Degé Kangyur volume 2, F.137.a

འཕགས་པ་བདག་རྒན་མོས་རྔོ་མི་ཐོག་སྟེ་འོན་ཀྱང་བུ་མོ་འདི་གཞོན་ལགས་ཀྱིས་འདི་ལ་སྩོལ་ཅིག་དང་། འདིས་ནི་ཅི་ལེགས་སུ་བགྱིད་པར་འགྱུར་རོ། །​དེ་ནས་ཚེ་དང་ལྡན་པ་ཀུན་དགའ་བོ་དེའི་དྲུང་དུ་སོང་སྟེ་ཕྱིན་ནས་སྨྲས་པ། སྲིང་མོ་ཁྱོད་ཀྱིས་དེ་བཞིན་གཤེགས་པའི་ཆེད་དུ་ནས་ལ་ཅི་ལེགས་སུ་བྱེད་ནུས་སམ། དེས་སྨྲས་པ། འཕགས་པ་བདག་དང་དམ་ཞིག་བཅའ་སྟེ། གལ་ཏེ་བདག་ལ་ཚིག་འགའ་གསུང་བ་ལྟ་ན་ཅི་ལེགས་སུ་བགྱིའོ། །​དེས་སྨྲས་པ། བྱི་དོར་གྱིས་ཤིག་དང་སྨྲའོ། །​དེ་ནས་འདྲུ་ཞིང་དྲིས་པ། འཕགས་པ་སངས་རྒྱས་ཞེས་བགྱི་བ་འདི་ཅི་ལགས། ཚེ་དང་ལྡན་པ་ཀུན་དགའ་བོས་བསམས་པ། གལ་ཏེ་འདི་ལ་བདག་གིས་སངས་རྒྱས་ཀྱི་བསྔགས་པ་བརྗོད་ན། སངས་རྒྱས་ཀྱི་ཆོས་རྣམས་ནི་ཟབ་པ་ཡིན་པས་འདིས་ཤེས་པར་མི་འགྱུར་བའི་གནས་གང་ཡིན་པ་དེ་ཡོད་ཀྱིས། མ་ལ་བདག་གིས་འདི་ལ་འཁོར་ལོས་སྒྱུར་བའི་བསྔགས་པ་བརྗོད་པར་བྱའོ་སྙམ་དུ་བསམས་ནས་སྨྲས་པ། སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་རིན་པོ་ཆེ་སྣ་བདུན་ཡང་འཇིག་རྟེན་དུ་འབྱུང་བར་འགྱུར་ཏེ། བདུན་པོ་དེ་དག་གང་ཞེ་ན། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་ནི་བློན་པོ་རིན་པོ་ཆེ་ཡིན་ནོ། །​སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་འཁོར་ལོ་རིན་པོ་ཆེ་ཇི་ལྟ་བུ་ཞིག་འཇིག་རྟེན་དུ་འབྱུང་བར་འགྱུར་ཞེ་ན། སྲིང་མོ་འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གསོ་སྦྱོང་བཅྭ་ལྔ་པ་དེ་ཉིད་ལ་མགོ་ཁྲུས་བྱས་ཏེ་སྨྱུང་བ་བྱས་ནས། དེ་སྟེང་གི་ཁང་བཟངས་ཀྱི་གཞི་ལ་བློན་པོའི་ཚོགས་ཀྱིས་བསྐོར་ནས་འདུག་པ་ན། ཤར་ཕྱོགས་ནས་འཁོར་ལོ་རིན་པོ་ཆེ་ལྟེ་བ་དང་བཅས་པ། རྩིབས་སྟོང་དང་ལྡན་པ། མྱུ་ཁྱུད་དང་བཅས་པ། རྣམ་པ་ཐམས་ཅད་ཡོངས་སུ་རྫོགས་པ། མཛེས་པ། མཁན་བཟོས་མ་བྱས་པ། བཟང་པོ་ཐམས་ཅད་གསེར་ལས་བྱས་པ་ཞིག་འབྱུང་བར་འགྱུར་ཏེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གང་ཡིན་པ་འདིས་གསོ་སྦྱོང་བཅྭ་ལྔ་པ་དེ་ཉིད་ཀྱི་ཚེ་ཞེས་བྱ་བ་ནས་ཐམས་ཅད་གསེར་ལས་བྱས་ཞེས་བྱ་བ་ནས་དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ཐོས་སོ་ཞེས་བྱ་བའི་བར་གོང་མ་བཞིན་དུའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8168#UT22084-001-006-8168