སྤྱན་རྣམ་པར་དག་པ་དང་། དོན་ཡོད་པའི་གོམ་པས་རྣམ་པར་གནོན་དང་། སྤོས་ཀྱི་གླང་པོ་ཆེ་དང་། སྤོས་ཀྱི་དཔལ་དང་། སྤོས་ཀྱི་ལྷུན་པོ་དང་། སྤྱན་ཚད་མེད་པ་དང་། སྤོས་བརྩེགས་དང་། རིན་ཆེན་ལྷུན་པོ་དང་། ཤིན་ཏུ་རབ་གནས་དང་། ཤིན་ཏུ་རབ་ཏུ་གནས་པའི་རྒྱལ་པོ་དང་། སཱ་ལའི་དབང་པོའི་རྒྱལ་པོ་དང་། འོད་ཀྱི་དཀྱིལ་འཁོར་འཛིན་དང་། མེ་སྒྲོན་དང་། སྐར་མདའ་སྒྲོན་མ་དང་། བརྩོན་འགྲུས་དོན་ཡོད་དང་། ཤིན་ཏུ་ཡང་དག་བརྟགས་ཀྱི་གོ་ཆ་དང་། སེང་གེ་དང་། སེམས་ཅན་གྱི་ཁ་ལོ་སྒྱུར་བ་དང་། རབ་མཆོག་རབ་ཏུ་གནས་པའི་རྒྱལ་པོའི་སངས་རྒྱས་ཀྱི་ཞིང་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སོགས་པ་གྲངས་མེད་དཔག་ཏུ་མེད་པ་དག་གི་སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་གཅིག་གིས་ཐོགས་པ་གྲངས་མེད་དཔག་ཏུ་མེད་པ་དག་འཇིག་རྟེན་གྱི་ཁམས་མི་མཇེད་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ།། །།བམ་པོ་དགུ་པ། དེའི་ཚེ་སྟེང་གི་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་ཙན་དན་སྤོས་ཀྱི་འོད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡུལ་མཐའ་ཡས་པར་མངོན་པར་འཕགས་པའི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ང་རོ་དཔག་ཏུ་མེད་ཅེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་ང་རོ་དཔག་ཏུ་མེད་ཀྱིས་སྣང་བ་ཆེན་པོ་དེ་མཐོང་ཞིང་གསུང་བསལ་བའི་སྒྲ་དེ་ཡང་ཐོས་ནས། དེ་བཅོམ་ལྡན་འདས་དེ་བཞིན་གཤེགས་པ་ཡུལ་མཐའ་ཡས་པར་མངོན་དུ་འཕགས་པའི་རྒྱལ་པོ་ག་ལ་བ་དེར་སོང་སྟེ། ཕྱིན་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་གསོལ་པ། བཅོམ་ལྡན་འདས་འོད་གདའ་བ་དེ་དང་གསུང་བསལ་བའི་སྒྲ་གྲག་པ་དེ་སུའི་ལགས།