Degé Kangyur volume 48, F.157.b

དེ་ནི་ལས་ཇི་ལྟ་བ་བཞིན་ནོ། །​དེས་ན་དེ་བཞིན་གཤེགས་པ་བདེན་པ་གསུང་བ། ཡང་དག་པར་གསུང་བ་ནི་འདི་སྐད་དུ་ལས་ཡོད་ན་རྣམ་པར་སྨིན་པ་འབྱུང་ངོ་། །​དེ་ལྟར་ལས་ཇི་ལྟ་ཇི་ལྟ་བར་དེ་ལྟ་དེ་ལྟར་རྣམ་པར་སྨིན་པའོ་ཞེས་གསུང་ངོ་། །​ཤ་ར་དྭ་ཏིའི་བུ་དེ་བཞིན་དུ་ཡེ་ཤེས་ཀྱི་འགྲོ་བ་ནི་ཡེ་ཤེས་ཡིན་གྱི་ཤ་ར་དྭ་ཏིའི་བུ་འདི་ནི་ཡེ་ཤེས་མེད་པ་ནི་མ་ཡིན་ནོ། །​ཤ་ར་དྭ་ཏིའི་བུ་དེ་ལས་བྱང་ཆུབ་སེམས་དཔའ་ནི་དེ་སྐད་བསྟན་པ་ན་མི་སྐྲག །​མི་དངང་དངང་བར་མི་འགྱུར་ཏེ། མི་རྨོངས་ཀུན་དུ་མི་རྨོངས་སོ། །​ཤ་ར་དྭ་ཏིའི་བུ་ཆོས་བཞི་པོ་འདི་དག་ནི་སླུ་བར་འགྱུར་བ་སྟེ། བཞི་གང་ཞེ་ན། ཤ་ར་དྭ་ཏིའི་བུ། གཅེར་བུ་པའི་སྨྲ་བ་དང་། འཇིག་རྟེན་རྒྱང་ཕན་པ་ཀུན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པ་སླུ་བར་འགྱུར་བ་ཡིན། ཤ་ར་དྭ་ཏིའི་བུ་ལོག་པར་ལྟ་བ་ཀུན་དུ་བསྟེན་ཅིང་བསྒོམས་ལ་ལན་མང་དུ་བྱས་པ་སླུ་བར་འགྱུར་བ་ཡིན། །​ཤ་ར་དྭ་ཏིའི་བུ་རྩོད་པ་དང་ཕྲད་པ་ཡོངས་སུ་འཛིན་པ་ཀུན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པ་སླུ་བར་འགྱུར་བ་ཡིན། མདོ་སྡེ་ཟབ་མོ་ཟབ་པའི་གཏམ་དང་ལྡན་པ། སྟོང་པ་ཉིད་དང་ལྡན་པ། འདི་ལྟ་བུ་དག་ལ་མ་དད་ཅིང་མི་མཁས་ལ་བསྙེན་བཀུར་མི་བྱེད་ཅིང་། ངེས་པར་མི་སེམས་པ་སླུ་བར་འགྱུར་བ་ཡིན་ཏེ། ཤ་ར་དྭ་ཏིའི་བུ་བཞི་པོ་དེ་དག་ནི་སླུ་བར་བྱེད་པའི་ཆོས་དག་ཡིན་གྱི་སླུ་བར་མི་བྱེད་པ་དག་ནི་མ་ཡིན་ནོ། །​ཤ་ར་དྭ་ཏིའི་བུ་སླུ་བར་བྱེད་པའི་ཆོས་བཞི་པོ་དེ་དག་ཀྱང་སྤོང་བའི་ཕྱིར་སླུ་བར་མི་བྱེད་པའི་ཆོས་བཞི་པོ་དག་བསྒོམ་པར་བྱ་བསྟེན་པར་བྱའོ། །​བཞི་གང་ཞེ་ན། ལོག་པར་ལྟ་བ་སྤང་བའི་ཕྱིར་ཡང་དག་པའི་ལྟ་བ་བསྒོམ་པར་བྱ་བ་ཡིན། ཤ་ར་དྭ་ཏིའི་བུ་གང་ལ་འཇིག་རྟེན་རྒྱང་ཕན་པ་དང་ལྡན་པའི་གཏམ་ཡོད་པ་དེ་ལ་དགེ་སློང་ངོ་ཚ་ཤེས་པ་དེས་གནས་པར་མི་བྱ་ཞིང་མྱུར་བ་ཁོ་ནར་འགྲོ་བར་བྱ་བ་འདི་ནི་སླུ་བ་སྤོང་བར་འགྱུར་བའི་ཆོས་གཉིས་པ་ཡིན་ནོ། །​ཤ་ར་དྭ་ཏིའི་བུ་གཞན་ཡང་གནས་གང་དུ་རྩོད་པ་དང་ཕྲད་པར་འགྱུར་བ་དེར་དགེ་སློང་གིས་འགྲོ་བར་མི་བྱ་ཞིང་། གཞན་དུ་ན་རྩོད་པ་དེ་ཉེ་བར་ཞི་བར་བྱ་བའི་ཕྱིར་དེར་སོང་བས་ཀྱང་ཆོས་མ་ཡིན་པ་སྨྲ་བ་རྣམས་ཚར་གཅོད་པ་དང་། ཆོས་སྨྲ་བ་རྣམས་བསྡུ་བའི་ཕྱིར་ཆོས་ཉིད་སྨྲ་བར་བྱའི་



The English translation of this folio by 84000 Translating the words of the Buddha can be found at:
https://read.84000.co/translation/toh101.html?part=UT22084-048-001-4330#UT22084-048-001-4330