Degé Kangyur volume 48, F.169.b

ལགས་སོ། །​བཅོམ་ལྡན་འདས་མི་དེས་བསོད་ནམས་མ་ལགས་པའི་ཕུང་པོ་ཤིན་ཏུ་ཆེན་པོ་བསྐྱེད་པར་འགྱུར་ལགས་སོ། །​བཀའ་སྩལ་པ། ཤ་ར་དྭ་ཏིའི་བུ་ཁྱོད་མོས་པར་བྱ། ཁོང་དུ་ཆུད་པར་བྱ་སྟེ། ཤ་ར་དྭ་ཏིའི་བུ་མི་དེས་དགྲ་བཅོམ་པའི་ཚོགས་དེ་སྙེད་སྲོག་དང་ཕྲལ་བར་གྱུར་ལ། གང་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པའི་ཐེག་པས་འགྲོ་བ། རྫོགས་པའི་སངས་རྒྱས་ཀྱི་ཆོས་ཀྱི་གྲོང་ཁྱེར་ཆེན་པོར་འཇུག་པར་འདོད་པ། བྱང་ཆུབ་ཀྱི་སེམས་དེ་ལས་མོས་པ་ཟློག་པར་བྱེད་ཅིང་། བྱང་ཆུབ་ཀྱི་སེམས་དེ་ཡང་རྐྱེན་དེས་མོས་པ་བཟློག་པར་དམིགས་ནས་བྱང་ཆུབ་ཀྱི་སེམས་འདོར་བར་བྱེད་ན། ཤ་ར་དྭ་ཏིའི་བུ་བསོད་ནམས་མ་ཡིན་པའི་ཕུང་པོ་སྔ་མ་དེས་ནི་བསོད་ནམས་མ་ཡིན་པའི་ཕུང་པོ་དེ་ལ་བརྒྱའི་ཆར་ཡང་ཉེ་བར་མི་འགྲོ་བ་ནས། རྒྱུའི་བར་དུ་ཡང་མི་བཟོད་དོ། །​དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་དགྲ་བཅོམ་པའི་ཚོགས་དེ་སྙེད་རབ་ཏུ་རྣམ་པར་བཤིག་པས་ནི་དེ་བཞིན་གཤེགས་པའི་སྟོབས་བཅུ་ཉམས་པར་བྱས་པ་མ་ཡིན། དེ་བཞིན་གཤེགས་པའི་མི་འཇིགས་པ་བཞི་ཉམས་པར་བྱས་པ་མ་ཡིན། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཉམས་པར་བྱས་པ་མ་ཡིན། བྱམས་པ་ཆེན་པོ་ཉམས་པར་བྱས་པ་མ་ཡིན། སྙིང་རྗེ་ཆེན་པོ་ཉམས་པར་བྱས་པ་མ་ཡིན། དེ་བཞིན་གཤེགས་པའི་གླང་པོ་ཆེའི་གཟིགས་སྟངས་ཉམས་པར་བྱས་པ་མ་ཡིན། དེ་བཞིན་གཤེགས་པའི་སེང་གེ་ལྟར་བསྒྱིངས་པ་ཉམས་པར་བྱས་པ་མ་ཡིན། སྤྱི་གཙུག་བལྟར་མི་མཐོང་བ་ཉམས་པར་བྱས་པ་མ་ཡིན། ཆོས་ཀྱི་མུར་འགྲམ་འབུམ་ཕྲག་དུ་མས་ཀུན་ནས་ཡོངས་སུ་གང་བ་ཉམས་པར་བྱས་པ་མ་ཡིན། ཆོས་ཀྱི་འཁོར་ལོ་བསྐོར་བ་བླ་ན་མེད་པ་ཉམས་པར་བྱས་པ་མ་ཡིན། དེ་བཞིན་གཤེགས་པའི་ཁྱུ་མཆོག་ཏུ་གྱུར་པ་ཉམས་པར་བྱས་པ་མ་ཡིན། སེམས་ཅན་གྱི་དབང་པོ་མཆོག་དང་། མཆོག་མ་ཡིན་པ། མཁྱེན་པ། ཉམས་པར་བྱས་པ་མ་ཡིན། མོས་པ་སྣ་ཚོགས་མཁྱེན་པ་ཉམས་པར་བྱས་པ་མ་ཡིན་



The English translation of this folio by 84000 Translating the words of the Buddha can be found at:
https://read.84000.co/translation/toh101.html?part=UT22084-048-001-4354#UT22084-048-001-4354