དེ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་སོང་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་དེ་བཞིན་གཤེགས་པ་སངས་རྒྱས་ཐམས་ཅད་ཀྱི་སྐུ་ཀུན་ཏུ་སྟོན་པའི་དཔལ་སྙུན་གསོལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཅི་བཅོམ་ལྡན་འདས་དེ་སྙུན་མི་མངའའམ། སྟོབས་དང་ལྡན་ནམ། འགྱུར་བ་མི་མངའའམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེ་ལྟར་དེ་བཞིན་གཤེགས་པ་སངས་རྒྱས་ཐམས་ཅད་ཀྱི་སྐུ་ཀུན་ཏུ་སྟོན་པ་ལ་སོགས་པ་བཅོམ་ལྡན་འདས་དེ་བཞིན་གཤེགས་པ་དམིགས་པ་མཐའ་ཡས་པའི་སངས་རྒྱས་ཀྱི་སྐུ་ཀུན་ཏུ་སྟོན་པའི་སངས་རྒྱས་ཀྱི་ཞིང་དང་། དེ་བཞིན་དུ་དེ་བཞིན་གཤེགས་པ་པད་མ་བཀོད་པའི་ཁྱུ་མཆོག་དང་། དྲ་བ་ཅན་གྱི་འོད་དང་། འོད་མཐའ་ཡས་སངས་རྒྱས་མེ་ཏོག་འབྱུང་དང་། རིན་ཆེན་སཱ་ལ་དང་། རིན་ཆེན་ཟླ་བའི་ཁྱུ་མཆོག་དང་། རྩིའི་རྒྱལ་པོ་དང་། སྨན་དང་། ཡེ་ཤེས་མཆོག་དང་། མངོན་དུ་འཕགས་པའི་གོ་ཆ་དང་། ལྷུན་པོ་གོང་ན་མེད་པ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། མེ་ཏོག་བརྩེགས་དང་། མེ་ཏོག་རབ་གཏོར་དང་། རྟག་ཏུ་མཛེས་པའི་འོད་ཟེར་དང་། བླ་ན་མེད་པའི་འོད་ཟེར་དང་། མི་གཡོས་རྣམ་པར་གནོན་དང་། གོམ་པས་རྣམ་པར་གནོན་དང་། གོམ་པ་མཐའ་ཡས་པས་རྣམ་པར་གནོན་དང་། སྨོན་ལམ་མཐའ་ཡས་དང་། སྤོབས་པ་དཔག་མེད་དང་། ཁྱུ་མཆོག་མཐའ་ཡས་དང་། སྨོན་ལམ་ངེས་པ་དང་། མངལ་འགྱུར་མཛད་དང་། སྐྱོན་མེད་འགྱུར་མཛད་སྨོན་ལམ་དང་། དམིགས་པའི་གོ་ཆ་དང་། སངས་རྒྱས་ནམ་མཁའ་དང་། འབྱུང་བའི་དཔལ་གྱི་སངས་རྒྱས་ཀྱི་ཞིང་དང་། དེ་བཞིན་གཤེགས་པ་དེ་དག་དང་། གཞན་དག་གི་སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པ་དག་འཇིག་རྟེན་གྱི་ཁམས་མི་མཇེད་འདིར་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ།