Degé Kangyur volume 2, F.149.b

།དེ་ནས་སྔོན་སྦལ་པ་བྱེད་བྱེད་པའི་ལྷའི་བུས་རྣ་ཆ་དྲི་མ་མེད་པ་གཡོ་བ་ཐོགས་ནས་ཞེས་བྱ་བ་ནས་གང་གཱའི་འགྲམ་ཐམས་ཅད་སྣང་བ་རྒྱ་ཆེན་པོས་གསལ་བར་བྱས་ཏེ་བཅོམ་ལྡན་འདས་ལ་མེ་ཏོག་གིས་གཏོར་ནས་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ་ཞེས་བྱ་བའི་བར་གོང་མ་བཞིན་དུའོ། །​དེ་ནས་བཅོམ་ལྡན་འདས་ཀྱིས་སྔོན་སྦལ་པ་བྱེད་བྱེད་པའི་ལྷའི་བུའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་དེ་དང་མཐུན་པ་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བའི་ཆོས་བཤད་པ་མཛད་དེ། དེ་ཐོས་པ་ཞེས་བྱ་བ་ནས་ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་ཏེ། བཙུན་པ་བདག་ནི་འཕགས་སོ། །​མངོན་པར་འཕགས་སོ་ཞེས་བྱ་བའི་བར་གོང་མ་བཞིན་དུའོ། །​བདག་བཅོམ་ལྡན་འདས་དང་ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །​དེ་ནས་སྔོན་སྦལ་པ་བྱེད་བྱེད་པའི་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཏོག་ལེགས་པ་ལྟ་བུ་དང་། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཐར་བ་ལྟ་བུར་འབྱོར་པ་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་འབྱོར་པ་དེ་ཉིད་དང་རང་གི་གནས་སུ་སོང་ངོ་། །དགེ་སློང་རྣམས་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བ་ལ་བརྩོན་ཞིང་གནས་པ་དེ་རྣམས་ཀྱིས་བཅོམ་ལྡན་འདས་ཀྱི་སྤྱན་སྔ་ན་སྣང་བ་རྒྱ་ཆེན་པོ་མཐོང་ངོ་། །​དེ་མཐོང་ནས་ཀྱང་ཐེ་ཚོམ་དུ་གྱུར་ནས་བཅོམ་ལྡན་འདས་ལ་ཞུས་པ། ཅི་ལགས། བཅོམ་ལྡན་འདས་མ་དང་བཅོམ་ལྡན་འདས་ལ་བལྟ་བའི་སླད་དུ་མི་མཇེད་ཀྱི་བདག་པོ་ཚངས་པའམ། ལྷ་རྣམས་ཀྱི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞི་མཆིས་སམ། དགེ་སློང་དག་ང་བལྟ་བའི་ཕྱིར་མི་མཇེད་ཀྱི་བདག་པོ་ཚངས་པ་འོངས་པ་ཡང་མ་ཡིན། ལྷ་རྣམས་ཀྱི་དབང་པོ་བརྒྱ་བྱིན་ཡང་མ་ཡིན།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8193#UT22084-001-006-8193