།ཐོས་ནས་དེ་ལའང་དགའ་བ་སྐྱེད་བྱེད་ལ། །སངས་རྒྱས་ཞིང་དེར་སྨོན་ལམ་འདེབས་བྱེད་པ། །ལུས་ཞིག་ནས་ནི་དེར་ཡང་སྐྱེ་བར་འགྱུར། །ཞིང་ཡང་དག་པར་སྐྱེ་བར་འགྱུར་བ་ཡིན། །སྐྱེས་པ་བུད་མེད་འོན་ཏེ་གཞན་ཡང་རུང་། །གང་གིས་མིང་ཐོས་ནམ་ཞིག་དད་བྱེད་པ། །ཐམས་ཅད་བྱང་ཆུབ་ཆེད་ལས་ཉམས་མི་འགྱུར། །གང་དག་གཅེར་བུའི་སེམས་ཅན་མ་གཏོགས་པར། །ཐོས་ནས་སུ་ཞིག་དགའ་བ་སྐྱེ་མི་འགྱུར། །སངས་རྒྱས་ཀྱིས་ཀྱང་དེ་ནི་ཡོང་མ་གསུངས། །འོན་ཀྱང་དེ་དག་དགེ་དང་ལྡན་པར་འགྱུར། །གང་དག་བསམ་པས་མིང་ཡང་ཐོས་པ་ནི། །ཇི་ལྟར་རྩི་ཡིས་སྐྱོན་རྣམས་སེལ་བྱེད་བཞིན། །སེམས་ཅན་དེ་དག་གིས་ནི་དེར་མཐོང་བ། །བྱང་ཆུབ་དོན་དུ་ངེས་འགྱུར་ཐེ་ཚོམ་མེད། །གང་ཞིག་པ་ལ་ཤ་ཡི་འདབ་ཐོགས་ཤིང་། །དེ་དང་དེར་ནི་རྩི་དག་བྱེད་གྱུར་ན། །དེ་ཚེ་ཀུན་ནས་སྨན་གྱི་སྟོབས་ཀྱིས་སུ། །སུས་ཀྱང་དེར་ནི་མེ་ལ་ཚིག་མི་འགྱུར། །གང་ཚེ་སྦྲུལ་གདུག་གཟི་བརྗིད་དྲག་པོ་ཡིས། །དུག་གང་དེ་དག་མི་གདུག་བྱེད་འགྱུར་ཏེ། །ས་ཡི་སྟེང་ནས་ཀུན་ཏུ་སྟོན་བྱེད་ན། །དེ་འདྲའི་སྨན་བརྐོས་པས་ནི་ཅི་ཞིག་བྱ། །སྦྲུལ་གདུག་དྲི་ནི་གང་དག་སྣོམ་བྱེད་པ། །སྦྲུལ་དེ་ཐམས་ཅད་འཆི་བའི་དུས་བྱེད་འགྱུར། །དེ་ལྟར་རྩི་སྨན་འདྲ་བའི་མི་དེ་ནི། །མིང་གིས་སངས་རྒྱས་མཛད་པ་བྱེད་པར་འགྱུར། །དེ་ཚེ་ཕྱོགས་བཅུ་དག་ཏུ་བསྒྲགས་པ་ན། །དཔའ་བོ་དེ་ཡི་མིང་ནི་སུས་ཐོས་པ། །དེ་ཡི་མིང་གིས་ལས་ནི་འདི་བྱེད་དེ། །བུད་མེད་གང་ཟག་ལ་ནི་རེག་མི་འགྱུར། །གང་གིས་མཐོང་དང་བསྟི་སྟང་བྱེད་ཅི་སྨོས། །དེ་ནི་རྒྱལ་བས་དགེ་སློང་གང་སྤྲུལ་པ། །ཀུན་དགའ་བཟང་པོ་ཞེས་ནི་བྱ་བ་དེས། །རྒྱལ་བས་དེ་སྐད་བསྒྲགས་པ་དེ་འདྲ་བ། །བྱང་ཆུབ་ཞུགས་པ་སུ་མཆིས་དེ་ལ་ཞུས། །ཀུན་དགའ་བཟང་པོ་གོ་ཆ་དཔའ་བོའི་མིང་། །འཇིག་རྟེན་ཁམས་འདིར་ཡོད་ཅེས་ངས་ཐོས་ན། །ཞུམ་པ་མེད་པའི་ཡིད་ཀྱིས་བརྗོད་པར་བྱ། །དེ་ལྟར་བདེ་བར་གཤེགས་པས་ཟབ་བསྟན་པ། །རྒྱལ་བའི་བྱང་ཆུབ་ཡིད་ཆེས་དཀའ་བ་ཡི། །སེམས་ཅན་དགེ་བ་ཆུང་དང་ལྡན་པ་ལྷགས། །ད་ལྟར་ང་ཡི་ཚེ་ནི་ཅུང་ཟད་གནས། །ཀུན་དགའ་འདི་ན་སེམས་ཅན་མཆོག་ཡོད་དེ།