Degé Kangyur volume 2, F.138.a

།དེ་ལྟ་ན་ཁྱེད་ཅག་ཁོ་བོའི་བཀའ་བཞིན་བྱེད་པ་ཡིན་ནོ། །​དེ་ནས་འཁོར་ལོ་རིན་པོ་ཆེ་དེ་ཤར་ཕྱོགས་མངོན་པར་ཕབ་ནས་ཤར་ཕྱོགས་ཀྱི་རྒྱ་མཚོ་ཆེན་པོ་ནས་སླར་ལོག་སྟེ། ལྷོ་དང་། ནུབ་དང་། བྱང་ཕྱོགས་སུ་ཡང་སྔོན་གྱི་འཁོར་ལོས་སྒྱུར་བ་འཕགས་པའི་ལམ་སྲོལ་གང་ཡིན་པར་འགྲོ་བར་འགྱུར་བས། དེ་ནས་འཁོར་ལོ་རིན་པོ་ཆེ་དེ་འཁོར་ལོས་སྒྱུར་བའི་རྒྱལ་པོས་སྤར་བ་དང་། སྟེང་གི་ནམ་མཁའ་ལ་འཕགས་ནས་བྱང་ཕྱོགས་སུ་སྔོན་གྱི་འཁོར་ལོས་སྒྱུར་བ་འཕགས་པའི་ལམ་སྲོལ་གང་ཡིན་པར་འགྲོ་བར་འགྱུར་རོ། །​འཁོར་ལོ་རིན་པོ་ཆེ་དེའི་རྗེས་བཞིན་དུ་འཁོར་ལོས་སྒྱུར་བའི་རྒྱལ་པོ་དཔུང་གི་ཚོགས་ཡན་ལག་བཞི་དང་ལྷན་ཅིག་འགྲོ་བར་འགྱུར་རོ། །​ཕྱོགས་གང་དུ་འཁོར་ལོ་རིན་པོ་ཆེ་དེ་སྡོད་པ་དེར་འཁོར་ལོས་སྒྱུར་བའི་རྒྱལ་པོ་ཡང་དཔུང་གི་ཚོགས་ཡན་ལག་བཞི་དང་ལྷན་ཅིག་གནས་འདེབས་པར་འགྱུར་ཞིང་། བྱང་ཕྱོགས་ཀྱི་ཁམས་ཀྱི་རྒྱལ་ཕྲན་གང་དག་ཡིན་པ་དེ་དག་འཁོར་ལོས་སྒྱུར་བའི་རྒྱལ་པོ་གང་ན་བ་དེར་དོང་སྟེ་ལྷགས་པ་དང་། འཁོར་ལོས་སྒྱུར་བའི་རྒྱལ་པོ་ལ་འདི་སྐད་ཅེས་ལྷ་ཚུར་གཤེགས། ལྷ་བྱོན་པ་ལེགས་སོ། །​ཡུལ་འཁོར་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་གང་ལགས་པ་འདི་ནི་ལྷའི་ལགས་ཀྱིས། ལྷས་རྗེས་སུ་བསྐྱང་དུ་གསོལ། བདག་ཅག་ནི་ལྷའི་བཀའ་བཞིན་བགྱིད་པ་ལགས་སོ་ཞེས་སྨྲས་པ་དང་། དེའི་ཕྱིར་སྣ་བོ་དག་ཁྱེད་ཅག་རང་རང་གི་ཡུལ་རྣམས་ཆོས་ཀྱིས་རྗེས་སུ་བསྐྱང་བར་བྱའི་ཆོས་མ་ཡིན་པས་ནི་མ་ཡིན་ནོ། །​འགའ་ཞིག་ཆོས་མ་ཡིན་པ་སྤྱོད་དམ། འདྲེན་མར་སྤྱོད་ན་ཁྱེད་ཀྱིས་ཡུལ་འཁོར་དུ་མ་བཞག་ཅིག །​དེ་ལྟ་ན་ཁྱེད་ཅག་ཁོ་བོའི་བཀའ་བཞིན་བྱེད་པ་ཡིན་ནོ། །​དེ་ནས་འཁོར་ལོ་རིན་པོ་ཆེ་དེས་བྱང་ཕྱོགས་མངོན་པར་ཕབ་ནས་བྱང་ཕྱོགས་ཀྱི་རྒྱ་མཚོ་ཆེན་པོ་ནས་སླར་ལོག་སྟེ། རྒྱལ་པོའི་ཕོ་བྲང་དེ་ཉིད་དུ་ཕྱིན་ནས་དཀོར་ཁང་གི་སྟེང་དུ་སྲོག་ཤིང་བཙུགས་པ་བཞིན་དུ་གནས་སོ། །​སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་འཁོར་ལོ་རིན་པོ་ཆེ་དེ་ལྟ་བུ་འཇིག་རྟེན་དུ་འབྱུང་བར་འགྱུར་རོ། །​སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་གླང་པོ་རིན་པོ་ཆེ་ཇི་ལྟ་བུ་ཞིག་འཇིག་རྟེན་དུ་འབྱུང་བར་འགྱུར་ཞེ་ན།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8170#UT22084-001-006-8170