Degé Kangyur volume 2, F.145.a

སར་ཡུ་དང་། གནས་ལྡན་དང་། ཆེན་པོ་ཞེས་བྱ་བ་དེ་དག་འབབ་ཅིང་འདྲེ་བར་འགྱུར་བ་དེ་ལ་ནི་ཆུའི་ཚད་ཆུའམ། ཆུ་བུམ་པའམ། ཆུ་བུམ་པ་བརྒྱའམ། ཆུ་བུམ་པ་སྟོང་ངམ། ཆུ་བུམ་པ་བརྒྱ་སྟོང་འདི་སྙེད་ཅེས་གཟུང་བར་མི་ནུས་ཏེ། འོན་ཀྱང་ཆུ་མང་བའི་ཕྱིར་ཆུའི་ཚོགས་ཆེན་པོ་ཞེས་བྱ་བའི་གྲངས་སུ་འགྲོ་བ་དེ་བཞིན་དུ་བསོད་ནམས་ཀྱི་རྒྱུ་མཐུན་པ་དང་། དགེ་བའི་རྒྱུ་མཐུན་པ་དང་། བདེ་བའི་གཞི་བཞི་པོ་འདི་དག་དང་ལྡན་པའི་སྦྱིན་པ་པོ་དང་། སྦྱིན་བདག་གི་བསོད་ནམས་ཀྱི་ཚད་བསོད་ནམས་སམ། བསོད་ནམས་ཀྱི་འབྲས་བུའམ། བསོད་ནམས་ཀྱི་འབྲས་བུ་རྣམ་པར་སྨིན་པ་འདི་ཙམ་མོ་ཞེས་གཟུང་བར་མི་ནུས་ཏེ། འོན་ཀྱང་བསོད་ནམས་ཆེ་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །​ཇི་ལྟར་རྒྱ་མཚོ་བཀྲ་ཤིས་གཙང་ལ་དག །​ངོགས་བདེ་རིན་ཆེན་འབྱུང་གནས་མཚོ་མཆོག་དེར། །​མི་དང་རི་དགས་ཚོགས་ཀྱིས་བསྟེན་པ་ཡི། །​ཆུ་བོ་སོ་སོ་ནས་འབབ་འདུ་བ་ལྟར། །​དེ་བཞིན་གོས་དང་ཟས་སྐོམ་སྟེར་བའི་མི། །​མལ་ཆ་སྟན་དང་གདིང་བ་སྦྱིན་བྱེད་ལ། །​བསོད་ནམས་རྒྱུན་ནི་ཀུན་ནས་འདུ་འགྱུར་ཏེ། །​དཔེར་ན་རྒྱ་མཚོར་ཆུ་ཀླུང་འབབ་པ་བཞིན། །​དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། གང་གིས་ན་ཕྱག་དང་། ཞབས་དང་། དབུ་ལ་སོགས་པ་བཀུམ་པ་ལ་སོགས་པའི་བསོད་ནམས་ཀྱི་ཚོགས་ཀྱིས་སློང་མོ་པའི་སྐྱེ་བོ་ཚིམ་པར་མཛད་དེ། བསྐལ་པ་གྲངས་མ་མཆིས་པ་གསུམ་དུ་སེམས་ཅན་གྱི་དོན་གྱི་སླད་དུ་བདག་ཉིད་འོ་བརྒྱལ་ནས་མཛད་པ་ཐམས་ཅད་མཛད་ལགས་པ། ཡུལ་དགྲ་མཐའ་ན་དགེ་སློང་ལྔ་བརྒྱར་གཉིས་ཀྱིས་མ་ཚང་བ་དང་ཐབས་ཅིག་ཏུ་ནས་རུལ་པ་གསོལ་ལ། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ནི་བདུད་རྩི་འཚལ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་བྱས་ཤིང་བསགས་པ་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8184#UT22084-001-006-8184