Degé Kangyur volume 2, F.164.a

ཚེ་དང་ལྡན་པ་འོད་སྲུང་ཆེན་པོས་དེའི་བསམ་པ་སེམས་ཀྱིས་ཤེས་ནས་དེའི་མངོན་སུམ་ཁོ་ནར་འབབ་པའི་རྩིག་དྲུང་ཞིག་ཏུ་འདུག་ནས་འཐུངས་པ་དང་། དེས་བསམས་པ། ཅུང་ཟད་དུ་ན་བདག་གི་སེམས་བསྲུང་བའི་ཕྱིར་གསོལ་གྱི། འོན་ཀྱང་འདིས་ཟས་ཀྱི་གོ་ཆོད་པར་ནི་མ་བྱས་སོ་སྙམ་པ་དང་། དེ་ནས་ཚེ་དང་ལྡན་པ་འོད་སྲུང་ཆེན་པོས་དེའི་བསམ་པ་སེམས་ཀྱིས་ཤེས་ནས་གྲོང་ཕྱི་ཉུག་མ་དེ་ལ་འདི་སྐད་ཅེས་སྨྲས་སོ། །​སྲིང་མོ་རབ་ཏུ་དགའ་བ་སྐྱེད་ཅིག་དང་ཁྱོད་ཀྱིས་བྱིན་པའི་ཟས་འདིས་ཁོ་བོ་ཉིན་ཞག་གཅིག་འདའ་བར་བྱའོ། །​དེ་ལྷག་པར་དགའ་བ་སྐྱེས་ནས་བདག་གིས་འཕགས་པ་འོད་སྲུང་ཆེན་པོ་ལ་བསོད་སྙོམས་བསྟབས་ན་བཞེས་སོ་སྙམ་ནས། ཚེ་དང་ལྡན་པ་འོད་སྲུང་ཆེན་པོ་ལ་སེམས་དང་བ་བསྐྱེད་ནས་ཤི་བས་དགའ་ལྡན་གྱི་ལྷའི་རིས་སུ་སྐྱེས་སོ། །​ལྷ་རྣམས་ཀྱི་དབང་པོ་བརྒྱ་བྱིན་གྱིས་དེས་འབྲས་ཁུ་ཞིག་ཕུལ་ནས་སེམས་མངོན་པར་དད་པར་བྱས་ནས་ཤི་བ་ནི་མཐོང་ན་གང་དུ་སྐྱེས་པ་མ་མཐོང་ནས། དེས་སེམས་ཅན་དམྱལ་བར་བརྟག་པར་བརྩམས་ན་ཡང་མ་མཐོང་། དུད་འགྲོ་དང་། ཡི་དགས་དང་། མི་དང་། རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་པ་རྣམས་སུ་ཡང་མ་མཐོང་སྟེ། འདི་ལྟར་ལྷ་རྣམས་ཀྱི་ཤེས་པ་མཐོང་བ་ནི་འོག་ཏུ་འཇུག་གི་གོང་དུ་མི་འཇུག་གོ། །​།འདུལ་བ་གཞི། བམ་པོ་བཞི་བཅུ་པ། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། འོད་སྲུང་བདག་ཉིད་ཆེན་པོ་ཅན། །​བསོད་སྙོམས་ཕྱིར་ནི་རྒྱུ་བ་ན། །​འོད་སྲུང་འབྲས་ཁུ་ཕུལ་བ་ཡི། །​བུད་མེད་དེ་ནི་གར་དགའ་ལགས། །​བཅོམ་ལྡན་འདས་ཀྱིས་བཀའ་སྩལ་པ། དགའ་ལྡན་ཞེས་བྱའི་ལྷ་དེ་རྣམས། །​འདོད་པ་ཐམས་ཅད་འབྱོར་པ་སྟེ། །​འོད་སྲུང་འབྲས་ཁུ་ཕུལ་བ་ཡི། །​བུད་མེད་དེ་ནི་དེ་ན་དགའ། །​དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། རེ་ཞིག་མི་འདི་དག་ནི་བསོད་ནམས་མངོན་སུམ་དུ་མ་མཐོང་ན་ཡང་སྦྱིན་པ་དག་གཏོང་། བསོད་ནམས་དག་བྱེད་ན། བདག་བསོད་ནམས་དག་མངོན་སུམ་དུ་མཐོང་ཞིང་རང་གི་བསོད་ནམས་ཀྱི་འབྲས་བུ་ལ་གནས་པ་གོ་ཅིའི་ཕྱིར་སྦྱིན་པ་དག་མི་གཏང་བསོད་ནམས་དག་མི་བྱ་སྙམ་ནས།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8222#UT22084-001-006-8222