ།