Degé Kangyur volume 2, F.147.b

ཁོང་རུལ་བ་ཞེས་བྱ་བ་ནི་ཇི་ལྟར་འདི་ན་ལ་ལ་ཚུལ་ཁྲིམས་འཆལ་པ། སྡིག་པའི་ཆོས་ཅན། ཁོང་མྱགས་ཤིང་ཕྱིར་འཛག་པ། ཤིང་རུལ་ལྟ་བུར་གྱུར་པ། ལུང་བོང་ལྟར་སྤྱོད་པ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ་ཡོད་པ་ལྟ་བུ་ཡིན་ཏེ། དགེ་སློང་ཁྱོད་ཀྱིས་གལ་ཏེ་དེ་བཞིན་དུ་ཚུ་རོལ་གྱི་འགྲམ་དུ་མ་ཐོགས་ཞེས་བྱ་བ་ནས། མྱ་ངན་ལས་འདས་པ་ལ་བབ་པར་འགྱུར་རོ་ཞེས་བྱ་བའི་བར་གོང་མ་བཞིན་དུའོ། །​དེ་ནས་དགེ་སློང་དེས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །​དེ་ནས་དགེ་སློང་དེ་བཅོམ་ལྡན་འདས་ཀྱིས་ཤིང་སྡོང་པོ་ཆེན་པོའི་དཔེ་འདིའི་གདམས་ངག་གིས་གཏམས་ཏེ་གཅིག་པུ་དབེན་པ་བག་ཡོད་པ། རྟུན་པ་དང་ལྡན་པ། བདག་ཉིད་གཏོང་བར་གནས་པ་ན། གང་གི་ཕྱིར་རིགས་ཀྱི་བུ་རྣམས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །​ཚངས་པར་སྤྱོད་པ་ལ་བསྟེན་ཏོ། །​བྱ་བ་བྱས་སོ། །​འདི་ལས་སྲིད་པ་གཞན་མི་ཤེས་སོ་ཞེས་བྱ་བར་ཤེས་ནས་གོ་བར་བྱས་ཏེ། ཚེ་དང་ལྡན་པ་དེ་དགྲ་བཅོམ་པ་སེམས་ཤིན་ཏུ་རྣམ་པར་གྲོལ་བར་གྱུར་ཏོ། །​དེའི་ཚེ་བཅོམ་ལྡན་འདས་དང་ཧ་ཅང་ཡང་མི་རིང་བ་ཞིག་ན་གནག་རྫི་དགའ་བོ་ཞེས་བྱ་བ་འདུག་པར་གྱུར་པ་ཁར་བ་ལ་བརྟེན་ནས་གནག་སྐྱོང་ཞིང་འདུག་པ་ལས་དེའི་ཁར་བས་སྦལ་པ་ཞིག་བརྫིས་སོ། །​དེ་གནད་རྣམས་ཆད་ལ་ཐུག །​ཚིགས་རྣམས་བྱེ་ལ་ཐུག་པ་དང་སེམས་བསྐྱེད་པ། གལ་ཏེ་བདག་གིས་ལུས་འགུལ་ཏམ། སྐད་ཕྱུང་ན་གཞི་དེས་གནག་རྫི་དགའ་བོའི་གཏམ་གྱི་བར་ཆད་དུ་འགྱུར་རོ་སྙམ་དུ་རིག་ནས། བཅོམ་ལྡན་འདས་ལ་མངོན་པར་དད་པར་བྱས་ནས་ཤི་བ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་སོ།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8189#UT22084-001-006-8189